پاکستان میں عید الاضحیٰ سولہ اکتوبر کو منائی جا رہی ہے۔ عید الفطر کی طرح اس عید کے موقع پر بھی بچیاں اور خواتین رنگا رنگ ملبوسات پہنتی ہیں اور مہندی لگاتی ہیں۔ یہ تہوار تین روز تک جاری رہتا ہے۔

عید الاضحیٰ کے موقع پر پوری مسلم دنیا میں کئی ملین جانور قربان کیے جاتے ہیں۔ ایک اندازے کے مطابق ’عید قرباں‘ کے تین روز کے دوران پاکستان میں ایک کروڑ جانور ذبح کیے جاتے ہیں۔ سولہ اکتوبر بدھ کو اتاری گئی اس تصویر میں لاہور میں قربانی کا ایک اونٹ دکھایا گیا ہے۔

عراق میں پُر تشدد واقعات کا سلسلہ بدستور جاری ہے۔ اس کے باوجود اس سال بھی عید کے موقع پر خرید و فروخت کا رجحان جاری رہا۔ اس تصویر میں عراقی دارالحکومت بغداد میں خواتین عید پر نت نئے ملبوسات سلوانے کے لیے کپڑے خرید رہی ہیں۔

رنگا رنگ غبارے کسی بھی بچے کے چہرے پر مسکراہٹ سجا دیتے ہیں اور اُس کا دل خوشی سے بھر دیتے ہیں۔ اس بار جرمنی میں زیادہ تر مسلمانوں نے عید الاضحیٰ کا تہوار منگل 15 اکتوبر کو منایا۔ یہ بچی جرمن شہر بون کی مہاجرین مسجد کے باہر غبارے ہاتھوں میں لیے عید کی خوشیوں میں شریک ہے۔

جرمن شہر بون کی مہاجرین مسجد میں نماز عید کے بعد عرب لڑکیوں کا ایک گروپ مل جُل کر عید کی خوشیاں منا رہا ہے۔ ان لڑکیوں کا تعلق عرب دنیا کے مختلف ممالک سے ہے لیکن عید کے موقع پر پوری دنیا سے تعلق رکھنے والے مسلمان رنگ و نسل کی تفریق کے بغیر مل کر یہ تہوار مناتے ہیں۔

سولہ اکتوبر 2013ء کی اس تصویر میں بنگلہ دیشی مسلمان دارالحکومت ڈھاکا میں نماز عید ادا کرتے دکھائی دے رہے ہیں۔ دنیا بھر کے مسلمان اس عید کے موقع پر اُس اہم واقعے کی یاد تازہ کرتے ہیں، جب حضرت ابراہیم خدا کی راہ میں اپنے بیٹے حضرت اسماعیل کو قربان کرنے پر تیار ہو گئے تھے۔

بنگلہ دیش کے دارالحکومت ڈھاکا کی قومی مسجد میں سولہ اکتوبر 2013ء کو نماز عید کے بعد خواتین خشوع و خضوع کے ساتھ دعا مانگ رہی ہیں۔ عید الاضحیٰ مسلمانوں کے بڑے مذہبی تہواروں میں سے ایک ہے۔ اس دوران جانوروں کی قربانی کا سلسلہ کئی روز تک جاری رہتا ہے۔

پندرہ اکتوبر 2013ء کی اس تصویر میں افغان مسلمان دارالحکومت کابل میں عید الاضحیٰ کی نماز ادا کرتے دکھائی دے رہے ہیں۔ اس عید کے موقع پر بھی ملک میں ایک بار پھر امن و امان کے قیام کی دعائیں مانگی گئیں۔

مصری دارالحکومت قاہرہ کی عمرو بن العاص مسجد میں پندرہ اکتوبر منگل کے روز نماز عید ادا کی جا رہی ہے۔ یہ عید ’عید قرباں‘ بھی کہلاتی ہے اور اس موقع پر خدا کی راہ میں اونٹ، گائیں، بھیڑیں اور بکریاں قربان کی جاتی ہیں۔

پندرہ اکتوبر کو روسی مسلمانوں نے عید منائی۔ اس تصویر میں روسی دارالحکومت ماسکو میں نماز عید ادا کی جا رہی ہے۔ اس دوران روسی وزارتِ داخلہ کے ارکان پہرہ دے رہے ہیں۔ 2010ء کے ایک اندازے کے مطابق روس میں مسلمانوں کی تعداد 16.4 ملین تھی۔ یوں روسی آبادی میں مسلمانوں کا تناسب 11.7 فیصد بنتا ہے۔