مایورکا کی ساحلی پٹی کم از کم پانچ سو کلومیٹر طویل ہے۔ یہ علاقہ متعدد چھوٹے چھوٹے جزائر پر مشتمل ہے۔ یہ کالا فورمینتور کی تصویر ہے، یہاں خزاں تک موسم گرم ہی رہتا ہے۔ اس وجہ سے یہ سیاحوں کے پسندیدہ مقامات میں سے ایک ہے۔ مایورکا کے جزیرے پر ہر معاشی طبقے سے تعلق رکھنے والے سیاحوں کے لیے رہائش دستیاب ہے۔

1833ء میں بارسلونا سے مایورکا کے مابین فیری سروس شروع ہوئی۔ اس وقت کم ہی لوگ اس جزیرے پر جاتے تھے۔ مصنف جارج سینڈ اور پیانو نواز فریڈیرک شوپیں نے 1838-39 کا موسم سرما والڈیموسا کے ایک راہب خانے میں گزارا۔ یہ تصویر اسی پہاڑی گاؤں کی ہے۔ یہاں قیام کے دوران جارج سینڈ نے ایک ناول بھی لکھا، جس میں اس جزیرے کا تفصیلی ذکر ہے۔ اس کے شائع ہونے کے بعد بڑی تعداد میں سیاحوں نے مایورکا کا رخ کرنا شروع کیا۔

بیسویں صدی کے آغاز پر یہاں زیادہ تر سیاح ہسپانوی علاقوں اور برطانیہ سے آتے تھے۔ وہ یہاں فطرت اور رومان تلاش کرتے تھے۔ مایورکا کے کئی ساحل آج بھی مکمل طور پر اپنی اصل حالت میں ہیں، یعنی وہاں کوئی تعمیرات نہیں کی گئیں۔ 1935ء میں یہاں آنے والے سیاحوں کی تعداد پچاس ہزار تھی، 1950ء میں ایک لاکھ جبکہ 1960ء میں دس لاکھ سیاحوں نے اس جزیرے کا رخ کیا تھا۔

1960ء کی دہائی میں سیاحت کا رجحان بہت تیزی سے بڑھا۔ ساحلوں کے قریب بڑے بڑے ہوٹل تعمیر کیے گئے اور بڑی بڑی سیاحتی کمپنیوں نے ان میں سرمایہ کاری کی۔ جرمن شہریوں کو چھٹیاں گزارنے کے لیے ایسے مقامات کی تلاش تھی، جو سستے بھی ہوں اور جہاں کسی قسم کی پریشانی کا سامنا بھی نہ کرنا پڑے۔ مایورکا کے ہسپانوی جزیرے پر انہیں یہ سب کچھ میسر آ گیا۔

پالما مایورکا کا صدر مقام ہے۔ تصویر میں موجود یہ 400 سال پرانا کلیسا اس شہر کی پہچان ہے اور سب سے زیادہ سیاح اسی کو دیکھنے آتے ہیں۔ کورونا سے قبل یہاں کے چار لاکھ باسی سیاحوں کی بڑی تعداد سے پریشان تھے اور خاص طور پر سیاحوں سے بھرے ہوئے ان دیو ہیکل تفریحی بحری جہازوں سے، جو اس شہر کی بندرگاہ پر لنگر انداز ہوتے تھے۔ 2019ء میں ستر لاکھ غیر ملکی سیاحوں نے مایورکا میں کم از کم ایک رات گزاری تھی۔

پر خطر کھیلوں اور چیلنجز کو پسند کرنے والے ترامنتانا کے پہاڑی سلسلے کا رخ کرتے ہیں۔ یہاں پر چند چوٹیوں کی اونچائی ایک ہزار میٹر تک ہے، جو اس جزیرے کے شمال سے مغربی حصے تک پھیلی ہوئی ہیں۔ ان پہاڑوں پر سائیکل سواروں اور پیدل چلنے والوں کے لیے حیرت انگیز راستے موجود ہیں۔

پانی سے مایورکا کو تسخیر کرنا ایک انتہائی منفرد تجربہ ہے۔ جو لوگ کوئی پرتعیش کشتی کرائے پر نہیں لے سکتے، وہ کم از کم کالا فیگوئیرا کی یہ بندرگاہ یا پورٹ سولیئر گھوم پھر سکتے ہیں۔ ماضی میں مایورکوئن کے پہاڑوں میں اگائے جانے والے سنگترے اسی بندرگاہ کے راستے بحری جہازوں پر فرانس بھیجے جاتے تھے۔

سیاحوں کے رش، شور شرابے اور بھرے ہوئے ساحلوں سے دور بھاگنے والے افراد ’فِنکا‘ کرائے پر لے سکتے ہیں۔ ’فِنکا‘ دور دراز کے علاقوں میں بنی دیہی قیام گاہوں کو کہتے ہیں۔ مایورکا پر بنائی گئی ’فِنکاز‘ میں تمام تر سہولیات موجود ہوتی ہیں۔ مایورکا پر ہر کسی کے لیے تفریح کا سامان موجود ہے کیونکہ ہر سال جو چالیس لاکھ جرمن سیاح چھٹیاں گزارنے کے لیے اس جزیرے کا رخ کرتے ہیں، وہ بہرحال کوئی غلطی تو نہیں کرتے!

اسپین کے شہر بارسلونا کی سڑکوں پر ہزاروں شہریوں نے وہاں آنے والے سیاحوں کی بڑی تعداد اور اس کے شہر پر اثرات کے خلاف احتجاج کیا ہے۔ اسپین میں سیاح سب سے زیادہ بارسلونا کا ہی رخ کرتے ہیں، جہاں حال ہی میں تقریباﹰ 2,800 شہریوں نے احتجاج کیا اور یہ نعرہ لگاتے نظر آئے کہ "سیاحو، واپس جاؤ۔ یہاں تمہیں خوش آمدید نہیں کہا جا رہا۔"

اسپین میں بڑھتی سیاحت کے حوالے سے مقامی افراد میں غصہ بڑھ رہا ہے۔ ان کا مطالبہ ہے کہ سیاحت پر پابندیاں لگائی جائیں، جس کے باعث پراپرٹی کی قیمتیں بڑھی ہیں، ماحولیاتی آلودگی میں اضافہ ہوا ہے، سڑکوں پر ٹریفک بھی بری طرح متاثر ہو رہی ہے اور پانی کی قلت کا بھی سامنا ہے۔ بڑے پیمانے پر سیاحت کی وجہ سے صحت کے نظام پر بھی دباؤ پڑ رہا ہے۔

سیاحوں میں اس وقت بارسلونا پہلے سے کہیں زیادہ مقبول ہے اور وہاں ان کے رہنے کے لیے متعدد اپارٹمنٹس کو 'وکیشن ہومز' میں تبدیل کر دیا گیا ہے۔ خبر رساں ادارے ڈی پی اے کے مطابق اس پس منظر میں بارسلونا میں پچھلی ایک دہائی کے عرصے میں گھروں کے کرایوں میں 68 فیصد اضافہ ہوا ہے۔

بارسلونا میں حکام نے گھروں کی کمی کے حوالے سے اقدامات کرنے کا اعلان کیا ہے۔ چند ہفتے پہلے وہاں کی سٹی کونسل نے اعلان کیا تھا کہ 2028ء سے سیاحوں کو اپارٹمنٹس کرایے پر دینے کی اجازت نہیں دی جائے گی اور 10,000 سے زائد مقامی افراد کو رہائش کے لیے اپارٹمنٹس دیے جائیں گے۔ تاہم اپارٹمنٹس کے مالکان کا کہنا ہے کہ وہ اس فیصلے کو قانونی طور پر چیلنج کریں گے۔

سیاحت کے حوالے سے مظاہرے اسپین کے دیگر شہروں میں بھی دیکھے گئے۔ اندلس میں ہزاروں شہریوں نے سڑکوں پر احتجاج کیا اور ملاگا میں بھی تقریباﹰ 25,000 مظاہرین سراپا احتجاج نظر آئے۔

ملاگا میں قانونی طور پر رجسٹرڈ وکیشن ہومز کی تعداد 12,000، ہے جو میڈرڈ اور بارسلونا میں موجود وکیشن ہومز کے بعد تیسرے نمبر پر ہے۔ ساتھ ہی وہاں سیاحوں کے ٹھہرنے کی کئی جگہیں غیر قانونی طور پر بھی چلائی جا رہی ہیں۔

اسپین کے شہر کیڈیز میں بھی شہریوں نے بڑھتی سیاحت کے خلاف احتجاج کیا ہے۔ ان میں سے ایک نے خبر رساں ادارے اے ایف پی سے گفتگو کے دوران تبصرہ کیا، "یہ شہر ایک امیوزمنٹ پارک بن چکا ہے۔" یہاں کے ساحل پر ہر سال کئی کروز شپس بھی نظر آتی ہیں۔

مایورکا میں شہریوں نے شراب نوشی کرنے والے سیاحوں کی موجودگی پر بھی برہمی کا اظہار کیا ہے۔ یہاں سڑکوں پر نکلے مظاہرین نے ایک بینر اٹھا رکھا تھا، جس پر لکھا تھا، "مایورکا برائے فروخت نہیں ہے"۔

ہسپانوی ادارے 'اسپینش اسٹیٹسٹکس انسٹیٹیوٹ' کے مطابق پچھلے سال 85 ملین سے زیادہ سیاحوں نے اسپین کا رخ کیا تھا، جو کہ اب تک وہاں آنے والے سیاحوں کی سالانہ سب سے بڑی تعداد تھی۔ ماہرین کا اندازہ ہے کہ اس سال اس تعداد میں اضافہ ہو گا۔