یورپی یونین کے سفارتکار مصر کی صورت حال پر گفتگو کے لیے آج پیر کے روز برسلز میں جمع ہوں گے۔ یورپی یونین کے لیڈروں نے قاہرہ حکومت کو حالیہ کریک ڈاؤن کے تناظر میں متنبہ کیا ہے کہ اس سلسلے کو روکنا بہت ضروری ہے۔ یورپی یونین کے صدر ہیرمن فان رومپوئے اور یورپی کمیشن کے سربراہ یوزے مانویل باروسو کی جانب سے انتباہی بیانات میں کہا گیا کہ اگر پرتشدد حکومتی کارروائیوں میں کمی واقع نہ ہوئی تو یورپی یونین مصر کے ساتھ تعلقات پر نظرِثانی کے لیے تیار ہے۔ یہ امر اہم ہے کہ یورپی یونین مصر کو سب سے زیادہ قرض دینے والا بلاک ہے۔ اس کے علاوہ یورپی یونین امداد، کاروبار اور سیاحت کے حوالے سے بھی مصر کے لیے انتہائی اہم ہے۔ گزشتہ برس مصر کو یونین کی جانب سے پانچ ارب یورو کی امداد دی گئی تھی۔

جرمن چانسلر انگیلا میرکل کے بقول اسلحے کی برآمد پر پابندی سے مصری حکومت پر خونریزی کو فوری طور پر روکنے کے لیے دباؤ ڈالا جاسکتا ہے۔ ٹیلی وژن پر نشر کی جانے والی بات چیت میں میرکل کا مزید کہنا تھا کہ اس طرح برلن حکومت مصر میں رونما ہونے والے واقعات پر اپنے شکوک و شبہات کا بھی واضح انداز میں اظہار کر سکتی ہے۔ میرکل نے کہا کہ یورپی وزرائے خارجہ کے اجلاس میں بھی مصر کے حالات پر غور کیا جائے گا۔ ان کے بقول مصر کی صورتحال تشویشناک ہے۔ میرکل نے مزید کہا کہ غور کیا جا رہا ہے کہ ان حالات میں کیا اقدامات اٹھائے جانے چاہییں۔

جرمن وزیر خارجہ گیڈو ویسٹر ویلے کا ایک انٹرویو ہفت روزہ مگیزین فوکس میں شائع ہوا ہے۔ اس میں ان کا کہنا تھا ک ہبرلن حکومت نے مصر کے ساتھ اسلحے کی ایکسپورٹ کے حوالے سے تعلقات کو پہلے ہی محدود کر دیا ہے اور حالیہ صورتحال کے تناظر میں یہ معاملہ ایسے ہی رکھا جائے گا۔ دوسری جانب جرمن وزارت اقتصادیات کی جانب سے ہفتے کے روز ایسا عندیہ دیا گیا تھا کہ مصر کے لیے ایکسپورٹ کے تمام ممکنہ فیصلوں کو سرِدست منجمد کر دیا گیا ہے۔

ادھر فرانس کے صدر فرانسوا اولاند کا کہنا ہے کہ یورپی اور عرب اقوام پر مشترکہ ذمہ داری عائد ہوتی ہے کہ وہ مصر میں تشدد کو روکنے کے لیے ہر ممکن اقدام کریں۔ ان خیالات کا اظہار اولاند نے سعودی عرب کے وزیر خارجہ سے ملاقات کے بعد کیا۔ اولاند کا یہ بھی کہنا ہے کہ وہ مصر معاملات میں مداخلت کے قائل نہیں لیکن مصر جیسی قوم کے ساتھ اس درجہ تشدد بھی ناقابل قبول ہے۔ اولاند نے مصری حکام پر زور دیا کہ وہ جلد از جلد انتخابی عمل کو مکمل کریں۔ اُدھر فرانسیسی وزیر خارجہ لوراں فابیوس نے اپنے قطری ہم منصب محمد العطیہ سے ملاقات کے دوران مصر میں پیدا شدہ تقسیم پر خاص طور پر توجہ مرکوز کی۔ فابیوس نے یہ بھی کہا کہ مصر میں خون خرابے کو ختم کروانے کے بعد منقسم مصری قوم کے درمیان مذاکراتی عمل شروع کیا جائے۔