افغانستان میں 'مہاجرین اور وطن واپسی‘ کی وزارت نے بتایا ہے کہ بدھ کے دن مزید چھبیس مہاجرین کا ایک گروپ جرمنی سے کابل پہنچ گیا ہے۔ اس وزارت کے ایک اہلکار نے خبر رساں ادارے ڈی پی اے کو بتایا کہ ایک چارٹر طیارہ ان افغان مہاجرین کو لیے عالمی وقت کے مطابق صبح چھ بجکر پینتیس منٹ پر کابل کے ایک ہوائی اڈے پہنچا۔
سن دو ہزار سولہ کے بعد سے جرمنی سے واپس افغانستان روانہ کیے جانے والے ایسے مہاجرین کا یہ چھتیسواں گروپ تھا، جن کی پناہ کی درخواستیں رد ہو جانے کے بعد انہیں واپس وطن روانہ کیا گیا۔
یہ بھی پڑھیے: جرمنی، غیرقانونی مہاجرین کی ملک بدریوں میں شدید کمی
یوں اب تک جرمنی پہنچنے والے پناہ کے متلاشی مجموعی طور پر نو سو نواسی افغان مہاجرین کو ملک بدر کیا جا چکا ہے۔
سن 2015 سے اب تک جرمنی آنے والے مہاجرین اور تارکین وطن میں سے اب ہر چوتھا شخص برسرروزگار ہے۔ پکچر گیلری میں دیکھیے کہ کس ملک کے شہری روزگار کے حصول میں نمایاں رہے۔
تصویر: DW/Aasim Saleem
گزشتہ تین برسوں کے دوران پناہ کی تلاش میں جرمنی آنے والے شامی مہاجرین کی تعداد سوا پانچ لاکھ سے زائد رہی۔ شامیوں کو جرمنی میں بطور مہاجر تسلیم کرتے ہوئے پناہ دیے جانے کی شرح بھی سب سے زیادہ ہے۔ تاہم جرمنی میں روزگار کے حصول میں اب تک صرف بیس فیصد شامی شہری ہی کامیاب رہے ہیں۔
سن 2015 کے بعد سے اب تک جرمنی میں پناہ کی درخواستیں جمع کرانے والے افغان باشندوں کی تعداد ایک لاکھ نوے ہزار بنتی ہے۔ اب تک ہر چوتھا افغان تارک وطن جرمنی میں ملازمت حاصل کر چکا ہے۔
افریقی ملک اریٹریا سے تعلق رکھنے والے چھپن ہزار سے زائد مہاجرین اس دوران جرمنی آئے، جن میں سے اب پچیس فیصد کے پاس روزگار ہے۔
اسی عرصے میں ایک لاکھ ساٹھ ہزار سے زائد عراقی بھی جرمنی آئے اور ان کی درخواستیں منظور کیے جانے کی شرح بھی شامی مہاجرین کے بعد دوسرے نمبر پر ہے۔ تاہم اب تک ایک چوتھائی عراقی تارکین وطن جرمنی میں ملازمتیں حاصل کر پائے ہیں۔
افریقی ملک صومالیہ کے قریب سترہ ہزار باشندوں نے اس دورانیے میں جرمن حکام کو اپنی سیاسی پناہ کی درخواستیں جمع کرائیں۔ اب تک صومالیہ سے تعلق رکھنے والے پچیس فیصد تارکین وطن جرمنی میں نوکریاں حاصل کر چکے ہیں۔
ان تین برسوں میں قریب چالیس ہزار ایرانی شہری بھی بطور پناہ گزین جرمنی آئے۔ جرمنی کے وفاقی دفتر روزگار کی رپورٹ کے مطابق اب تک ان ایرانی شہریوں میں سے قریب ایک تہائی جرمنی میں ملازمتیں حاصل کر چکے ہیں۔
افریقی ملک نائجیریا سے تعلق رکھنے والے پناہ گزینوں کو بھی جرمنی میں روزگار ملنے کی شرح نمایاں رہی۔ جرمنی میں پناہ گزین پچیس ہزار نائجیرین باشندوں میں سے تینتیس فیصد افراد کے پاس روزگار ہے۔
جرمنی میں ملازمتوں کے حصول میں پاکستانی تارکین وطن سر فہرست رہے۔ سن 2015 کے بعد سیاسی پناہ کی تلاش میں جرمنی آنے والے قریب بتیس ہزار پاکستانی شہریوں میں سے چالیس فیصد افراد مختلف شعبوں میں نوکریاں حاصل کر چکے ہیں۔
جرمنی سے اس طرح وطن واپس روانہ کیے جانے کا یہ عمل انتہائی متنازعہ قرار دیا جاتا ہے کیونکہ انسانی حقوق کے کارکنوں کا کہنا ہے کہ افغانستان میں سکیورٹی کی صورتحال بہتر نہیں ہے اور ان افراد کے وطن واپس پہنچنے سے ان کی جان کو بھی خطرہ لاحق ہو سکتا ہے۔
امریکا اور طالبان کے مابین دوحہ امن ڈیل کے باوجود طالبان نے اپنے حملوں میں کمی نہیں کی ہے جبکہ امریکی انتظامیہ میں تبدیلی کے بعد اس امن معاہدے پر بھی سوالیہ نشانات ابھر چکے ہیں۔ ساتھ ہی افغانستان میں دہشت گرد تنظیم ‘اسلامک اسٹیٹ‘ بھی فعال ہے، جو گاہے بگاہے شہریوں کو حملوں کو نشانہ بناتی رہتی ہے۔
دوسری طرف طالبان اور کابل حکومت کے مابین امن مذاکراتی عمل بھی تعطل کا شکار ہے۔ دوحہ امن ڈیل کے تحت افغانستان سے امریکی افواج کی ایک بڑی تعداد کے انخلا کے بعد اس وسطی ایشیائی ملک میں فعال شدت پسند گروہ اپنے حملوں میں مزید تیزی لا سکتے ہیں۔
یہ بھی پڑھیے:جرمنی سے انیس پاکستانی ملک بدر، وبا کا خیال نہ رکھا گیا
گزشتہ نو دنوں کے دوران دارالحکومت کابل میں سولہ بم حملے کیے گئے، جن کی وجہ سے پورا کا پورا شہر متاثر ہوا ہے۔ یہ حملے اس مقام کے قریب بھی کیے گئے، جہاں افغان مہاجرین کا گروپ ایک خصوصی چارٹر طیارے کے ذریعے پہنچا ہے۔
اسی طرح کورونا کی عالمی وبا کے باعث بھی افغان حکومت کو شدید مسائل کا سامنا ہے۔ اقوام متحدہ نے خبردار کیا ہے کہ اس عالمی وبا اور تنازعات کی وجہ سے اس برس اٹھارہ ملین افغان شہریوں کو فوری امداد کی ضرورت ہو گی۔
ع ب / ک م / خبر رساں ادارے
گزشتہ برس مجموعی طور پر نو ہزار تین سو تارکین وطن کو مختلف جرمن کمپنیوں میں فنی تربیت (آؤس بلڈُنگ) کے حصول کی اجازت ملی۔ زیادہ تر مہاجرین کا تعلق مندرجہ ذیل ممالک سے ہے.
تصویر: D. Kaufmannافغانستان سے تعلق رکھنے والے 3470 مہاجرین اور تارکین وطن مختلف جرمن کمپنوں میں زیر تربیت ہیں۔
جرمنی میں شامی مہاجرین تعداد کے حوالے سے پہلے نمبر پر ہیں، لیکن زیر تربیت مہاجرین کی تعداد محض ستائیس سو رہی، جو افغان پناہ گزینوں سے بھی کم ہے۔
ملک بھر کی مختلف کمپنیوں میں آٹھ سو عراقی مہاجرین تربیت حاصل کر رہے ہیں۔
افریقی ملک اریٹریا سے تعلق رکھنے والے سات سو دس تارکین وطن کو فنی تربیت کے حصول کے لیے جرمن کمپنیوں نے قبول کیا۔
جرمنی میں پناہ کے متلاشی ایرانیوں کی تعداد تو زیادہ نہیں ہے لیکن فنی تربیت حاصل کرنے والے ایرانی تارکین وطن تعداد (570) کے اعتبار سے پانچویں نمبر پر ہیں۔
چھٹے نمبر پر پاکستانی تارکین وطن آتے ہیں اور گزشتہ برس ساڑھے چار سو پاکستانی شہریوں کو جرمن کمپنیوں میں انٹرنشپ دی گئی۔
اس حوالے سے ساتواں نمبر صومالیہ کے تارکین وطن کا ہے۔ صومالیہ کے 320 تارکین وطن کو فنی تربیت فراہم کی گئی۔
افریقی ملک نائجیریا سے تعلق رکھنے والے 280 پناہ گزینوں کو گزشتہ برس جرمنی میں فنی تربیت حاصل کرنے کا موقع ملا۔
