فٹ بال: یورو کوالیفائنگ میں ہالینڈ کی شاندار فتح
17 نومبر 2014![](https://static.dw.com/image/17987658_800.webp)
یورو کوالیفائنگ مقابلوں کے لیے بنائے گئے گروپ اے میں ہالینڈ اور لیٹویا کا سامنا اتوار کو ہوا جس میں ہالینڈ نے بڑے فرق سے فتح حاصل کی۔ اس کے کھلاڑیوں نے لیٹویا کی ٹیم کی ایک نہ چلنے دی جو ایک بھی گول کرنے سے محروم رہی جبکہ ہالینڈ نے اس کے خلاف چھ گول کر ڈالے۔
ہالینڈ کو اب تک چار مقابلوں کے نتیجےمیں چھ پوائنٹس مل چکے ہیں اور یہ چیک جمہوریہ سے چھ ہی پوائنٹس پیچھے ہے جس نے آئس لینڈ کے خلاف فتح کے نتیجے میں اپنی پوزیشن مزید مستحکم بنائی ہے۔
اس نتیجے نے ہالینڈ کی ٹیم اور اس کے کوچ خیُوش ہِڈِنک کو کافی سہارا دیا ہے۔ حالیہ میچوں میں خراب کارکردگی کے باعث ہِڈِنک نے گزشتہ ہفتے ایک بیان میں کہا تھا کہ ان کی ٹیم کو لیٹویا سے شکست کھانا پڑی تو وہ اپنے عہدے سے دستبردار ہو جائیں گے۔
اتوار کے میچ کے بعد ہِڈِنک نے کہا کہ حالیہ دنوں میں ایک ایسا ماحول پیدا ہو چکا تھا جس میں ہر کوئی اپنی کارکردگی کو بہتر بنانا چاہتا تھا۔ انہوں نے کہا: ’’سب سے بڑی بات یہ تھی کہ ہم نے ایک اہم میچ میں اچھا کھیل پیش کیا۔‘‘
اسی سلسلے کے دیگر مقابلوں میں اٹلی اور کروشیا کے درمیان میچ ایک ایک گول سے برابر رہا ہے۔ چیک جمہوریہ نے آئس لینڈ کو ایک کے مقابلے میں دو گول سے مات دی ہے۔ آئس لینڈ کو اس سے پہلے تین مقابلوں میں مسلسل فتح ہوئی تھی تاہم اتوار کو چیک کھلاڑی اس کے سامنے دیوار بن گئے اور انہوں نے اس کی جیت کا سلسلہ توڑ ڈالا۔
اسرائیل نے بوسنیا ہیرسےگووینا کو صفر کے مقابلے میں تین گول سے شکست دے کر اپنے گروپ میں سرفہرست پوزیشن حاصل کر لی ہے۔ ترکی نے قزاقستان کو تین ایک سے ہرا دیا۔
گروپ ایچ پر مسلسل کروشیا کا غلبہ ہے جسے دس پوائنٹس حاصل ہیں۔ اسی گروپ میں ناروے نے آذربائیجان کو ایک صفر سے شکست دی ہے جبکہ بلغاریہ اور مالٹا کے درمیان میچ ایک ایک گول سے بے نتیجہ رہا۔ قبرص نے انڈورا کو پانچ صفر سے ہرایا ہے۔ یورو کوالیفائنگ کے اگلے مرحلے کے میچ آئندہ برس ستائیس سے اکتیس مارچ تک کھیلے جائیں گے۔