مریکی وزیر خارجہ جان کیری نے کہا کہ’’ ہم یوکرائن کو مزید تقسیم کرنے کے اس غیر قانونی اقدام کی کھلی مذمت کرتے ہیں۔‘‘ ان کے بقول اگر ریفرنڈم کرانے کی کوشش کی گئی تو اس سے یوکرائن کی صورتحال کو قابو کرنے کی کوششوں کو شدید نقصان پہنچے گا۔ کیری نے مزید کہا کہ کوئی بھی تہذیب یافتہ ملک اس فرضی کوشش کو تسلیم نہیں کرے گا۔

ابھی حال ہی میں یوکرائن کے حکام نے تصدیق کی تھی کہ ڈونیٹسک اور لوہانسک اب ان کے زیر انتظام نہیں ہیں۔ ساتھ ہی کییف حکام نے ایک مرتبہ پھر روس پر علیحدگی پسندوں کی پشت پناہی کا الزام عائد کیا ہے۔ ماسکو ایسے الزامات کو بے بنیاد قرار دیتا آ رہا ہے۔

کیری اور یورپی یونین میں خارجہ امور کی نگران کیتھرین ایشٹن نے ایک مشترکہ پریس کانفرنس سے خطاب کرتے ہوئے روس پر نئی پابندیاں عائد کرنے کا بھی ذکر کیا۔ کیری کے بقول ’’اگر روسی عناصر اسی طرح جمہوری عمل کو نقصان پہنچانے اور یوکرائن میں ہونے والے عام انتخابات کے راستے میں رکاوٹ بننے کی کوششیں جاری رکھیں گے، تو ہم روس پر نئی پابندیاں عائد کرنے کے لیے تیار ہیں اور ہم سے مراد امریکا اور یورپی یونین ہے۔‘‘

اس موقع پر کیتھرین ایشٹن نے کہا کہ یورپی یونین اور امریکا چاہتے ہیں کہ یوکرائن کے عوام ہی یہ فیصلہ کریں کہ یوکرائن کیا ہے اور اسے کیسا ہونا چاہیے۔ ’’ یہ یورپی یونین اور روس کے مابین کسی ملک کے لیے مقابلہ بازی نہیں ہے۔‘‘ جرمن چانسلر انگیلا میرکل نے یورپی یونین کے رکن ممالک سے روس پر پابندیاں عائد کرنے کے حوالے سے مشترکہ مؤقف اختیار کرنے کا مطالبہ کیا ہے۔ ان کے بقول یہ اہم ہے کہ تمام رکن ممالک کی جانب سے روس کو ایک ہی پیغام دیا جائے۔

دوسری جانب ویانا میں یورپی کونسل کا ایک اجلاس منعقد ہوا، جس میں روسی وزیر خارجہ سیرگئی لاوروف نے بھی شرکت کی۔ اس اجلاس کا مقصد روس اور یوکرائن پر گزشتہ ماہ جنیوا میں ہونے والے امن معاہدے کی اہمیت کو ایک مرتبہ پھر اجاگر کرنا تھا۔ اس اجلاس سے خطاب کرتے ہوئے روسی وزیر خارجہ نے مطالبہ کیا کہ اگر مستقبل میں یوکرائن کے موضوع پر کوئی مذاکرات ہوتے ہیں تو ان میں علیحدگی پسندوں کے نمائندوں کو بھی شامل کیا جائے۔ لاوروف کے مطابق گزشتہ ماہ جنیوا میں ہونے والی بات چیت اسی صورت میں کامیاب ہو سکتی تھی جب یوکرائن کے مشرق اور جنوب میں لڑنے والے علیحدگی پسندوں کو بھی اس میں شرکت کا موقع دیا جاتا۔ کییف حکومت نے روس کا یہ مطالبہ مسترد کر دیا ہے۔

دریں اثناء یوکرائن سے ملنے والی اطلاعات کے مطابق ملکی فوج ملک کے مشرقی حصے میں باغیوں کے زیر قبضہ علاقوں کے گرد محاصرہ تنگ کرنے کی کوششوں میں لگی ہوئی ہے۔ یوکرائن کی وزارت داخلہ نے بتایا ہے کہ اس دوران چار فوجی اور تیس باغی ہلاک ہوئے ہیں۔ یوکرائن کی فوج نے ایک اہم حفاظتی چوکی پر قبضہ کرنے کا بھی دعویٰ کیا ہے۔