امریکی محکمہ دفاع پینٹا گون کے ترجمان ریئر ایڈمرل جان کِربی نے کہا ہے کہ امریکی طیارے آئی ایس گروپ کو نشانہ بنانے کے لیے ہر موقع استعمال کر رہے ہیں لیکن جہادیوں کے خلاف زمینی فورس نہ ہونے کی وجہ سے ان حملوں کا خاطر خواہ فائدہ نہیں ہو رہا۔

انہوں نے صحافیوں سے باتیں کرتے ہوئے کہا: ’’محض فضائی حملوں سے یہ کام نہیں ہو گا، مسئلہ حل نہیں ہو گا، کوبانی نہیں بچے گا۔‘‘

امریکا کی سینٹرل کمانڈ کے اعدادوشمار کے مطابق ستائیس ستمبر سے کوبانی کے قریبی علاقوں میں جہادیوں پر بیس فضائی حملے کیے گئے ہیں۔

خیال رہے کہ جہادی کوبانی کا کنٹرول حاصل کرنے کے لیے مسلسل لڑ رہے ہیں۔ امریکی قیادت میں فضائی حملوں کے باوجود لڑائی کی شدت میں کمی نہیں آئی۔

امریکی فوج کے مطابق بدھ کو اتحادی طیاروں نے کوبانی کے گرد جہادی اہداف پر متعدد حملے کیے ہیں۔ اے ایف پی کے ایک نمائندے کے مطابق کوبانی میں ہونے والی فائرنگ اور مارٹر شیلز کی آوازیں سرحد پار ترکی میں بھی سنی جا رہی ہیں۔

سیریئن آبزرویٹری فار ہیومن رائٹس کے سربراہ رامی عبدالرحمان کے مطابق جہادیوں نے بدھ کو کوبانی میں ایک خودکش حملہ کیا ہے تاہم اس کے نتیجے میں ہونے والے جانی نقصان کا پتہ نہیں سکا۔

اُدھر امریکی صدر باراک اوباما نے بدھ کو اپنی اعلیٰ فوجی قیادت سے ملاقات کی ہے۔ پینٹا گون میں ہونے والی اس ملاقات اسلامی ریاست کے جہادیوں کے خلاف لڑائی پر غور کیا گیا۔

اس ملاقات کے بعد اوباما نے کہا کہ آئی ایس گروپ کے خلاف فتح آسان نہیں ہو گی۔ تاہم انہوں نے یہ بھی کہا کہ اس گروہ کے خلاف عالمی اتحاد وسیع ہوتا جا رہا ہے جو شام اور عراق میں لڑنے والے سنی انتہا پسندوں کے خاتمے کا پکّا ارادہ لیے ہوئے ہے۔

امریکی صدر نے صحافیوں سے باتیں کرتے ہوئے کہا: ’’اتحادیوں کے ساتھ مل کر ہمارے حملے جاری ہیں۔ یہ بدستور ایک مشکل مشن ہے۔‘‘

انہوں نے مزید کہا: ’’جیسا کہ میں نے شروع سے ہی کہا ہے کہ یہ کوئی ایسا معاملہ نہیں جو راتوں رات حل ہو جائے۔‘‘

خبر رساں ادارے اے ایف پی کے مطابق باراک اوباما نے کہا کہ آئی ایس دنیا کے امن کے لیے خطرہ ہے اور محض متاثرہ خطے میں ہی نہیں، بلکہ اس بارے میں وسیع تر اتفاق پایا جاتا ہے۔ انہوں نے کہا کہ اس گروہ کے ظالمانہ رویوں پر قابو پانے کے لیے سب تیار ہیں۔