سن 2016 میں پاکستان میں ہندو میرج ایکٹ منظور کیا گیا جس کے تحت ہندو مذہب سے تعلق رکھنے والے پاکستانی شہریوں کی شادیوں کی رجسٹریشن کا آغاز ہوا۔ اس قانون کی منظوری کے بعد مذہب کی جبری تبدیلی اور بچپنے میں کی جانے والی شادیوں کی روک تھام بھی ہو سکے گی۔

پاکستان میں ہر سال غیرت کے نام پر قتل کے متعدد واقعات سامنے آتے ہیں۔ سن 2016 میں پاکستانی ماڈل قندیل بلوچ کو اُس کے بھائی نے مبینہ طور پر عزت کے نام پر قتل کر دیا تھا۔ قندیل بلوچ کے قتل کے بعد پاکستانی حکومت نے خواتین کے غیرت کے نام پر قتل کے خلاف قانون منظور کیا۔

پاکستانی وزیرِ اعظم نواز شریف نے حال ہی کراچی میں میں ہندوؤں کے تہوار میں شرکت کی اور اقلیتوں کے مساوی حقوق کی بات کی۔ تاہم پاکستان میں جماعت الدعوہ اور چند دیگر تنظیموں کی رائے میں نواز شریف ایسا صرف بھارت کو خوش کرنے کی غرض سے کر رہے ہیں۔

کراچی میں دیوالی کے موقع پر پاکستان کے وزیر اعظم نواز شریف نے ملک میں بسنے والی اقلیتوں کے حوالے سے بات کرتے ہوئے کہا تھا کہ پاکستان کے سب شہریوں کو ایک دوسرے کی خوشی اور غم میں شریک ہونا چاہیے اور ایک دوسرے کی مدد کرنا چاہیے۔

حکومت پاکستان نے گزشتہ کرسمس کو پاکستانی مسیحیوں کے ساتھ مل کر خاص انداز سے منایا۔ سن 2016 بائیس دسمبر کو ایک سجی سجائی ’’کرسمس امن ٹرین‘‘ کو پاکستان کے دارالحکومت اسلام آباد سے مسیحی برادری کے ساتھ ہم آہنگی اور مذہبی رواداری کے پیغام کے طور پر روانہ کیا گیا۔

اسلام آباد کی ایک یونیورسٹی کے فزکس ڈیپارٹمنٹ کو پاکستان کے نوبل انعام یافتہ سائنسدان ڈاکٹر عبدالسلام کے نام معنون کیا گیا۔ ڈاکٹر عبدالسلام کا تعلق احمدی فرقے سے تھا جسے پاکستان میں مسلمان نہیں سمجھا جاتا۔ فزکس کے اس پروفیسر کو نوبل انعام سن 1979 میں دیا گیا تھا۔

پاکستان میں سکھ مذہب کے پیرو کاروں کی تعداد بمشکل چھ ہزار ہے تاہم یہ چھوٹی سی اقلیت اب یہاں اپنی شناخت بنا رہی ہے۔ سکھ نہ صرف پاکستانی فوج کا حصہ بن رہے ہیں بلکہ کھیلوں میں بھی نام پیدا کر رہے ہیں۔ مہندر پال پاکستان کے پہلے ابھرتے سکھ کرکٹر ہیں جو لاہور کی نیشنل کرکٹ اکیڈمی میں کرکٹ کی تربیت حاصل کر رہے ہیں۔

پاکستان کے شمالی پہاڑوں میں وادی کیلاش واقع ہے۔ یہاں کی کیلاش اقلیت ہر سال موسم سرما کے اختتام پر جوشی ( بہار) تہوار مناتی ہے۔ کیلاش قبیلے کی آبادی تقریباﹰ چار ہزار افراد پر مشتمل ہے، جو اپنے مختلف خداؤں کی پوجا کرتی ہے۔

رواں برس اس تین روزہ تہوار کا آغاز 14 مئی کو ہوا۔ کچھ برس پہلے تک کیلاش قبیلے کے پاس نہ تو کیلنڈر تھے اور نہ ہی گھڑیاں۔ تہوار کی تاریخیں سورج کی پوزیشن دیکھتے ہوئے مقرر کی جاتی تھیں۔

وادی چترال میں جوشی تہوار کا مطلب سخت موسم کے خاتمے پر شکر کرنا بھی ہوتا ہے اور زیادہ پیداواری موسم بہار کا جشن منانا بھی۔ اس موقع پر شہد اور اچھی فصل کے لیے خصوصی دعائیں کی جاتی ہیں۔

کیلاش قبیلے کا زیادہ تر انحصار شمالی پاکستان کے ہندوکش پہاڑی سلسلے کی سرسبز وادیوں میں زراعت اور سیاحت پر ہے۔ کیلاش کمیونٹی کا دعویٰ ہے کہ ان کے قبیلے کی بنیاد یونانی سکندر اعظم کے فوجیوں نے رکھی تھی۔

مؤرخین کے قریب آج بھی کیلاش قبیلے کا یہ دعویٰ بحث طلب ہے کہ ان کا تعلق سکندر اعظم کے جرنیلوں سے ہے۔ دوسری جانب یونان اور کیلاش کی ثقافت، طرز تعمیرات، موسیقی وغیرہ میں بہت سی چیزیں مماثلت رکھتی ہیں۔

کیلاش قبیلہ بھی یونانیوں کی طرح مختلف خداؤں کو ماننے والا ہے۔ ان کے مطابق ’خدائی‘ نامی ایک دیوتا ان کی روزمرّہ کی زندگی کا ذمہ دار ہے اور اسی کی خوشنودی کے لیے اس تہوار میں دودھ کی مصنوعات کا استعمال اور بکریوں کی قربانی کی جاتی ہے۔

جوشی تہوار کے پہلے دن کو ’دودھ کا دن‘ بھی کہا جاتا ہے۔ اس قبیلے کے افراد رقص کرتے اور گانے گاتے ہوئے گھر گھر جاتے ہیں۔ ہر گھر سے انہیں دودھ پیش کیا جاتا ہے۔ یہ دودھ اس تہوار سے دس روز پہلے ہی جمع کرنا شروع کر دیا جاتا ہے۔

اس تہوار کے موقع پر کم از کم چار سال کی عمر میں بچوں کو ویسے ہی کپڑے پہنائے جاتے ہیں، جیسے بڑے پہنتے ہیں۔ چار سال کی عمر میں بچوں کو باقاعدہ طور پر تہوار میں حصہ لینے کی اجازت ہوتی ہے۔

چار برس سے پہلے بچوں کو سادہ کپڑے پہنائے جاتے ہیں۔ اس تہوار کے موقع پر خواتین مخصوص اور رنگ برنگے ملبوسات پہنتی ہیں جبکہ زیادہ تر مرد اب پاکستانی شلوار اور قمیض کا استعمال کرتے ہیں۔

کیلاش کی خوش رنگ خواتین کے رنگیلے کپڑے سیاحوں کے لیے بھی بہت پرکشش ہیں۔ خواتین کے سیاہ لمبے بال اور ان پر کڑھائی والی مخصوص لمبی ٹوپیاں اس تہوار کو مزید دلکش بناتی ہیں۔ اس موقع پر غیر ملکی سیاح بھی پاکستان پہنچتے ہیں۔

ایک دوسرے کے ساتھ کندا ملا کر رقص کرنا اس تہوار کی خصوصیت ہے اور ڈھول اس میں مرکزی کردار ادا کرتا ہے۔ رقص کے دوران لڑکیاں اور لڑکے مذاق کرتے ہوئے ایک دوسرے کے ساتھ محبت بھری نگاہیں بھی دو چار کرتے ہیں۔

تہوار میں مرد گلوکاروں کو خوش ہو کر پیسے بھی دیے جاتے ہیں اور کبھی کبھار بوسے بھی۔ ایک لحاظ سے دیکھا جائے تو کیلاش قبیلہ دیگر پاکستانیوں کی نسبت زیادہ ’آزاد خیال‘ تصور کیا جاتا ہے۔

جوشی تہوار کے تیسرے اور آخری دن رقص اپنے عروج پر ہوتا ہے۔ مرد اور عورتیں اس دن علیحدہ علیحدہ روایتی ڈانس کرتے ہیں۔ ہر ایک کے ہاتھ میں اخروٹ کے درخت کی ٹہنیاں ہوتی ہیں اور بدروحوں کے اثرات دور کرنے کے لیے انہیں نعرہ لگاتے ہوئے ہوا میں پھینک دیا جاتا ہے۔

کیلاش قبیلے کی روایات اسلام کے برعکس ہیں۔ اس لیے اس علاقے کو ’کافرستان‘ بھی کہا جاتا ہے۔ ایک کونے پر واقع اس وادی کو ایک واحد سڑک باقی پاکستان سے ملاتی ہے۔ جدید سہولتیں یہاں نہ ہونے کے برابر ہیں۔