مرسیڈیز نے جرمن شہر اشٹٹ گارٹ میں دنیا کے جدید ترین کار پلانٹ کا افتتاح ستمبر کے آغاز میں کیا۔ اس پر 730 ملین یورو کی لاگت آئی ہے۔ بینز فیکٹری میں ہال ‘‘No. 56’’ کی تیاری میں جتنا لوہا لگا، اس سے ایک اور آئیفل ٹاور کھڑا کیا جا سکتا ہے۔ دو لاکھ 20 ہزار مربع میٹر کے رقبے پر مشتمل اس ہال میں نیا پلانٹ لگایا گیا ہے۔

اس فیکٹری نے ریاست باڈن ورٹمبرگ کے وزیراعظم ونفریڈ کریشمان کو بھی حیران کر دیا جو اس پلانٹ کی افتتاحی تقریب میں شریک ہوئے۔ اس فیکٹری کا 40 فیصد حصہ باغیچوں اور پھولوں سے بھرا ہوا ہے۔ اس فیکٹری کے لیے درکار سالانہ بجلی کی کھپت کا 30 فیصد حصہ شمسی توانائی سے حاصل کیا جاتا ہے۔

مرسیڈیز بینز اپنی فیکٹریوں سے کاربن ڈائی آکسائیڈ کے اخراج کو 2039ء تک صفر کی سطح پر لانے کے لیے دو بلین اور 100 ملین یورو کی سرمایہ کاری کر رہی ہے۔ یہ اسمارٹ فیکٹری، دیگر فیکٹریوں کے مقابلے میں 25 فیصد کم بجلی استعمال کرتی ہے۔

دنیا کی یہ پہلی فیکٹری ہے جہاں پروڈکشن لائن سسٹم مکمل طور پر ڈیجیٹلائزڈ ہے اور فائیو جی نیٹ ورک پر کام کرتا ہے۔ ایرکسن کمپنی اور ٹیلی کام ادارے O2 نے مل کر اسے مرسیڈیز بینز کے لیے تیار کیا ہے۔ یہاں کام کرنے والے تمام لوگ، آلات اور ڈیوائسز اس سسٹم سے جڑی ہیں اور آپس میں معلومات کا تبادلہ کرتی ہیں۔

مکمل ڈیجیٹل ’فیکٹری 56‘ میں کمپیوٹر اور انٹرنیٹ کی دنیا کی جدید ترین ٹیکنالوجیز کا استعمال کیا گیا ہے جن میں انٹرنیٹ آف تھنگز، مصنوعی ذہانت، بِگ ڈیٹا الگوردھمز، اسمارٹ ڈیوائسز، ورچوئل ریئیلٹی اور آگمینٹڈ ریئیلیٹی بھی شامل ہیں۔

یہ جدید ’’فیکٹری 56‘‘ انٹرنیٹ پلیٹ فارم ‘‘MO360’’ کا استعمال کرتی ہے جو خاص طور پر بینز کے لیے تیار کیا گیا ہے۔ تمام تر معلومات اسکرینز پر ہی دستیاب ہوتی ہے جس کے باعث سالانہ 10 ٹن کاغذ کی بچت ہو گی۔

مرسیڈیز بینز کا 360 ڈگری نیٹ ورک سسٹم فیکٹری تک ہی محدود نہیں بلکہ اس میں پروڈکشن کے علاوہ لاجسٹک چین بھی شامل ہے جو ان دو ہزار کمپنیوں پر مشتمل ہیں جو مرسیڈیز بنیز کے ساتھ مل کر کام کر رہی ہیں۔

‘‘RFID’’ سسٹم (ریڈیو ویو ریکگنیشن سسٹم) کے ذریعے اسمبلی ہال میں موجود کاروں کے پارٹس کے نمبر اور ان کی موجودگی کا مقام اس سسٹم میں موجود رہتا ہے جس کی وجہ سے مختلف پارٹس کے لیے الگ سے آرڈر کرنے کی کوئی ضرورت نہیں ہوتی۔

سب سے بڑا انقلاب پروڈکشن لائن میں لایا گیا ہے اور اسی سبب انتہائی کم وقت میں اس میں مرسیڈیز گاڑیوں کے کسی بھی ماڈل کی بہت کم عرصے میں پروڈکشن شروع کی جا سکتی ہے۔

’’فیکٹری 56‘‘ کی جدید ترین پروڈکشن لائن کی بدولت گاڑیوں کی تیاری کی لاگت میں 25 فیصد تک کمی ہو گئی ہے۔

دیگر فیکٹریوں کی نسبت ’’فیکٹری 56‘‘ میں کوئی شور نہیں ہے اور یہاں خاموشی اور سکون ہے۔ ایک اور چیز جو آپ کی توجہ اپنی طرف مبذول کراتی ہے وہ یہاں کی صفائی ہے جو کسی ہسپتال کے آپریشن تھیئٹر کی سطح کی ہے۔

’’فیکٹری 56‘‘ کی پروڈکشن لائن مرسیڈیز بینز کے دنیا بھر میں موجود دیگر 30 پلانٹس کے لیے بھی ایک ماڈل کا کام کرے گی اور انہیں بھی اسی کی طرز پر جدید بنایا جائے گا۔

جرمنی کی کارساز صنعت کے مختلف برانڈز ہیں، جنہیں مختلف ممالک کے لوگ بہت پسند کرتے ہیں۔ ان میں مرسیڈیز، بی ایم ڈبلیو، پورشے، آؤڈی، فولکس ویگن خاص طور پر بہت اہمیت کے حامل ہیں۔

کسی دور میں جرمن عوام میں مرسیڈیز گاڑی کو اعلیٰ مقام حاصل تھا، ایسا آج بھی ہے لیکن حالیہ کچھ عرصے میں نوجوان نسل کو آؤڈی گاڑی نے اپنا دیوانہ بنا لیا ہے۔

جرمن ساختہ پورشے کو لگژری کاروں میں شمار کیا جاتا ہے۔ اس کے مختلف ماڈل دنیا بھر کی اشرفیہ میں خاص طور پر مقبول ہیں۔

تقریباً دو برس قبل فوکس ویگن کاروں سے دھوئیں کے اخراج کا اسکینڈل سامنے آیا۔ یہ اسکینڈل عالمی سطح پر ڈیزل گیٹ اسکینڈل کے نام سے مشہور ہوا۔ اس دوران اس کی لپیٹ میں کئی کار ساز ادارے آ چکے ہیں۔

سن 2016 اور سن 2017 میں کاروں کی عالمی امپورٹ میں جرمنی کا حصہ بائیس فیصد تھا۔ یہ کاریں بنانے والے تمام ممالک کے مقابلے میں سب سے زیادہ تھا۔

جرمنی سمیت دنیا بھر میں مرسیڈیز گاڑی کو ایک خاص مقام حاصل ہے۔ مرسیڈیز موٹر کار کو جرمنی کی ایک پہچان بھی سمجھا جاتا ہے۔

جرمن کار صنعت کے لیے چین بھی اب بہت اہم ہو کر رہ گیا ہے۔ چین میں تیس فیصد کاریں جرمنی سے امپورٹ کی جاتی ہیں۔ چینی خریداروں میں کم اخراج کی حامل گاڑیوں کو بہت زیادہ پسند کرنے والوں کی تعداد بڑھتی جا رہی ہے۔

جرمنی میں بتدریج ماحول دوست کاروں کو پسندیدگی حاصل ہو رہی ہے۔ جرمن ادارہ ڈوئچے پوسٹ نے ترسیل کے لیے الیکٹرک گاڑیوں کا استعمال بڑھا دیا ہے۔