سابق سیاسی قیدی محمد نشید پر الزام عائد کیا گیا تھا کہ انہوں نے 2012ء میں بطور صدر چیف جج کی برطرفی اور گرفتاری کے احکامات جاری کیے تھے۔ اگرچہ ایک ماہ قبل ان پر عائد یہ الزامات خارج کر دیے گئے تھے لیکن بعد ازاں ملک کے انسداد دہشت گردی کے سخت قوانین کے تحت انہیں دوبارہ گرفتار کر لیا گیا تھا۔ 47 سالہ نشید کے وکلاء اس عدالتی کارروائی کے دوران ہی عدالتی کارروائی سے الگ ہو گئے تھے کیونکہ ان کا کہنا تھا کہ عدالت نے پہلے سے ہی فیصلہ کر لیا ہے کہ نشید کا سیاسی کیریئر تباہ کر دیا جائے۔

سن 2008 میں صدر کے عہدے پر براجمان ہونے والے نشید نے بھی کہا ہے کہ ان کو سنائی گئی یہ سزا سیاسی محرکات پر مبنی ہے۔ ان کے وکلاء نے کہا ہے کہ وہ اس سزا کے خلاف اپیل کریں گے۔ ادھر امریکا، برطانیہ اور بھارت نے اس عدالتی فیصلے پر تحفظات کا اظہار کیا ہے۔ تجزیہ کاروں کے مطابق صدر عبداللہ یامین کی کوشش ہے کہ محمد نشید 2018ء کے صدارتی انتخابات میں حصہ نہ لے سکیں۔

محمد نشید نے اپنے حامیوں سے کہا ہے کہ وہ اس عدالتی فیصلے کو منظور کرنے سے انکار کرتے ہوئے احتجاج کا سلسلہ شروع کر دیں۔ ان کی سیاسی پارٹی (مالدیوَین ڈیموکریٹک پارٹی) کی طرف سے جاری کیے گئے بیان میں مزید کہا گیا ہے، ’’میں (تمام عوام سے) اپیل کرتا ہوں کہ اس خاص موقع پر آپ متحد اور پرامید رہیں اور اس آمرانہ حکومت کے خلاف اٹھ کھڑے ہوں۔‘‘ اسی دوران آج بروز ہفتہ دارالحکومت مالے سے مظاہروں کی اطلاعات موصول ہوئی ہیں۔

بھارت کے وزیر اعظم نریندر مودی نے ہمسایہ ملک مالدیپ میں ہونے والی اس پیشرفت پر تحفظات کا اظہار کرتے ہوئے کہا ہے کہ ان کی حکومت مالدیپ میں ہونے والی تبدیلیوں پر نظر رکھے ہوئے ہے۔ یہ امر اہم ہے کہ مودی نے مالدیپ میں بد امنی کی وجہ سے وہاں کا اپنا طے شدہ دورہ منسوخ کردیا تھا۔

ادھر امریکا اور برطانیہ نے بھی نشید کو سزا سنائے جانے پر تحفظات کا اظہار کیا ہے۔ امریکی اسٹیٹ ڈیپارٹمنٹ کی ترجمان جین ساکی نے کہا ہے کہ واشنگٹن حکومت امید کرتی ہے کہ مالے حکومت دوران حراست محمد نشید کا خیال رکھے گی۔ انہوں نے مزید کہا کہ اس موقع پر مالدیپ کے عوام کو بھی پر امن طریقے سے اپنے جذبات و احساسات کا اظہار کرنا چاہیے۔

ایمنسٹی انٹرنیشنل نے کہا ہے کہ نشید کے خلاف چلائے جانے والے مقدمے میں کئی خرابیاں تھیں، اس ادارے نے اس عدالتی فیصلے پر بھی تنقید کی ہے۔ تاہم مالے حکومت نے کہا ہے کہ محمد نشید کی سنائی گئی سزا سیاسی محرکات پر مبنی نہیں ہے۔