ٹمبکٹو کی نادر تحریریں تاریخی اعتبار سے انتہائی اہمیت کی حامل ہیں۔ یہ کئی سو سال کی اسلامی تحقیق کا نچوڑ ہیں۔ اُس دور میں ٹمبکٹو افریقہ میں اسلامی اور قرآنی تعلیمات کا مرکز ہوا کرتا تھا۔

2012ء میں مسلمان شدت پسندوں نے جب شمالی مالی میں حملے شروع کیے تو اس دوران بہت سے تاریخی مقامات کو تباہ کر دیا گیا اور اس موقع پر مالی کے کچھ باسیوں نے ان تاریخی دستاویزات کی اہمیت کو سمجھتے ہوئے انہیں ٹمبکٹو سے اسمگل کر کے ملکی دارالحکومت بماکو پہنچا دیا تھا۔ یہاں ان تاریخی دستاویزات کو چھانٹے بغیر دھات کے ڈبوں میں رکھا گیا ہے۔ اب انہیں محفوظ بنانے اور ڈیجیٹلائز کرنے کا انتظار کیا جا رہا ہے۔

عبدالقادر حیدرہ نے ان تحریروں کو محفوظ کرنے کا ذمہ اپنے سر لیا ہوا ہے۔ وہ ایک خاندانی کتب خانہ چلاتے ہیں اور وہ اپنی دستاویزات کے ساتھ ساتھ ٹمبکٹو کی ان تحریروں کو بھی بچانا چاہتے ہیں، جو تباہی کے خطرے سے دوچار ہیں۔

ان تاریخی دستاویزات کو ڈیجیٹلائز کرنے کے دو مقاصد ہیں۔ ایک تو اگر کسی وجہ سے اصل تحریروں کو کوئی نقصان پہنچتا ہے تو اُن کی ڈیجیٹل کاپیاں موجود ہوں اور دوسرے یہ کہ جو بھی چاہے، اِن دستاویزات تک رسائی حاصل کر سکے۔ اِن دستاویزات کو اُن کی اصل حالت میں محفوظ رکھنے کے حوالے سے ابھی تک کوئی منصوبہ نہیں بنایا گیا ہے۔

ڈیجیٹلائزیشن کے بعد ان دستاویزات کو تیزابیت سے پاک ڈبوں میں منتقل کر کے رکھا جائے گا۔ ان میں سے ہر تحریر مختلف نوعیت کی ہے اور ان کے سائز بھی ایک دوسرے سے جدا ہیں۔ اس وجہ سے انہیں رکھنے کے لیے ہاتھ سے خصوصی ڈبے تیار کرنا ہوں گے۔

کوئی بھی کتاب ٹمبکٹو کے ماما حیدرا میموریل کتب خانے میں موجود نہیں ہے۔ یہ امر بھی ابھی تک غیر واضح ہے کہ آیا یہ تاریخی دستاویزات دوبارہ کبھی اس لائبریری کی زینت بنیں گی یا نہیں۔ زیادہ تر لوگوں کا خیال ہے کہ یہ نادر نمونے بماکو میں زیادہ محفوظ ہیں جبکہ کچھ کا خیال ہے کہ ان کے بغیر ٹمبکٹوکی ساکھ متاثر ہو گی۔

احمد بابا نامی ادارہ آغا خان ٹرسٹ کے علاوہ جنوبی افریقہ اور سعودی عرب کے مالی تعاون سے تعمیر کیا گیا ہے۔ اس میں صرف ایک لائبیری اور آرکائیو ہی نہیں ہے بلکہ اس میں ایسے جدید آلات بھی نصب ہیں، جن کی مدد سے دستاویزات کو ڈیجیٹلائز اور محفوظ بنایا جا سکتا ہے۔ تاہم یہ ادارہ ویران ہے اور خستہ حال ہو چکا ہے۔

اسلام پسندوں نے یونیسکو اور مغربی ممالک کے سامنے اپنی طاقت کا مظاہرہ کرنے کی خاطر ٹمبکٹو میں چند تاریخی نمونوں کو جمع کر کے احمد بابا انسٹیٹیوٹ میں نذر آتش کر دیا تھا۔ اس دوران چار ہزار سے زائد تحریریں جل کر راکھ ہو گئی تھیں۔ یہ آج بھی اسے ادارے میں موجود ہیں، مگر خاک کی صورت میں۔

بیسویں صدی میں اپنی اقتصادی اہمیت کھونے کے بعد صرف سیاحت ہی ٹمبکٹو کے لوگوں کا واحد ذریعہ معاش تھا۔ 2012ء میں شروع ہونے والے تنازعہ کے بعد سیاحوں نے بھی اس شہر کا رخ کرنا چھوڑ دیا ہے۔

مالی کی سیاسی صورتحال کشیدہ ہے اور ملکی فوج اس قدر کمزور ہے کہ وہ مستقل بنیادوں پر سلامتی کی صورتحال کو قابو میں نہیں رکھ سکتی۔ 2012ء میں ٹمبکٹو کے اکثر باسی نقل مکانی کر گئے تھے اور وہ آج تک واپس نہیں لوٹے ہیں کیونکہ انہیں حالات پر بھروسہ نہیں ہے۔