پاکستان کے سرکاری ٹیلی وژن کے مطابق سربراہ حکومت کے لیے صدر آصف علی زرداری کے نامزد کردہ امیدوار مخدوم شہاب الدین آج کاغذات نامزدگی جمع کرائیں گے۔ قومی اسمبلی سیکرٹریٹ کی جانب سے جاری کیے گئے اعلامیے کے مطابق وزارت عظمیٰ کے امیدوار جمعرات کی سہ پہر تین بجے تک کاغذات نامزدگی اسپیکر قومی اسمبلی کے پاس جمع کرا سکتے ہیں۔

مخدوم شہاب کے پاس اس وقت ٹیکسٹائل صنعت سے متعلق وزارت کا قلمدان ہے۔ پاکستان ٹیلی وژن پر نشر کی جانے والی خبر کے مطابق ’’پاکستان پیپلز پارٹی کے شریک چیئرمین اور سربراہ مملکت آصف علی زرداری نے مخدوم شہاب الدین کو وزات عظمیٰ کے لیے نامزد کیا ہے اور راجہ پرویز اشرف متبادل امیدوار ہوں گے‘‘۔ اس سے قبل صدر زرداری نے پہلے ہی جمعے کے روز وزیر اعظم کے انتخاب کے لیے قومی اسملبی کا اجلاس طلب کیا ہے۔

صدرِ مملکت نے نئے وزیراعظم کے لیے حکومت کی اتحادی جماعتوں کے ساتھ طویل مشاورت کی۔ عدالت کی جانب سے نا اہل قرار دیے جانے والے وزیراعظم یوسف رضا گیلانی 2008ء کے انتخابات کے بعد اس منصب پر فائز ہوئے تھے۔ عدالت نے انہیں حکم دیا تھا کہ وہ سوئس حکام کو صدر زرداری کے خلاف بدعنوانی کے مقدمات دوبارہ سے کھولنے کے لیے خط لکھیں۔ تاہم حکم نہ ماننے کے جرم میں انہیں توہین عدالت کا مرتکب ٹھراتے ہوئے نا اہل قرار دے دیا گیا۔ امریکا نے پاکستان کے موجودہ سیاسی بحران کے تناظر میں کہا کہ وزیر اعظم یوسف رضا گیلانی کو سپریم کورٹ کی طرف سے نااہل قرار دیے جانے پر پیدا ہونے والے بحران کو حکومت ملکی قوانین اور آئینی تقاضوں کےتحت شفاف طریقےسے حل کرے۔

ماہرین کا کہنا ہےکہ منتخب ہونے کے ساتھ ہی نئے وزیراعظم پر بھی سوئس حکام کو خط لکھنے کے حوالے سے دباؤ موجود ہو گا۔ خبر رساں ادارے اے ایف پی کی ایک رپورٹ کے مطابق ’’ صدر زرداری پنجاب سے کسی ایسے وفادار شخص کو اس عہدے کے لیے نامزد کریں گے، جو سوئس حکام کو خط نہ لکھنے کے معاملے میں ان کا بھرپور حمایتی ہو‘‘۔ پاکستان پیپلز پارٹی کے کارکن سپریم کورٹ پر الزام عائد کر رہے ہیں کہ وہ فوج اور اپوزیشن کے ساتھ مل کر حکومت کو وقت سے پہلے ختم کرنا چاہتی ہے۔

(ai/sks(AFP