فوجی ڈکٹیٹر اگوسٹو پنوشے کے بعد سے اب بھی شہر کی سڑکوں پر فوجی سپاہیوں کو دیکھ کر عام لوگ خوف زدہ ہو جاتے ہیں اور انہیں آمریت کا زمانہ یاد آ جاتا ہے۔ سنتیاگو کی سڑکوں پر بکتر بند فوجی گاڑیوں کا گشت بھی جاری ہے۔ شدید مظاہروں کے بعد ایک بڑی تعداد میں فوجیوں کی تعیناتی کی گئی ہے۔ یہ مظاہرے سنتیاگو سمیت کئی دوسرے شہروں میں بھی جاری ہیں۔ اس تصویر میں ایک شخص فوجیوں کے قریب ملکی جھنڈا لہرا رہا ہے۔

جنوبی امریکی ملک چلی کی معشیت خاصی مناسب اور بہتر حال میں ہے لیکن عوام کو شہری سہولتوں کی عدم دستیابی کا سامنا ہے۔ اس باعث بیزار اور پریشان عوام سڑکوں پر نکل آئے ہیں۔ حکومت نے گزشتہ کئی دنوں سے جاری مظاہروں کے دوران سینکڑوں افراد کو حراست میں لیا ہے۔

مظاہروں کا آغاز ٹرانسپورٹ کے کرایوں میں کیے جانے والے اضافے کا نتیجے میں ہوا۔ اس اضافے سے چلی میں نجی کاری کی حکومتی پالیسی کو سخت ٹھیس پہنچی ہے۔ ورکرز کی اجرتیں کم ہیں اور اعلیٰ عہدے داران کو بھاری تنخواہیں دی جاتی ہیں۔ تنخواہوں اور مالی مراعات میں تفریق سے عوام میں عدم اطمینان اور تفاوت بڑھتا جا رہا ہے۔

مظاہرے شروع ہونے کے بعد مشتعل مظاہرین نے میٹرو اسٹیشنوں، بسوں اور کاروباری مراکز کو آگ لگانا شروع کر دی۔ اس پرتشدد صورت حال کے تناظر میں ہنگامی حالت کا نفاذ کر دیا گیا اور فوج کی تعیناتی شروع کر دی گئی تا کہ مظاہرین کو کنٹرول کیا جا سکے۔ چلی کے کئی شہروں میں مظاہروں کے بعد کرفیو کا نفاذ بھی کر دیا گیا ہے۔

چلی کے صدر سیباستیان پینیئرا نے ٹرانسپورٹ کے کرایوں میں اضافے کا حالیہ حکومتی فیصلہ واپس لے لیا لیکن عوامی بےچینی میں کوئی کمی نہیں آئی۔ پرتشدد واقعات نے ملکی امن و سکون کو غارت کر دیا ہے اور اب بھی حالات میں بہتری دکھائی نہیں دے رہی۔ ہلاکتوں اور مظاہرین کو تحویل میں لینے کا سلسلہ بدستور جاری ہے۔

مظاہرین ایسے بینر اٹھائے ہوئے ہیں جن پر لکھا ہے ’حقیقت پسند ہونا ضروری ہے’ اور ’ کیا یہ ناممکن ہے‘۔ تجزیہ کاروں کے مطابق یہ بینر ملک میں پائی جانے والے معاشی تفریق و بے چینی کے ساتھ ساتھ عدم مساوات کا اشارہ دیتے ہیں۔ اب موجودہ حکومت کو معاشی پالیسیوں کو بہتر بنانے کی ضرورت ہے۔ اس کے علاوہ روزگار کی منڈی میں مالی ترغیبات کو متعارف کرانا ہو گا۔

یکم اکتوبر کو ہزاروں مظاہرین نے بغداد میں حکومت مخالف مظاہروں میں شرکت کی۔ ان کے مطالبات میں بدعنوانی کا خاتمہ، بے روزگاری میں کمی اور بہتر عوامی سہولیات کی فراہمی شامل تھے۔ مظاہرین نے شہر کے حکومتی عمارات اور غیرملکی سفارت خانوں والے گرین زون میں داخل ہونے کی کوشش بھی کی۔

پولیس نے مظاہرین کی گرین زون میں داخل ہونے کی کوشش کا جواب آنسو گیس، سڑکوں کی بندش اور ربڑ کی گولیوں اور لائیو فائرنگ سے دیا۔ مظاہرین نے التحریر اسکوائر چھوڑنے سے انکار کر دیا۔ اس دوران دو سو سے زائد مظاہرین زخمی اور ایک ہلاک ہو گیا۔ اسی دن عراق کے کئی دیگر شہروں میں بھی درجنوں افراد زخمی ہوئے اور ایک شخص مارا گیا۔

نئی عراقی حکومت کو اقتدار سنبھالے ابھی صرف ایک سال ہی ہوا ہے۔ ان مظاہروں کے بعد بغداد میں سکیورٹی بڑھا دی گئی اور عراقی صدر نے مظاہرین سے قانون کی پاسداری کرنے کی اپیل کی۔ دوسری جانب اقوام متحدہ کے اعلٰی اہلکاروں نے اس صورتحال پر ’گہری تشویش‘ ظاہر کی ہے۔

اس کے باوجود مظاہرین نے اپنا احتجاج جاری رکھا۔ دو اکتوبر کو بغداد کے پرانے حصے میں مظاہروں کا آغاز ہوا۔ پولیس مظاہرین سے نمٹنے کے لیے وہاں پہلے ہی موجود تھی اور نئے سرے سے فائرنگ کے واقعات بھی پیش آئے۔ شام تک مزید سات افراد ہلاک ہو چکے تھے اور دو دن میں ہی ہلاکتوں کی تعداد بڑھ کر نو ہو گئی۔

یہ احتجاجی مظاہرے بغداد سے ملک کے جنوبی حصوں تک پھیل رہے ہیں اور ساتھ ہی ساتھ فسادات کا سلسلہ بھی جاری ہے۔ کئی علاقوں میں مظاہرین نے سرکاری عمارات کو آگ بھی لگا دی۔ عراقی وزیر اعظم نے ان مظاہروں کا الزام ’جارحیت پسندوں‘ پر عائد کرتے ہوئے ایک ہنگامی قومی سکیورٹی اجلاس طلب کر لیا۔ کئی سیاستدان حکومت اور کئی دیگر مظاہرین کو مورد الزام ٹھہرا رہے ہیں۔

ابھی تک ملک کے کئی حصوں میں جاری احتجاج کے نتیجے میں کم از کم 44 افراد ہلاک ہو چکے ہیں۔ جنوبی شہر ناصریہ میں اب تک 18 اور بغداد میں 16 افراد ہلاک ہو چکے ہیں۔ زخمی ہونے والوں کی تعداد بھی سینکڑوں میں ہے۔ عراق کے اعلیٰ شیعہ رہنما سید علی حسینی سیستانی نے فریقین سے پرامن رہنے کی اپیل کی ہے۔

قطر کی وزارت خارجہ نے اپنے شہریوں سے اپیل کی ہے کہ وہ فی الحال عراق کا سفر کرنے سے گریز کریں۔ خلیجی ملک بحرین نے بھی اسی طرح کا ایک انتباہی پیغام جاری کیا ہے۔ ایران نے بھی اپنے شہریوں کو عراق جانے سے روک دیا ہے۔ بغداد حکومت نے بھی سرحدوں کی نگرانی سخت بنانے کے احکامات جاری کر دیے ہیں۔

ایران کے ایک سینئر اہلکار اور سیاستدان محمد امامی کاشانی نے بدامنی کے ان واقعات کا الزام اسرائیل اور امریکا پر عائد کیا ہے۔ ان کا کہنا تھا کہ یہ ممالک نہیں چاہتے کہ عراق میں رواں ماہ کے اواخر میں کربلا کا اجتماع پرامن طریقے سے ہو۔ ایران ماضی میں بھی ایسے ہی الزامات عائد کرتا آیا ہے۔

عراقی حکومت نے بغداد کے ساتھ ساتھ تین دیگر جنوبی شہروں میں بھی غیرمعینہ مدت کے لیے کرفیو نافذ کر دیا ہے۔ دوسری جانب ملک بھر میں مظاہرے پھیلتے جا رہے ہیں۔ دارالحکومت کے نواح میں ہوائی اڈے کے قریب بھی مظاہرے جاری ہیں۔ عراق اور ایران کی سرحد بھی بند کر دی گئی ہے۔