جرمنی میں قریب دو صدیوں سے آئسکریم بہت شوق سے کھائی جارہی ہے

ابتداء میں جرمنی میں آئسکریم فروخت کرنے والے اطالوی شہریوں کا تعلق ڈولمائک کے پہاڑی علاقے سے تھا۔ یہ لوگ موسم گرما میں کھیتوں اور لکڑی تراشنے کا کام کرتے تھے اور موسم سرما میں یہ اٹلی کے شمالی شہروں میں گرم اخروٹ بیچتے تھے۔ سن 1800ء کے قریب بہت سے اطالوی شہری آئسکریم بنانا سیکھ گئے تھے۔

آئس کریم بنانے کے ماہر افراد نے شمالی اٹلی سے ہالینڈ اور جرمنی کا رخ کرنا شروع کیا۔ ان ممالک میں پہلے ہی سے موجود اطالوی مہمان کارکنوں نے ان کو مدد فراہم کی۔

یورپ بھر میں سن 1900ء کے زمانے میں اطالوی آئسکریم بیچنے والے پھیل گئے اور ان میں سے بیشتر کوئی دکان کھولنے کی استطاعت نہ ہونے کے سبب گاڑیوں میں آئسکریم بیچا کرتے تھے۔

پہلی عالمی جنگ کے خاتمے کے بعد 1930ء میں اطالوی آئسکریم کا رواج خوب پروان چڑھا جب مختلف علاقوں میں بحیرہ روم کے روایتی کھانوں اور امریکی طرز کے پیزہ کے ساتھ ساتھ آئسکریم بھی بیچی جانے لگی۔

آئسکریم بنانے کا طریقہ نسل در نسل زبانی انداز میں منتقل ہوتا رہا۔ گرچہ اطالوی قوم آئسکریم کی موجد نہیں۔ جیلاٹو نامی آئسکریم روایتی طور پر دودھ، انڈے، چینی اور پھلوں کے قدرتی ذائقوں کو ملا کر بنائی جاتی ہے۔

جرمنی میں فروخت کی جانے والی 85 فیصد آئسکریم صنعتی پیمانے پر تیار کی جاتی ہے جبکہ بقیہ 15 فیصد اطالوی پس منظر کے حامل شہری تازہ تیار کرکے فروخت کرتے ہیں۔ تازہ آئسکریم کی چیدہ مثالوں میں روایتی سٹرابیری اور stracciatella آئسکریم جبکہ نئی تخلیق میں سبز یاسمین، کھوپرے اور لیمن گراس کے ذائقے والی آئسکریم خاصی مشہور ہے۔

جرمنی میں اطالوی آئسکریم فروخت کرنے والوں کی تنظیم کے مطابق رواں برس تین سرفہرست روایقی ذائقوں میں وینیلا، چاکلیٹ اور سٹرابیری جبکہ ایڈونچر کے شوقین افراد میں کیریمل سالٹ، وائن یارڈ آڑو کے ساتھ شیمپین والی آئسکریم سرفہرست ہے۔

ایسے افراد جنہیں دودھ میں شامل جُزو لیکٹوز سے الرجی لاحق ہے ان کے لیے خصوصی طور پر بکری کے دودھ سے تیار کردہ آئسکریم بھی دستیاب ہے۔

جرمنی میں آئسکریم کا رواج قریب دو سو برس پہلے پروان چڑھا جب چینی ایک نایاب اور پرتعیش چیز ہوا کرتی تھی۔ آج کل سالانہ کی بنیاد پر ایک جرمن شہری قریب آٹھ لٹر آئسکریم کھاجاتا ہے تاہم یہ مقدار چھبیس لیٹر سالانہ آئسکریم کھانے والے امریکیوں کے مقابلے میں پھر بھی بہت کم ہے۔