منگل کے روز پاکستانی وزیر اعظم کے قومی سلامتی اور امور خارجہ کے مشیر سرتاج عزیز کے ہمراہ مشترکہ پریس کانفرنس کرتے ہوئے سعودی وزیر خارجہ نے اس تاثر کو غلط قرار دیا کہ وہ جنرل مشرف کے معاملے پر کسی قسم کی ڈیل کرانے پاکستان آئے ہیں۔ توقع کے مطابق اس پریس کانفرنس میں سعود الفیصل کو پاکستان کے سابق فوجی آمر پرویز مشرف کے حوالے سے چبھتے ہوئے سوالات کا سامنا کرنا پڑا۔

پرویز مشرف کو محفوظ راستے دینے سے متعلق ایک سوال کے جواب میں سعودی وزیر خارجہ نے کہا کہ ’بالکل نہیں‘، ہم دوسرے ممالک کے اندرونی معاملات میں عدم مداخلت کے اصولوں پر قائم ہیں اور خاص کر ایک دوست ملک کے اندرونی معاملات میں اور یہ ہماری پالیسی کا عام اصول ہے"۔

دہشت گردی کے خلاف کوششوں کا ذکر کرتے ہوئے انہوں نے کہا کہ خطے میں امن قائم رکھنے کے لیے بھی دونوں ممالک کو تعاون جاری رکھنا ہے اور دہشت گردی پر قابو پانے کے لیے بھرپور توجہ کی ضرورت ہے۔ انہوں نے کہا کہ افغانستان ایک نازک دور سے گزر رہا ہے۔ امریکی اور نیٹو فورسز رواں سال افغانستان سے نکل جائیں گی۔ ان افواج کے انخلاء کے بعد افغانستان میں دہشت گردوں کو دوبارہ منظم نہ ہونے دیا جائے۔

سعودی وزیر خارجہ سعود الفیصل نے کہا ہے کہ پاکستان اور سعودی عرب نے ہر مشکل گھڑی میں ایک دوسرے کا ساتھ دیا ہے۔ ان کا مزید کہنا تھا کہ سعودی عرب توانائی کے شعبے میں پاکستان میں سرمایہ کاری کرے گا۔

پاکستانی وزیراعظم کے مشیر برائے امور خارجہ سرتاج عزیز کا کہنا تھا کہ گزشتہ چھ سالوں میں یہ کسی بھی اعلیٰ سعودی شخصیت کا پہلا دورہ پاکستان ہے۔ انہوں نے کہا کہ اس دورے کے دوران علاقائی اور بین الاقوامی امور سمیت دو طرفہ تجارتی تعلقات کو فروغ دینے پر بھی بات ہوئی ہے۔ انہوں نے کہا، "آج ہم نے اس بات پر بھی اتفاق کیا ہے کہ دونوں ممالک کے درمیان مشترکہ اقتصادی کمشن کا اجلاس اگلے دو ماہ میں ہو گا تاکہ ان منصوبوں کو ٹھوس شکل دی جا سکے جن پر آج تبادلہ خیال کیا گیا۔‘‘

دوسری جانب غداری کے مقدمے کا سامنا کرنے والے سابق فوجی آمر پرویز مشرف کی میڈیکل رپورٹس خصوصی عدالت میں پیش کر دی گئی ہیں۔ منگل کو سماعت کے موقع پر مسلح افواج کے ادارہ برائے امراض قلب کے میڈیکل سپریٹنڈنٹ کی جانب سے پیش کی گئی رپورٹس کے مطابق جنرل مشرف کو نو مختلف امراض لاحق ہیں۔

اس رپورٹ کے مطابق پرویز مشرف کے دل کی ایک شریان بند ہے۔ اس کے علاوہ انہیں کندھے کے درد اورریڑھ کی ہڈی کاعارضہ بھی لاحق ہے۔ رپورٹ میں کہا گیا ہے کہ پرویز مشرف کے دائیں گھٹنے میں بھی سوجن ہے۔ ابتدائی ای سی جی رپورٹ میں پرویز مشرف کی دل کی دھڑکن معمول کے مطابق نہیں تھی۔ چار صفحات پر مشتمل اس رپورٹ میں کہا گیا ہے علاج سے چھاتی کا درد ختم جبکہ گردن میں درد کی تکلیف تاحال برقرار ہے۔ اس رپورٹ کے مطابق پرویز مشرف کے والد کا انتقال بھی عارضہ ء قلب کی وجہ سے ہوا تھا۔ عدالت اس رپورٹ پر جمعرات کے روز وکلاء کے دلائل ُسنے گی۔