امريکی صدر باراک اوباما نے اقوام متحدہ کی جنرل اسمبلی سے خطاب کرتے ہوئے کہا کہ ايٹمی ہتھياروں سے ليس ايران اسرائيل کے وجود، خليج کے ممالک اور عالمی معيشت کے ليے ايک خطرہ ہو گا اور اس سے علاقے ميں ايٹمی اسلحے کی دوڑ شروع ہو جائے گی۔ اوباما نے کہا کہ وہ اس تنازعے کے سفارتی حل کی کوششيں جاری رکھنا چاہتے ہيں ليکن ايران سے بات چيت کے ليے وقت لا محدود نہيں ہے: ’’امريکا ايران کو ايٹمی اسلحہ حاصل کرنے سے روکنے کے ليے وہ کچھ کرے گا، جو اُسے کرنا پڑے گا۔‘

اگرچہ امريکی صدر نے براہ راست فوجی حملے کی بات نہيں کی ليکن اُن کے الفاظ ميں فوجی طاقت کے استعمال کی دھمکی کو چھپايا نہيں گيا ہے۔

صدر اوباما نے اپنی آدھے گھنٹے کی تقريرکا ايک بڑا حصہ عرب ممالک ميں آنے والی تبديليوں اور دنيائے اسلام ميں پيغمبر اسلام کے بارے میں گستاخانہ فلم کے خلاف احتجاجات پر صرف کيا۔ انہوں نے ليبيا ميں امريکی سفير کے قتل کو امريکا پر حملہ قرار ديا۔ اوباما نے شام میں اسد حکومت کے خلاف سخت اقدامات اور پابنديوں کا مطالبہ بھی کيا۔

اس سے پہلے اقوام متحدہ کے سیکرٹری جنرل بان کی مون نے جنرل اسمبلی کا افتتاح کرتے ہوئے عالمی صورتحال پر اپنی پريشانی کا غير معمولی طور پر کھلے الفاظ ميں اظہار کيا: ’عالمی کنبہ جس طرف جا رہا ہے، مجھے اس سال اُس پر خطرے کی گھنٹی بجانا پڑ رہی ہے۔‘

بان کی مون نے دنيا بھر ميں اسلحے پر خرچ کی جانے والی رقوم اور عالمی آب و ہوا کی تبديلی کو خاص طور پر باعث فکر قرار ديا۔ انہوں نے شام کی خانہ جنگی پر گہری تشويش ظاہر کرتے ہوئے کہا کہ يہ بحران صرف شام تک محدود نہيں بلکہ يہ ايک علاقائی مصيبت ہے، جس کے اثرات عالمی سطح کے ہيں۔

فرانسيسی صدر فرانسوا اولانڈ نے شامی اپوزيشن کی ايک عبوری حکومت کی تجويز پيش کرتے ہوئے کہا کہ فرانس اُسے فوراً تسليم کرلے گا۔ انہوں نے سلامتی کونسل کے رکن ممالک کی تعداد ميں اضافے کی بھی حمايت کی تاکہ کونسل آج کی دنيا کے حالات کی بہتر نمائندہ ثابت ہو۔

فرانس سلامتی کونسل کے پانچ مستقل اراکين ميں شامل ہے۔ اس ادارے کے رکن ممالک کی تعداد ميں اضافے پر پچھلے کئی عشروں سے بحث جاری ہے ليکن ويٹو کی طاقت رکھنے والے پانچ ممالک اس کے نتيجے ميں اپنی طاقتور پوزيشن کے ليے خطرہ محسوس کرتے ہوئے اس کی مخالفت کر رہے ہيں۔

T. Schmidt, sas / C. Hennen, mm