مصر میں سکیورٹی فورسز اور سابق صدر محمد مُرسی کے حامیوں کے درمیان جھڑپوں کے نتیجے میں ہلاکتوں کی تعداد 525 سے بھی تجاوز کر گئی ہے۔ اس کے برعکس اخوان المسلمون کا کہنا ہے کہ ملک بھر میں کریک ڈاؤن کے دوران ان کے دو ہزار سے زائد حامی مارے گئے ہیں۔

دریں اثناء ترک وزیراعظم رجب طیب ایردوآن نے مصری سکیورٹی فورسز کی طرف سے اس کریک ڈاؤن کو ’قتل عام‘ قرار دیتے ہوئے اقوام متحدہ کی سلامتی کونسل سے فوری طور پر عملی ردعمل ظاہر کرنے کی اپیل کی ہے۔

محمد مرسی کی حامی جماعت اخوان المسلمون نے کہا ہے کہ وہ فوجی بغاوت کے خاتمے تک اپنی پر امن جدوجہد جاری رکھیں گے۔ اس جماعت کے ترجمان کا کہنا ہے انہوں نے ہمیشہ عدم تشدد اور امن کی بات کی ہے۔

کریک ڈاؤن کے دوران احتجاجی کیمپ کے نزدیک واقع مسجد بھی بری طرح متاثر ہوئی۔ دریں اثناء مصری فوج کے حمایت یافتہ عبوری وزیر اعظم نے معزول صدر محمد مرسی کے حامیوں کے خلاف پرتشدد کریک ڈاؤن کا دفاع کیا ہے۔

مصر میں معزول صدر محمد مرسی کے اسلام پسند حامیوں کو منتشر کرنے کے لیے سکیورٹی اہلکاروں نے کارروائی کی ہے۔ اخوان المسلمون کے مطابق ان کے سینکڑوں کارکنوں کو ہلاک کر دیا گیا ہے۔

محمد مرسی کے حامی کئی ہفتوں سے دارالحکومت میں احتجاجی کیمپ لگائے ہوئے ہیں، ان کا مطالبہ ہے کہ معزول صدر کو بحال کیا جائے۔ قاہرہ کے شمال مشرق میں سب سے بڑے احتجاجی کیمپ میں مظاہرین کے خلاف آنسو گیس کا استعمال بھی کیا گیا ہے۔

سرکاری ٹیلی وژن کے مطابق آج ملکی فوج تمام احتجاجی کیمپ ختم کروانے کی کوشش کرے گی۔ دوسری طرف مصر پولیس نے اخوان المسلمون کے اہم رہنما ‏محمد البلتاجی کو گرفتار کر لیا ہے۔

اخوان المسلمون کے کارکن پولیس کی کارروائی سے متاثر ہونے والی ایک خاتون کو پانی پلا رہے ہیں۔ اخوان المسلمون کے مطابق ہلاکتوں کے علاوہ پانچ ہزار افراد زخمی بھی ہوئے ہیں۔

احتجاجی کیمپوں کے خلاف عبوری حکومتی کارروائی کے آغاز کے بعد اخوان المسلمون کی جانب سے مصری عوام سے اپیل بھی کی گئی کہ وہ سڑکوں پر نکل آئیں۔

اخوان المسلمون کے ترجمان جہاد الحداد کا کہنا تھا کہ یہ احتجاجی کیمپوں کو منتشر کرنے کا عمل نہیں بلکہ فوجی بغاوت کے بعد اپوزیشن کی آواز کو دبانے کی ایک خونی کارروائی ہے۔

رابعہ العدویہ مسجد کے قریب ایک مسجد کو مبینہ طور پر عارضی مردہ خانے کے طور پر استعمال کیا گیا اور اس میں کُل 43 لاشیں پہنچائی گئی۔ خبر رساں ادارے اے ایف پی کے مطابق ہلاک ہونے والے تمام مرد تھے اور ان کو گولیاں لگی ہوئی تھیں۔

وزارت داخلہ کے مطابق النہضہ اسکوائر کا علاقہ اب مکمل طور پر احتجاجیوں سے خالی کرا لیا گیا ہے اور پوری طرح حکومتی سکیورٹی کے کنٹرول میں ہے۔ اس چوک میں نصب تمام خیمے بھی ہٹا دیے گئے ہیں۔

سکیورٹی اہلکاروں کے مطابق اس کیمپ سے درجنوں افراد کو حراست میں بھی لیا گیا ہے۔ حکام کے مطابق علاقے کے مکینوں نے بھی سکیورٹی اہلکاروں کی معاونت کی ہے۔

قاہرہ میں معزول صدر کے حامیوں نے دو احتجاجی کیمپ قائم کر رکھے تھے۔ ان میں سے ایک قاہرہ یونیورسٹی کے باہر تھا جو قدرے چھوٹا اور اپنے حجم کے اعتبار سے بڑا کیمپ رابعہ العدویہ مسجد کے باہر تھا۔

سکیورٹی آپریشن کے شروع ہونے پر فوج نے سینکڑوں ریت کے تھیلوں کو بھاری ٹرکوں پر لاد دیا تھا۔ اس کے علاوہ مظاہرین کی جانب سے تیار کردہ اینٹوں کی حفاظتی دیواروں کو بھی توڑ دیا۔ اس کام کے لیے فوج نے بلڈوزر کا استعمال کیا۔

یورپی یونین سمیت، ترکی، ایران، قطر اور برطانیہ نے احتجاجی کیمپوں پر سکیورٹی فورسز کے کریک ڈاؤن اور ہلاکتوں پر گہری تشویش کا اظہار کیا ہے۔

فوج کی مدد سے پولیس نے اس آپریشن کا آغاز بدھ کی صبح کیا۔ اگلے تین گھنٹوں کی بھرپور کارروائی کے بعد دونوں کیمپوں کو تقریباً خالی کرا لیا گیا اور احتجاجی مظاہرین کو منتشر کر دیا گیا۔

محمد مرسی کے ہزاروں حامی صدر کے عہدے سے اُن کی زبردستی معزولی کے ساتھ ساتھ نئی حکومت کے خلاف بھی اپنا احتجاج جاری رکھے ہوئے ہیں۔ ان کا مطالبہ مرسی کی دوبارہ بحالی ہے۔ ان میں زیادہ تر اخوان السلمون کے کارکن ہیں۔ سڑکوں پر کیے جانے والے یہ مظاہرے اب احتجاجی کیمپوں میں تبدیل ہو گئے ہیں۔

مرسی کے حامیوں اور فوج کے مابین تصادم کے دوران اب تک سو سے زائد افراد ہلاک ہو چکے ہیں۔ رابعہ العدویہ مسجد کے باہر موجود یہ کیمپ ریت کی بوریوں کی وجہ سے محفوظ تصور کیا جاتا ہے۔ یہ بوریاں اور جنگلے فوج اور پولیس کی جانب سے کی جانے والی کارروائی کے دوران ڈھال کا کام کرتے ہیں۔

ہر کیمپ کے آغاز میں مرسی کی بڑی بڑی تصاویر اور احتجاجی بینرز آویزاں ہیں۔ ان میں سے کچھ پر تحریر ہے کہ ’’میرا ووٹ کہاں گیا‘‘ ؟ مرسی مصر میں عوام کی جانب سے منتخب کیے جانے والے پہلے صدر تھے۔ صدارتی انتخابات کے بعد بھی مصر میں مظاہرے کیے گئے تھے۔

احتجاجی کیمپوں میں ہزاروں افراد ایسے ہیں، جو اپنے بنائے ہوئےخیموں میں مقیم ہیں۔ ان کیمپوں میں ایک بیکری، ایک مسجد جبکہ ایک پریس سینٹر کی سہولیات بھی دستیاب ہیں۔ یہاں پر اخوان المسلون کے متعدد اہم رہنما بھی موجود ہوتے ہیں۔ مرسی کے حامیوں کو کھانے پینے کی کوئی مشکل نہیں ہے۔

ذرائع ابلاغ کے مطابق مصری فوج ان احتجاجی کیمپوں کو خالی کرانے کا منصوبہ بنا رہی ہے۔ اس کے لیے ان کیمپوں کو صاف پانی کی ترسیل، بجلی اور اشیاء کی فراہمی روک دی جائے گی۔ حکومت نے دھمکی بھی دی ہوئی ہے کہ ضرورت پڑنے پر کیمپوں کو طاقت کے بل پر بھی خالی کرایا جا سکتا ہے۔

جولائی کے آغاز میں محمد مرسی کی معزولی کے بعد سے مصر کے عبوری صدر عدلی منصور یورپی یونین اور امریکا کے ساتھ مل کر فریقین کے مابین مصالحت کی کوششیں کر رہے ہیں۔ تاہم ابھی تک یہ کوششیں بےنتیجہ رہی ہیں۔ عدلی منصور کا کہنا ہے کہ فریقین کے درمیان مذاکرات شروع نہ ہونے کی تمام تر ذمہ داری اخوان المسلون پر عائد ہوتی ہے۔

اخوان المسلون کا کہنا ہے کہ وہ مذاکرات کے لیے تیار ہیں۔ مرسی کی جسٹس اینڈ ڈیویلمپنٹ پارٹی کے ایمن عبدالغنی کے بقول بات چیت کے لیے ان کی تین شرائط ہیں، صدر مرسی، پارلیمنٹ اور آئین کی دوبارہ بحالی۔

2011ء میں عرب اسپرنگ سے جڑی امیدیں ابھی تک پوری نہیں ہو سکی ہیں۔ حسنی مبارک کے بعد امید تھی کہ مصر میں امن قائم ہو گا لیکن یہ ملک بدستور افراتفری کا شکار ہے۔

مصر کے تحریر چوک میں جمع لاکھوں مصری باشندوں نے محمد مرسی کی برطرفی کی خبر کے بعد رات بھر جشن منایا۔ فوج نے ایک عبوری سویلین حکومت کا اعلان کیا ہے اور کہا ہے کہ ملک میں جلد انتخابات کا انعقاد کیا جائے گا۔

گزشتہ کئی روز سے جاری ایک بڑی عوامی احتجاجی تحریک کے بعد ملکی فوج نے محمد مرسی کی برطرفی کا اعلان کر دیا۔ مرسی حکومت جمہوری طور پر منتخب ہوئی تھی، تاہم بہت سے افراد کو حکومت سے شکایات تھیں۔ حکومت کے مخالفین کا کہنا تھا کہ محمد مرسی ملک میں واضح سیاسی تقسیم کی وجہ بنے ہیں اور ان کی وجہ سے عوام کی زندگیاں اور بھی دشوار ہو گئی ہیں۔

اخوان المسلمون کے ارکان اور صدر مرسی کے حامیوں نے ٹی وی پر فوج کے اس اعلان کے وقت دارالحکومت قاہرہ کی ایک مسجد میں احتجاج کیا۔ ان افراد نے صدر مرسی کی تصاویر اٹھا رکھی تھیں۔

صدر مرسی نے فوجی اقدام کو ’بغاوت‘ قرار دیتے ہوئے اس کی مذمت کی۔ اخوان المسلمون نے بھی صدر مرسی کی برطرفی کے اس فوجی اعلان پر بھرپور غم و غصے کا اظہار کیا۔

مصری فوج نے دو روز قبل حکومت اور اپوزیشن کو سیاسی کشیدگی کے فوری خاتمے اور معاملے کے حل کا الٹی میٹم دیا تھا۔ فوج کا کہنا تھا کہ بصورت دیگر وہ اپنا ایک ’روڈ میپ‘ دے گی۔ اس وقت کوئی نہیں کہہ سکتا تھا صدر مرسی کے برطرفی بھی اس روڈ میپ کا حصہ ہو سکتی ہے۔

جب فوج کی جانب سے یہ الٹی میٹم دیا گیا، نوجوان انقلابیوں کا کا کہنا تھا کہ مسقبل کی مصری پالیسیوں میں نوجوانوں کی شرکت کا یقینی بنایا جانا انتہائی ضروری ہے۔ نوجوانوں کا کہنا تھا ’یہ عظیم انقلاب کا آغاز ہے‘۔