فٹ بال: پولينڈ کی ورلڈ چيمپئن جرمنی کے خلاف تاريخی فتح
12 اکتوبر 2014![](https://static.dw.com/image/17988887_800.webp)
ہر چار برس بعد کھيلے جانے والے يورپی فٹ بال ٹيموں کے معروف ٹورنامنٹ یورو کپ کے کوالیفائنگ مقابلوں میں ہفتہ گيارہ اکتوبر کے روز کھیلے گئے گروپ ڈی کے ایک اہم میچ میں پولینڈ نے عالمی چیمپئن جرمنی کو دو صفر سے مات دے دی۔ پولينڈ کے دارالحکومت وارسا میں کھیلے گئے اس میچ میں ميزبان ٹيم کے ليے سباستیان مِلا اور آرکادیوش میلِک نے ايک ايک گول اسکور کيا۔
فٹ بال کی تاريخ ميں پولينڈ کی جرمنی کے خلاف يہ پہلی فتح ہے۔ ہفتے کو کھيلے گئے اس ميچ سے قبل پولش ٹيم موجودہ جرمن ٹيم يا مغربی اور مشرقی جرمنی کے الحاق سے قبل دو مختلف جرمن ٹيموں کے خلاف اپنے اٹھارہ ميں سے بارہ ميچ ہار چکی تھی۔ يہ امر بھی اہم ہے کہ پولش ٹيم کے کھلاڑی اپنے آخری چھ بين الاقوامی ميچوں ميں صرف ايک مرتبہ ہی گول کر پائے تھے۔
اس کواليفائنگ ميچ ميں کاميابی کے بعد پولينڈ چھ پوائنٹس کے ساتھ گروپ ڈی ميں اب پہلی پوزيشن پر ہے۔ پولينڈ کی ٹيم يورپی چيمپئن شپ 2016ء کے کواليفائنگ مرحلے ميں اپنے آخری سات ميچوں ميں ناقابل شکست ثابت ہوئی ہے۔
بعد ازاں قومی ٹيم کے کوچ آڈم نوالکا نے ذرائع ابلاغ سے بات چيت کرتے ہوئے کہا، ’’ايسے مقابلوں ميں ٹيم کے ارکان کو شناخت ملتی ہے۔ ميں اميد کرتا ہوں کہ يہ پولش قومی ٹيم کے ليے ايک نئی شروعات ہو گی۔‘‘
دوسری جانب جرمن فٹ بال ٹیم گزشتہ سات برس بعد یورپ کے اس متعبر فٹ بال ٹورنامنٹ کے کوالیفائنگ راؤنڈ میں پہلی مرتبہ شکست سے دوچار ہوئی ہے۔ جرمن ٹيم يورو کپ کے کواليفائنگ راؤنڈ ميں آخری مرتبہ 1998ء ميں کوئی ميچ ہاری تھی۔ گروپ ڈی ميں اب اپنے دو ميچ کھيلنے کے بعد جرمنی کے پوائنٹس کی تعداد تين ہے اور ٹيم چوتھی پوزيشن پر ہے۔
عالمی چيمپئن جرمن قومی فٹ بال ٹيم کے کوچ يوآخم لوو نے کھلاڑيوں پر زور ديا ہے کہ وہ منگل کے روز آئرلينڈ کے خلاف اپنا اگلا ميچ جيت کر جرمن ٹیم کو يورو کواليفائنگ مرحلے میں دوبارہ پٹری پر چڑھائيں۔ دريں اثناء گزشتہ روز ہی جمہوریہ آئرلینڈ نے جبرالٹر کو ایک میچ سات صفر سے ہرا کر گروپ ڈی میں دوسری پوزیشن سنبھال لی ہے۔