فولڈنگ کرسیاں اور عارضی طور پر سجائی گئی کتابوں کی الماریاں۔ ستمبر 1949ء میں فرینکفرٹ میں ہونے والے پہلے کتاب میلے نے حاضرین کو جرمنی کے ادبی ذخیرے کی ایک جھلک پیش کی۔ مشرقی اور مغربی جرمنی میں علیحدگی کی وجہ سے فرینکفرٹ (مغربی جرمنی) میں اور لائپزگ (مشرقی جرمنی) میں دو مخلتف کتاب میلوں کا آغاز ہوا۔

وفاقی جمہوریہ جرمنی کے قیام کے فوراﹰ بعد اسٹاک ایکسچینج کی تنظیموں اور پر عزم کتاب فروشوں نے فرینکفرٹ کتاب میلے کا آغاز کیا۔ سن 1949 میں 18 سے 23 ستمبر تک ناشرین، مصنفین اور ادب سے دلچسپی رکھنے والے حلقوں نے نہ صرف 200 سے زائد نمائش کنندگان کی اس خصوصی پیشکش کو دیکھا بلکہ آپس میں رابطے بھی قائم کیے۔ فرینکفرٹ کے پاؤل کیتھیڈرل میں 8500 کتابوں کی نمائش کی گئی، جس میں 14 ہزار افراد نے شرکت کی۔

جرمن عوام کی دیگر ممالک کی غیر سنسر شدہ ثقافت اور ادب میں بڑھتی ہوئی دلچسپی کی وجہ سن 1951 میں فرینکفرٹ کتاب میلے کو ایک بڑی نمائش گاہ میں منتقل کر دیا گیا۔ دو برس بعد سن 1953 میں فرینکفرٹ کتاب میلے میں غیر ملکی پبلشرز کی تعداد جرمن پبلشرز کی تعداد سے بھی زیادہ ہو گئی۔

سن 1954 کے فٹ بال ورلڈکپ میں جرمنی کی فتح کے بعد عوام میں فٹ بال کے کھیل کی مقبولیت اس قدر بڑھ رہی تھی کہ فرینکفرٹ کتاب میلے میں جرمنی کے اہم ترین ناشر ’ بُردا فَیرلاگ‘ کے نمائندوں نے بھی قومی فٹ بال ٹیم کے کھلاڑیوں کی طرح کی جرسیاں اور شارٹس پہن رکھی تھیں۔

سردیوں کی آمد سے قبل درختوں سے جھڑتے سنہری پتوں کے رومانوی مناظر سے بھرے گولڈن اکتوبر کے مہینے میں فرینکفرٹ کتاب میلے کا انعقاد جلد ہی ایک روایت بن گیا۔ تاہم مشرقی جرمن شہر لائپزگ میں سال نو کے آغاز پر کتاب میلہ منعقد کیا جاتا ہے تاکہ ادبی ذوق رکھنے والے شائقین دونوں میلوں سے لطف اندوز ہو سکیں۔ سن 1957 میں قریب 1300 ناشرین نے اس میلے میں اپنی نئی کتابیں پیش کیں۔

جرمن پبلشرز کی نئی اشاعتیں وفاقی جمہوریہ جرمنی کی عکاسی کرتی تھیں۔ فرینکفرٹ کتاب میلے میں نہ صرف ادب اور روشن خیال کتابیں پیش کی جاتی تھیں بلکہ 1960ء کی دہائی کے وسط سے ’گائیڈ بکس‘ اور قیمتی معیاری کاغذ پر شائع کی گئی مشہور کتابیں بھی دستیاب ہونے لگی تھیں۔ اس دوران فرینکفرٹ بین الاقوامی کاپی رائٹس ٹریڈ کا مرکز بن گیا کیونکہ تب تک کتاب کو ایک قیمتی شے کے طور تسلیم شدہ حیثیت حاصل ہو چکی تھی۔

وفاقی جمہوریہ جرمنی میں طلبہ کی طرف سے احتجاج کے دور نے بھی فرینکفرٹ کے بین الاقوامی کتاب میلے پر اپنے اثرات چھوڑے اور سن 1968 کے میلے کو ’پولیس میلے‘ کے نام سے یاد کیا جاتا ہے۔ مظاہرین سینیگال کے صدر سینگور کو امن انعام دیے جانے پر برہم تھے۔ کتاب میلے میں پولیس کی بھاری نفری تعینات کی گئی کیونکہ بائیں بازو کے ناشرین کے خلاف بھی مظاہرے کیے جا رہے تھے۔

سن 1988میں سلمان رشدی کی کتاب ’سیٹَینک ورسِز‘ کی اشاعت کے بعد مسلم ممالک کے متعدد علماء کی طرف سے ان کے قتل کے فتوے جاری کر دیے گئے تھے۔ اس کے اگلے برس فرینکفرٹ کتاب میلے کے منتظمین کی جانب سے اسلامی دنیا میں بہت متنازعہ سمجھے جانے والے مصنف سلمان رشدی کو بطور مہمان مقرر مدعو کیا جانا بین الاقوامی اخبارات میں سرخیوں کی وجہ بنا۔

سن 2019 میں ادب کے نوبل انعام کا حق دار قرار دیے جانے والے آسٹریا کے ڈرامہ نویس اور ناول نگار پیٹر ہانڈکے کی کتابیں بھی فرینکفرٹ کتاب میلے میں نمائش کے لیے پیش کی جائیں گی۔ پیٹر ہانڈکے ماضی میں کئی تنازعات کا شکار رہ چکے ہیں۔ ان میں سے ایک سرب جنگی لیڈر سلوبوڈان میلوشےوچ کی تدفین میں شرکت تھی اور اس سے قبل بلقان کی جنگ کے دوران پیٹر ہانڈکے کا سربیا نواز موقف اور ان کی کتاب ’جسٹس فار سربیا‘ بھی۔

سن 1988 سے فرینکفرٹ کتاب میلے میں ہر سال کسی نہ کسی ایک ملک کو بطور خصوصی مہمان منتخب کیا جاتا ہے۔ اس ملک کو اپنے ہاں کی ادبی تخلیقات کو پیش کرنے کا موقع ملتا ہے۔ اس مرتبہ سال 2019ء کے میلے کا خصوصی مہمان ملک ناروے ہو گا۔ سن 2006 میں خصوصی مہمان ملک بھارت تھا، جس نے فرینکفرٹ میں ہندی زبان کو متعارف کرانے کی کوشش بھی تھی۔

فرینکفرٹ کتاب میلے میں مہمان ممالک کے ادب پاروں کو تراجم کے ساتھ پیش کرنے پر بھی خصوصی توجہ دی جاتی ہے۔ لہٰذا تراجم اور ان کے حقوق اشاعت کی خرید و فروخت کے حوالے سے رابطوں کے لیے بھی یہ میلہ انتہائی اہم ہے۔ اس سال 70 ویں فرینکفرٹ بک فیئر میں تین لاکھ نوے ہزار کتابیں، آڈیو بکس، ای بکس اور دیگر روایتی اور ڈیجیٹل مصنوعات نمائش کے لیے رکھی جائیں گی۔

ترک نژاد برطانوی خاتون ناول نگار اور نسائی حقوق کی سرگرم کارکن الف شفق کی کتاب 49 زبانوں میں ترجمہ کی جا چکی ہے۔ ان کا تازہ ترین ناول "10 Minutes 38 Seconds in this Strange World," استنبول کی ایک طوائف کی زندگی کے بارے میں ہے۔ اس ناول کو 'بُکر پرائز' کے لیے بھی شارٹ لسٹ کیا گیا۔ تاہم ، ترک حکام کی جانب سے اس ناول کے خلاف "فحاشی کے جرائم" کے حوالے سے تحقیقات کی جارہی ہیں۔

ناول "The Underground Raildroad" کو انتہائی معتبر اعزازات سے نوازا جا چکا ہے، جن میں پولٹزر پرائز برائے افسانہ 2017ء اور نیشنل بک ایوارڈ 2016ء شامل ہیں۔ امریکی مصنف اپنے نئے ناول "The Nickel Boys" کی تشہیر کے لیے فرینکفرٹ کتاب میلے میں شرکت کریں گے۔ یہ ناول فلوریڈا کے ایک اسکول میں اصلاحات پر مبنی ہے جہاں صدیوں سے طالب علموں کو جنسی اور جسمانی تشدد کا نشانہ اور قتل بھی کیا گیا تھا۔

معروف ترین رومانوی ناول نگار جوجو موئس اپنی نئی کتاب "The Giver of Stars" کے ساتھ ایک مرتبہ پھر مداحوں کے درمیان دکھیں گی۔ فرینکفرٹ کتاب میلے میں 20-16 اکتوبر کو تجارتی اور کاروباری افراد کے لیے مختص کیا گیا ہے جبکہ ہفتے کے آخر میں عوام میلے کا رخ کریں گے۔ جوجو موئس ایک انٹرویو کے ساتھ ساتھ اپنی کتاب پر دستخط کی ایک تقریب میں شرکت کریں گی۔

مختلف یورپی ممالک کے دارلحکومت میں بریگزٹ کے خلاف ایک ’فرینڈ شپ ٹوئر‘ کے سلسلے میں برطانوی مصنف کین فولٹ، جوجو موئس، کیٹ موس اور لی چائلڈ زیادہ تر ایک ساتھ نظر آئیں گے۔ بیسٹ سیلر تھرلر ناول "The Pillars of the Earth" کے لیے مشہور مصنف کین فولٹ 19 اکتوبر کو فرینکفرٹ میں ادبی گالا کی تقریب کے دوران اس مہم کا آغاز کریں گے۔

پولینڈ کی ادیبہ اور شاعرہ اولگا توکارچک نے ادبی دنیا میں بین الاقوامی مداحوں کو اپنے ناولوں سے بے حد متاثر کیا ہے۔ سویڈش اکیڈمی نے ان کو سن 2018 میں ادب کے انعام کا حقدار ٹھہرایا ہے۔ ستاون سالہ ادیبہ اپنے ملک میں خواتین اور جنسی اقلیتوں کے حقوق کے لیے بھی جانی جاتی ہیں۔ وہ فرینکفرٹ بک فیئر کی افتتاحی پریس کانفرنس میں شرکت کریں گی۔

اس نارویجیئن مصنف کی چالیس ملین سے زائد کتابیں فروخت ہو چکی ہیں: جو نیسبو اپنے سنسنی خیز ناول "Inspector Harry Hole" کے لیے کافی مقبول ہوئے۔ تھرلر ناولوں کے سلسلے میں ان کے نئے ناول کا عنوان "Knife" ہے۔ فرینکفرٹ کتاب میلے میں جو نیسبو اپنی ایک نئی کتاب بھی پیش کریں گے۔

نارویجیئن مصنفہ مایا لُنڈے کو اپنے مقبول ترین ناول "The History of Bees" کے بدولت بین الاقوامی شہرت حاصل ہوئی۔ مایا اپنی آنے والی کتاب "The End of the Ocean" میں ماحولیاتی تبدیلی سے متعلق عملی اقدامات کے مطالبے پر عمل پیرا ہیں۔ اس کتاب کی اشاعت جنوری 2020ء میں متوقع ہے۔

فرینکفرٹ کتاب میلے 2020ء کے لیے کینیڈا کو خصوصی مہمان ملک قرار دیا گیا ہے۔ اعزازی تقریب میں کینیڈا کی معروف ادبی شخصیت مارگریٹ ایٹووڈ شرکت کریں گی۔ حال ہی میں ان کے ناول "The Testaments" اور اسی کے سلسلے "The Handmaid's Tale"کو ایک ٹی وی سیریز کی صورت میں بھی پیش کیا گیا۔ مارگریٹ ایٹووڈ کو افسانہ نگاری کے لیے بُکر پرائز سے بھی نوازا گیا ہے۔