بھارتی وزیر اعظم نریندر مودی نے امریکہ میں ایک سکھ علیحدگی پسند رہنما اور امریکی شہری کے قتل کی سازش میں مبینہ طورپر ایک بھارتی اہلکار کے ملوث ہونے کے واشنگٹن کے الزامات کا پہلی مرتبہ جواب دیتے ہوئے کہا ہے کہ وہ کسی بھی ثبوت کو دیکھیں گے لیکن چند واقعات سے امریکہ۔ بھارت تعلقات متاثر نہیں ہوں گے۔

بھارتی روزنامے فئنانشیل ٹائمز کے ساتھ ایک انٹرویو میں وزیر اعظم مودی نے کہا کہ "اگر ہمیں کوئی معلومات فراہم کرتا ہے تو ہم ضرور اس کا جائزہ لیں گے۔"

خالصتان: کیا بھارت نے اپنے سفارت خانوں کو خفیہ میمو بھیجا تھا؟

انہوں نے مزید کہا کہ"اگر ہمارے کسی شہری نے کچھ اچھا یا برا کیا ہے تو ہم اس کا جائزہ لینے کے لیے تیار ہیں۔ قانون کی حکمرانی کے حوالے سے ہمارا عزم محکم ہے۔"

یاد رہے کہ امریکہ نے حال ہی میں اپنے شہری اور علیحدگی پسند گروپ سکھ فار جسٹس کے رہنما گروپتونت سنگھ پنن کے خلاف قتل کی سازش میں ایک بھارتی سرکاری اہلکار کے ملوث ہونے کا الزام لگایا تھا۔

بھارت نے سکھ علیحدگی پسند رہنما پنن کو دہشت گرد قرار دے رکھا ہے۔

بیرون ملک مقیم انتہاپسند گروپوں کی سرگرمیاں باعث تشویش

وزیر اعظم مودی کا کہنا تھا کہ بیرون ملک مقیم بعض انتہا پسند گروپوں کی سرگرمیاں باعث تشویش ہیں۔ انہوں نے کہا، "یہ عناصر آزادی اظہار کی آڑ میں دھمکیاں دینے اور تشدد پر اکسانے میں مصروف ہیں۔"

یاد رہے کہامریکی وزیر خارجہ انٹونی بلنکن نے پنن کے قتل کی سازش میں بھارتی شہری کے ملوث ہونے کے متعلق ایک سوال کے جواب میں کہا تھا، ''میں کہہ سکتا ہوں کہ یہ وہ معاملہ ہے جسے ہم بہت سنجیدگی سے لیتے ہیں۔ گزشتہ ہفتوں میں ہم میں سے بہت سے لوگوں نے اسے براہ راست بھارتی حکومت کے ساتھ اٹھایا۔ اب (بھارتی) حکومت نے اعلان کیا ہے کہ وہ اس کی تحقیقات کر رہے ہیں۔ یہ اچھا اور مناسب بھی ہے اور ہم اس تفتیش کے نتائج دیکھنے کے منتظر ہیں۔''

وزیر اعظم مودی نے کہا کہ بھارت اور امریکہ کے درمیان رشتے کی مضبوطی کے لیے دوطرفہ مضبوط حمایت ہے، جو کہ ایک پختہ اور مستحکم شراکت داری کا واضح اشارہ ہے۔

مودی کی سکھ علیحدگی پسندوں سے نمٹنے کی نئی کوشش

انہوں نے مزید کہا کہ "سکیورٹی اور انسداد دہشت گردی میں تعاون ہماری شراکت داری کا ایک اہم جزو رہا ہے۔ میں کچھ واقعات کو دونوں معاملات کے درمیان سفارتی تعلقات سے جوڑنا مناسب نہیں سمجھتا۔"

کیا سکھوں کے الگ وطن خالصتان کا نظریہ اب بھی زندہ ہے؟

بھارتی وزیر اعظم نے مزید کہا کہ "ہمیں اس حقیقت کو قبول کرنے کی ضرورت ہے کہ ہم کثیر الجہتی کے دور میں رہ رہے ہیں۔ دنیا کے ممالک ایک دوسرے سے منسلک ہونے کے ساتھ ساتھ آزاد بھی ہیں۔ یہ حقیقت ہمیں یہ تسلیم کرنے پر مجبور کرتی ہے کہ تمام معاملات پر مکمل معاہدہ تعاون کے لیے شرط نہیں ہو سکتا۔"