جرمنی نے ویلز ا کی ٹیم کو با آسانی شکست دی اور پورے میچ کے دوران اس کا پلڑا ویلز پر بھاری رہا۔ میچ کا پہلا گول کپتان مشیل بالاک نے کیا جب کہ میچ کا دوسرا گول ویلز کی ٹیم کے دفاعی کھلاڑی کے ہاتھوں گول روکتے وقت ہوا۔ یہ میچ کارڈف میں کھیلا گیا۔

اس فتح کے بعد جرمنی کی ٹیم نے اپنے گروپ میں پہلی پوزیشن برقرار رکھی ہے۔ جرمنی کی ٹیم اگست اور ستمبر میں آزربائجان کے خلاف میچ کھیلے گی جب کہ اکتوبر میں وہ روس کا دورہ کرے گی۔

دوسری جانب لا پاز میں کھیلے گئے عالمی کپ کے ایک اور کوالیفائنگ میچ میں ارجنٹینا کی ٹیم کو ساٹھ برسوں کی بدترین شکست کا سامنا کرنا پڑا۔ ارجنٹینا کی ٹیم یہ میچ بولیویا سے چھ ایک سے ہار گئی۔اس سے قبل ارجنٹینا کی بدترین شکست کولمبیا کے ہاتھوں انیس سو ترانوے میں ہوئی تھی جب ارجنٹینا میچ پانچ صفر سے ہاری تھی۔

فٹ بال لیجنڈ میراڈونا کے ٹیم کے مینیجر بننے کے بعد یہ پہلی شکست ہے۔ اس سے قبل کھیلے گئے تینوں میچ ارجنٹینا نے جیتے تھے اور اس کے خلاف ایک بھی گول نہیں ہوا تھا۔ بولیویا جنوبی امریکہ کی فٹ بال ٹیموں میں خاصی پیچھے مانی جاتی ہے اور یہ اس کی ارجنٹینا کے خلاف صری چھٹی جیت ہے۔