فیفا ورلڈ کپ، برازیل اور کولمبیا کوارٹر فائنل میں پہنچ گئے
29 جون 2014![](https://static.dw.com/image/17744280_800.webp)
فیفا ورلڈ کپ 2014ء کے سلسلے میں بروز ہفتہ مجموعی طور پر دو پری کوارٹر فائنل کھیلے گئے، جن میں لاطینی امریکی ٹیمیں ایک دوسرے کے مد مقابل تھیں۔ پہلے میچ میں برازیل کو چلی کا سامنا تھا، جس میں چلی نے میزبان ٹیم کو ایک سخت مقابلہ دیا۔ مقررہ نوے منٹ کے کھیل میں یہ میچ ایک ایک گول سے برابر رہا جبکہ تیس منٹ کے اضافی وقت میں بھی کوئی ٹیم مزید گول نہ کر سکی۔ یوں بات پنلٹی شوٹ آؤٹ تک پہنچ گئی، اور ایک ڈرامائی صورتحال میں برازیل نے پنلٹی شوٹ آؤٹ میں یہ میچ دو کے مقابلے میں تین گول سے جیت لیا۔
برازیلی گول کیپر جولیو سیزر نے پنلٹی شوٹ آؤٹ پر سانچیز اور پینیلا کی طرف سے لگائی کی ککس کو روک لیا جبکہ گونزالا جارا نے اپنی کک باہر پھینک دی۔ دوسری طرف چلی کے گول کیپر نے ہُلک کی کک روکی اور ڈیوڈ لوئیس نے پنلٹی کک ضائع کر دی۔ قبل ازیں مقررہ وقت میں برازیل کی طرف سے لوئیس نے اٹھارہویں منٹ میں گول کیا جبکہ سانچیز نے 32 ویں منٹ میں گول کر کے میچ برابر کر دیا تھا۔
میچ کے بعد برازیلی کوچ لوئیس فلپے اسکولاری نے اعتراف کیا کہ ان کی ٹیم خوش قسمت رہی، ’’اگر آپ کو کوئی موقع ملے اور آپ اس سے فائدہ نہ اٹھائیں تو آپ ٹورنامنٹ سے باہر ہو جاتے ہیں۔‘‘ ان کا کہنا تھا کہ برازیل کو دوسرا گول کرنے کے تین یا چار موقع ملے لیکن انہیں برتری نہ مل سکی،’’ہماری ٹیم نے فٹ بال کو چلی کی ٹیم کے مقابلے میں زیادہ کنٹرول میں رکھا اور گول پر حملے بھی زیادہ کیے لیکن جب کوئی ٹیم گول نہ کر سکے تو اسے زیادہ خطرات لاحق ہو جاتے ہیں۔‘‘
اسکولاری کے بقول اس میچ میں چلی نے انتہائی عمدہ کھیل پیش کیا، ’’ چلی ٹیم ایک متوازن ٹیم ہے اور اس نے اچھے کھیل کا مظاہرہ کیا۔‘‘ ان کا مزید کہنا تھا کہ ایک پُرتناؤ کھیل میں برازیلی کھلاڑیوں نے بھی اچھا کھیل پیش کیا۔ اس میچ کے ابتداء میں ہی برازیلی اسٹار کھلاڑی نیمار معمولی زخمی ہو گئے تھے لیکن وہ باہر نہ گئے۔ اسکولاری نے امید ظاہر کی ہے کہ اگلے میچ تک نیمار مکمل فٹ ہو جائیں گے۔
برازیل کی ٹیم اب چار جولائی کو کوارٹر فائنل میں کولمبیا کے مد مقابل آئے گی۔ ہفتے کے دن ہی ایک دوسرے پری کوارٹر فائنل مقابلے میں کولمبیا نے یوروگوائے کو دو صفر سے مات دی۔ اس میچ میں دونوں گول اسٹار کھلاڑی جیمز ریڈریگوز نے کیے۔
آج بروز اتوار پری کوارٹر فائنل میں ہالینڈ اور میکسیکو جبکہ کوسٹاریکا کا مقابلہ یونان سے ہو گا۔ ان دونوں میچوں کامیابی حاصل کرنے والی ٹیمیں کوارٹر فائنل میں مد مقابل آئیں گی۔