خبر رساں ادارے ایسوسی ایٹڈ پریس نے آج جمعہ کے روز مالی کے شہر حمبوری کے رہائشیوں کے حوالے سے بتایا ہے کہ مالی کے فوجی گزشتہ رات حمبوری پہنچے ہیں۔ اطلاعات کے مطابق مالی کو فوجیں اسلام پسندوں کے گڑھ ’گاؤ‘ سے صرف 250 کلو میٹر دور ہیں۔

گاؤ مالی کے ان تین شہروں میں سے ایک ہے جو گزشتہ اپریل سے اسلامی عسکریت پسندوں کے قبضے میں ہے اور مالی کی سرکاری فوجیں فرانس اور دیگر افریقی ممالک کے فوجیوں کی مدد سے شدت پسندوں کے زیر قبضہ ملک کے شمالی حصے کا دوبارہ کنٹرول حاصل کرنے کی کوشش کر رہی ہیں۔

اسلام پسند جنگجو وسطی مالی کے کئی شہروں پر قبضے کے بعد پیچھے ہٹ گئے ہیں تاہم ابھی بھی ملک کے شمالی شہروں پر قابض ہیں۔ دوسری طرف مالی کے فوجی ذرائع نے بتایا ہے کہ اسلامی شدت پسندوں کے ٹھکانوں پر فرانسیسی طیاروں کی بمباری کے بعد پہلی مرتبہ مالی اور فرانس کے فوجیوں نے ملک کے مشرقی حصے میں مشترکہ گشت کیا ہے۔ فرانسیسی طیاروں نے گزشتہ جمعرات کو اسلام پسندوں کے زیر قبضہ شہر گاؤ کے نواح میں ان کے دو اہم ٹھکانے بممباری کر کے تباہ کر دیے تھے۔

اسلامی شدت پسندوں کے زیر اثر علاقوں پر کنٹرول کے لیے اقوام متحدہ کی چھتری تلے دو ہزار سے زائد چاڈ اور پانچ سو کے قریب نائیجر کے فوجیوں کو اسلامی شدت پسندوں کے خلاف دوسرا محاذ کھولنے کے لیے مالی کے قریب نائیجر کی سرحد پر تعینات کیا جا رہا ہے۔

دوسری طرف اسلامی عسکریت پسندوں نے نائیجر کو گاؤ شہر سے ملانے والے اسٹریٹیجک اہمیت کے پل کو دھماکہ خیز مواد کی مدد سے اڑا دیا ہے۔ خبر رساں ادارے اے ایف پی نے ایک ٹرانسپورٹر کے حوالے سے بتایا کہ اب نائیجر سے گاؤ آنے جانے کا راستہ بند ہو گیا ہے۔

مالی کا شہر گاؤ گزشتہ نو ماہ سے افریقہ میں القاعدہ کے زیر اثر عسکریت پسندوں کے قبضے میں ہے جہاں شدت پسندوں نے سخت اسلامی قوانین کا نفاذ کیا ہے۔

rh / ab (AFP, AP)