اس جرمن مرد اور اس کی سابقہ بیوی کے خلاف مقدمے کی سماعت کے دوران ان کے ہولناک جرائم کی تفصیلات سامنے آنے کے بعد ملکی میڈیا کی طرف سے ان کے گھر کو ’خوف و دہشت کی آماجگاہ‘ اور ’عقوبت خانہ‘ قرار دیا جانے لگا تھا۔

خبر رساں ادارے روئٹرز کی جمعہ پانچ اکتوبر کو ڈسلڈورف سے ملنے والی رپورٹوں کے مطابق اس جرمن جوڑے کا تعلق ملک کے سب سے زیادہ آبادی والے صوبے نارتھ رائن ویسٹ فیلیا کے ایک چھوٹے سے شہر ہوئکسٹر (Höxter)  سے ہے۔ دونوں ملزمان کے خلاف مقدمے کی سماعت دو سال تک جاری رہی، جس کے اختتام پر عدالت نے ملزم کو گیارہ سال اور ملزمہ کو تیرہ برس قید کی سزائیں سنائیں۔

ان دونوں کے خلاف یہ الزامات ثابت ہو گئے تھے کہ اس وقت 48 سالہ مرد ولفریڈ اور اس کی 49 سالہ سابقہ بیوی انگیلیکا برس ہا برس تک مختلف بہانوں سے ذاتی نوعیت کے اشتہارات دے کر اجنبی خواتین کو اپنے گھر بلاتے تھے اور پھر ان خواتین کو قید میں رکھا جاتا تھا۔

اس دوران ان دونوں کی طرف سے یرغمالی خواتین پر شدید نوعیت کا ذہنی اور جسمانی تشدد اور ان کا استحصال بھی کیا جاتا تھا۔ استغاثہ کے مطابق اس ’قاتل جوڑے‘ نے کم از کم دو خواتین کو قتل کیا اور کئی دیگر عورتوں کو طویل عرصے تک تشدد کا نشانہ بنایا۔

ایسی یرغمالی خواتین میں سے ایک خاتون شدید زخمی حالت میں ایک مقامی ہسپتال میں اس وقت انتقال کر گئی تھی، جب ملزمہ انگیلیکا نے اس کی جان بچانے کے لیے ایمبولینس بلا لی تھی۔ اس خاتون کے جسم پر تب شدید تشدد کے نشان اور زخم تھے، باندھ کر رکھے جانے کی وجہ سے اس کے جسم پر نیل پڑے ہوئے تھے اور اس کے پاؤں کے ناخن بھی انگلیوں سے اکھاڑ دیے گئے تھے۔

خبر رساں ادارے اے ایف پی کے مطابق جو دوسری خاتون ان ملزمان کے ہاتھوں قتل ہوئی تھی، اس کا آج تک کوئی سراغ نہیں ملا۔ ملزم ولفریڈ کے مطابق اس نے اور اس کی سابقہ بیوی نے اس خاتون کو قتل کر دیا تھا۔ ملزمہ انگیلیکا کے اعترافی بیان کے مطابق اس کے سابق شوہر اور شریک ملزم ولفریڈ نے اس خاتون کی لاش کے چھوٹے چھوٹے ٹکڑے کر کے انہیں جلا دیا تھا اور راکھ سردیوں کے موسم میں اپنے قصبے کی برف سے ڈھکی سڑکوں پر جگہ جگہ بکھیر دی تھی۔

عدالتی ریکارڈ کے مطابق یہ ملزمان جن اشتہارات کے ذریعے اپنا شکار بننے والی خواتین کو دھوکے سے اپنا ہاں بلاتے تھے، وہ ضرورت رشتہ کے نجی اشتہار ہوتے تھے۔ ان میں کہا جاتا تھا، ’’اکیلے زندگی گزارنے والے کسان کو بیوی کی ضرورت ہے۔‘‘ ممکنہ شادی اور اس سے قبل رابطے اور ملاقات کے ان اشتہارات میں ملزم ولفریڈ خود کو ’تنہا، نفیس انسان، شفیق اور بہت مہذب‘ بتایا کرتا تھا۔

نیوز ایجنسی ڈی پی اے کے مطابق عدالتی فیصلہ سنائے جانے سے قبل ملزمہ انگیلیکا نے اپنے جرائم پر شرمندگی کا اظہار کیا اور ان تمام خواتین سے معافی مانگی، جو اس کے جرائم کے نتیجے میں ہلاک یا زخمی ہوئی تھیں۔

عدالت نے یہ حکم بھی دیا کہ ملزم ولفریڈ کو دماغی علاج کے لیے ذہنی مریضوں کے ہسپتال میں داخل کرا دیا جائے۔ استغاثہ کے مطابق، جس نے دونوں ملزمان کے لیے عمر قید کا مطالبہ کیا تھا، ملزم ولفریڈ اپنے جرائم میں اس حد تک جنونی تھا کہ وہ اچھے برے اور صحیح غلط کے درمیان تفریق کا اہل ہی نہیں رہا تھا۔

م م / ع ح / روئٹرز، اے ایف پی، ڈی پی اے