ناریل کے ٹوٹے ہوئے درخت، بجلی کے اکھڑے ہوئے کھمبے اور ٹوٹی ہوئی چھتیں، اس سمندری طوفان نے صوبہ سمر کے شہر برونگن کو تقریباﹰ تباہ کر دیا۔ طوفانی ہواؤں کی رفتار 170 کلومیٹر فی گھنٹہ تک تھی لیکن خدشات کے برعکس اس مرتبہ ہلاکتیں کم ہوئیں۔ ایک برس قبل سپر ٹائیفون کی ہواؤں کی رفتار 300 کلومیٹر فی گھنٹہ تک تھی اور انسانی ہلاکتوں کی تعدد سات ہزار۔

اس سمندری طوفان کا نام ہاگُوپِٹ تھا۔ فلپائن کی زبان میں اس کا مطلب ’کوڑا‘ ہے۔ مقامی جزائر کے لوگوں نے اس طوفان کو روبی کا نام دیا ہے کیونکہ طوفان کی رات لاوان کے ایک ہنگامی امدادی کیمپ میں ایک بچی پیدا ہوئی تھی اور اسی کے نام پر اس طوفان کا عوامی نام بھی رکھا گیا۔ میڈیا رپورٹوں کے مطابق یہ نومولود بچی خیریت سے ہے۔

تباہ ہونے والی سڑکوں کی تعمیر اور بجلی کے نظام کی بحالی میں ابھی کچھ وقت لگے گا۔ کئی ملین افراد اس وقت بجلی کے بغیر زندگی گزارنے پر مجبور ہیں۔ صوبہ سمر میں مواصلاتی نظام بھی کام نہیں کر رہا۔

خاص طور پر ساحل سمندر پر واقع گھر اور جھونپڑیاں تباہ ہو گئے۔ فلپائن 7107 جزائر پر مشتمل ملک ہے۔ ہر سال اس ملک کو تقریباﹰ 20 مختلف سمندری طوفانوں کا سامنا کرنا پڑتا ہے۔

یہ شخص اپنے تباہ شدہ مکان میں وہ چیزیں تلاش کر رہا ہے، جو ممکنہ طور پر طوفان کے باوجود محفوظ رہی ہوں۔ تازہ سرکاری اعداد و شمار کے مطابق سات لاکھ سے زائد افراد اس ٹائیفون کے نتیجے میں بے گھر ہو چکے ہیں۔

عام شہریوں کی ایک بہت بڑی تعداد رواں برس دوسری مرتبہ بے گھر ہوئی ہے۔ تقریباﹰ ایک سال پہلے آنے والے طوفان کی نتیجے میں فلپائن کے چار لاکھ باشندے بے گھر ہوئے تھے۔ نیشنل ڈیزاسٹر رِسک مینیجمنٹ کے مطابق بے گھر افراد نے تیس صوبوں کے بےشمار گرجا گھروں، اسکولوں اور سرکاری عمارتوں میں پناہ لے رکھی ہے۔

فوجی اور رضا کار متاثرہ افراد میں امدادی اشیاء تقسیم کرنے کی کوششوں میں مصروف ہیں۔ اس مرتبہ سماجی امور کی وزارت نے احتیاطی تدابیر کے تحت بہت سے انتظامات پہلے ہی کر رکھے تھے۔ یورپی یونین کے علاوہ امریکا اور کئی دیگر ملکوں نے امداد کے وعدے کیے ہیں۔

زیادہ تر افراد نے اسکولوں اور دیگر بڑی عمارتوں میں پناہ لے رکھی ہے۔ گزشتہ چند دنوں کے دوران تقریباﹰ سات لاکھ افراد کو محفوظ مقامات تک پہنچایا گیا۔ ایک سال پہلے ساحلی علاقوں کے بہت سے رہائشیوں نے اپنے گھر بار چھوڑنے سے انکار کر دیا تھا۔

عام لوگوں کو پناہ گرجا گھروں میں بھی ملی۔ متاثرہ افراد کے حوصلے اب بھی بلند ہیں۔ صوبہ سمر کی خاتون گورنر کا کہنا تھا، ’’ہمارے گھر تباہ ہوئے ہیں لیکن ہم ابھی زندہ ہیں، جو نقصان ہوا ہے اس کا اب بھی ازالہ کیا جا سکتا ہے۔‘‘

ماہرین موسمیات نے آئندہ تین روز تک بارشوں اور ممکنہ سیلابوں کی پیش گوئی کی ہے۔ یہ سمندری طوفان پیر اور منگل کی درمیانی شب منیلا کے قریبی علاقے سے ٹکرائے گا۔ اس ٹائیفون کے باعث ہلاکتوں کی تعداد بڑھ کر اب 17 ہو گئی ہے، جس میں اضافہ ممکن ہے۔