بدھ کے روز جاپان کے وزیر اعظم شِنزو آبے نے اس عزم کا اظہار کیا کہ ان کی حکومت فوکوشیما کے جوہری پلانٹ سے تابکار مادے کے اخراج کو روکنے کے لیے کی جانے والی کوششوں کو مزید بہتر اور موثر بنائے گی۔ انہوں نے وزیر برائے معیشت، تجارت اور صنعت کو ہدایت کی کہ وہ اس بات کو یقینی بنائیں کہ ٹوکیو الیکٹرک پاور کمپنی (ٹیپکو) فوکوشیما کے ایٹمی پلانٹ سے زہریلے پانی کے اخراج کو روکنے کے لیے کارروائی تیز کرے۔ ماہرین کے مطابق اس اخراج کو مکمل طور پر روکنے میں چالیس برس تک لگ سکتے ہیں اور اس پر گیارہ بلین ڈالر تک رقم خرچ کرنا پڑ سکتی ہے۔

جاپان کی وزارت برائے معیشت، تجارت و صنعت کا کہنا ہے کہ دسمبر تک وہ تابکار مادے کے اخراج کو کم کر کے ساٹھ ٹن فی روز تک لانے کا ارادہ رکھتی ہے۔

جاپانی حکومت کا کہنا ہے کہ وہ اس مسئلے کے حل کے لیے براہ راست کارروائی کرے گی۔

خیال رہے کہ ڈھائی برس قبل جاپان کے علاقے فوکوشیما میں تباہ کن زلزلے اور سونامی کے باعث وہاں موجود ایٹمی پلانٹس میں دراڑیں پڑ گئی تھیں، جس کے بعد ان جوہری پلانٹس سے تابکار مادے کا اخراج شروع ہو گیا تھا۔ یہ پلانٹس بند کر دیے گئے ہیں تاہم بعض سے اب بھی تابکاری جاری ہے۔

فوکوشیما کے ایٹمی بحران کو چرنوبل کے جوہری سانحے کے بعد بدترین مانا جاتا ہے۔

منگل کے روز وزیر اعظم آبے نے اس بحران سے نمٹنے کے لیے بلائے جانے والے ایک حکومتی اجلاس کے بعد صحافیوں سے بات کرتے ہوئے کہا، ’’جاپانی عوام اس مسئلے کے حل میں گہری دلچسپی رکھتے ہیں۔ اسی باعث ہمیں اس حوالے سے جلد اور موثر اقدامات کرنا ہوں گے۔ ہم صرف ٹیپکو پر انحصار نہیں کر سکتے۔ حکومت خود بھی کارروائی کرے گی۔‘‘

آبے نے یہ نہیں بتایا کہ ان کی حکومت اس حوالے سے کتنے فنڈز مختص کر رہی ہے۔ یہ فنڈز فوکوشیما کے پلانٹ کے اطراف کی زمین کو منجمد کرنے کے لیے درکار ہوں گے، جس سے پانی کے رِسنے کے عمل کر روکا جا سکے گا۔