برلن کے اس جو‌‌ڑے نے اپنی گاڑی کو ہر اس ملک کے جھنڈے اور وہاں بولی جانی والی زبانوں میں لکھی عبارتوں اور اشعار سے سجا رکھا ہے، جس کا انہوں نے سفر کیا۔ یوں یہ گاڑی دیکھنے والوں کے لیے دلچسپی کا باعث ہے۔

جرمنی سے براستہ پولینڈ، روس، ایران اور وسطی ایشیا سے ہوتا ہوا یہ جرمن جوڑا خنجراب پاس کے ذریعے چین سے پاکستان میں داخل ہوا۔

شمالی علاقہ جات کے بلند و بالا برفیلے پہاڑ اور دلکش مناظر اس جرمن جوڑے کو کئی مرتبہ پاکستان کے سفر پر مائل کر چکے ہیں۔

شاہراہ قراقرم کے بل کھاتے راستوں پر برلن کے اس جوڑے کا یہ پہلا سفر نہیں تھا لیکن اوٹے اور آندریاز کے لیے اس شاہراہ کا ہر سفر یاد گار اور تاریخی ہے۔

اس سفر میں کئی مشکل مقامات گزرے لیکن کوئی خطرہ ان کے شوق کی راہ میں حائل نہیں ہو سکا۔

سلک روڈ پر کریم آباد کی طرف جاتے ہوئے یوں تو کئی دل موہ لینے والے مقامات آئے۔ لیکن اوٹے کے بقول اس جگہ کی خوبصورتی کی بات الگ ہی تھی۔

لینڈ سلائڈنگ کے بعد وجود میں آنے والی عطا آباد جھیل کو پار کرنے کے لیے انہیں اپنی جیپ کشتی کے ذریعے دوسرے کنارے لے جانا تھی۔ آندریاز اور اوٹے کے لیے یہ ایک انوکھا تجربہ تھا۔

برلن کے اس سیاح جوڑے کا کہنا ہے کہ عطا آباد جھیل پار کرنے میں جس طرح مقامی لوگوں نے ان کی مدد اور رہنمائی کی، وہ ان کے لیے ناقابل فراموش ہے۔

یہ جوڑا سرگودھا کے قریب ایک گاؤں میں واقع کائفا اسکول کی مالی طور پر سرپرستی بھی کر رہا ہے۔ اس اسکول میں 70 فیصد مسلمان اور 30 فیصد مسیحی بچے زیر تعلیم ہیں۔

اس اسکول میں طالبات کو پڑھائی کے ساتھ ساتھ سلائی کڑھائی کا ہنر بھی سکھایا جاتا ہے۔ آندریاز اور اوٹے کی رائے میں یہ ہنر مقامی خواتین کو خود کفیل بنا سکتا ہے۔

کچھ روز قبل مارٹن کوبلر نے اپنے ٹوئٹر اکاؤنٹ پر راولپنڈی شہر کے ایک بازار کی تصاویر شیئر کیں جہاں سے وہ پاکستان میں بنی ہوئی ایک سائیکل خریدنا چاہتے تھے۔ کوبلر کے مطابق انہیں بازار میں زیادہ تر ایسی سائیکل ملیں جو پاکستان سے باہر تیار کی گئی تھیں۔

کچھ دیر ڈھونڈنے کے بعد انہیں بالآخر پاکستان میں تیار کردہ پیکو کمپنی کی سائیکل مل ہی گئی۔ کوبلر نے اپنے لیے لال رنگ کی ایک سائیکل پسند کی۔ خیال رہے کہ پیکو کے علاوہ پاکستان میں سہراب نامی کمپنی بھی سائیکل تیار کرتی ہے۔

ان تصاویر کے ساتھ جرمن سفیر نے ٹوئیٹ کیا، ’’اُف، انتخاب کے حوالے سے کیا مشکل دن تھا، پاکستان میں تیار کر دہ سائیکل لینا چاہی، پہلے تو یہ تلاش کرنا مشکل تھی۔ تمام غیر ملکی تیار شدہ!! پھر آخرکار راولپنڈی میں مل گئی۔ پھر یہ فیصلہ مشکل ہو گیا کہ سہراب لی جائے یا پیکو؟ آخرمیں، یہ سرخ رنگ والی خرید لی۔ جس پہ گھنٹی بھی ہے۔ آپ لوگوں کو کیسی لگی؟‘‘

مارٹن کوبلر کی ٹوئیٹس کا سلسلہ یہیں ختم نہیں ہوا۔ اب وہ اپنی سائیکل کو مزید پاکستانی بنانے کی خواہش رکھتے تھے۔مارٹن کوبلر نے اپنی ٹوئیٹ میں لکھا، ’’میں اپنی روزمرہ زندگی میں مقامی پاکستانی رنگ چاہتا تھا۔ لہٰذا اپنی نئی پاکستانی سائیکل حاجی پرویز صاحب کے پاس لے گیا۔ وہ رنگوں کے ساتھ کھیلنا جانتے ہیں۔ دیکھتے ہیں کیسی آرٹ میری سائیکل پر سجتی ہے۔‘‘ اب اس کا بےصبری سے انتظار ہے۔‘‘

وہ اپنی سائیکل کو ٹرک آرٹسٹ حاجی پرویز کے پاس لے گئے۔ حاجی پرویز نے ان کی سائیکل کو شاندار رنگوں سے بھر دیا۔ جرمن سفیر نے اپنی نئی خوبصورت سائیکل کی تصویر کے ساتھ ٹوئٹر پہ لکھا، ’’میری پاکستانی سائیکل کمال کے ٹرک آرٹ کے ساتھ تیار ہے۔ پنڈی کی گلیوں میں کچھ دیر چلائی بھی۔ مزہ آیا! اگر آپ گھنٹی کے بارے میں سوچ رہے ہیں، تو وہ بھی کام کرتی ہے۔بتائیں، رنگوں کے بارے میں آپ کا کیا خیال ہے؟‘‘

اس خوبصورت مصوری کو کئی لوگوں نے سراہا۔ ٹوئٹر پر مارٹن کوبلر کے قریب پونے دو لاکھ فالورز ہیں۔ انہی میں سے ایک نصیر عباسی نے لکھا،’’ بہت ہی کمال لگ رہی ہے آپ کی پاکستان کے لیے ہر کاوش ہم پر قرض ہے ہم آپ کے ممنون ہیں کے آپ ہمیں مثبت راہ پر چلنے کی حوصلہ افزائی کرتے ہیں۔‘‘

ایک اور فالوئر مدثر اعوان نے لکھا، ’’سائکل باکمال ہے لیکن آپ کی پاکستان کے بارے میں مثبت سوچ اور عمل واقعی شاندار ہے۔‘‘