یورپی یونین کے صدر ہیرمان فان رومپوئے اور یورپین کمیشن کے سربراہ یوزے مانویل باروسو کی طرف سے جاری ہونے والے ایک طویل بیان میں خبردار کیا گیا ہے کہ مصر میں جاری بحران اگر مزید پھیلتا ہے تو اس کے مصر اور علاقے کے لیے ’ناقابل اندازہ نتائج‘ برآمد ہو سکتے ہیں۔ ان رہنماؤں نے حالات کی بہتری کی ذمہ داری فوج اور حکومت پر عائد کی ہے۔

رومپوئے اور باروسو کی جانب سے جاری کردہ بیان کے مطابق، ’’مصری عوام کی طرف سے جمہوریت کا مطالبہ اور بنیادی آزادی کے مطالبات کو نظرانداز نہیں کیا جا سکتا اور نہ ہی ان مطالبات کو خون میں بہایا جاسکتا ہے۔‘‘

اس بیان کے مطابق، ’’بین الاقوامی اور علاقائی پارٹنرز کے ساتھ مل کر یورپی یونین مصر میں تشدد کے خاتمے، سیاسی ڈائیلاگ اور جمہوری عمل کی طرف واپسی کے لیے تندہی کے ساتھ اپنی کوششوں میں مصروف رہے گی۔ اس مقصد کے لیے یورپی یونین اپنی رکن ریاستوں کے ساتھ آئندہ دنوں میں مصر کے ساتھ اپنے تعلقات پر فوری نظر ثانی کرے گی اور ان مقاصد کے حصول کے لیے مناسب اقدامات کرے گی۔‘‘

یورپین یونین کے سربراہوں کی طرف سے یہ بیان دراصل 28 رکنی اس بلاک کے سفارت کاروں کی مصر کے حوالے سے برسلز میں ہونے والی ایک ایمرجنسی میٹنگ سے محض 24 گھنٹے قبل سامنے آیا ہے۔ توقع کی جا رہی ہے کہ اس میٹنگ کے بعد یورپی وزائے خارجہ کا اجلاس بھی آئندہ چند دنوں میں بلا لیا جائے گا۔

یورپی یونین کے سربراہان کے اس بیان کے مطابق یہ بات انتہائی ضروی ہے کہ مصر میں جاری تشدد کو فوری طور پر روکا جائے: ’’اس کے باوجود کہ تمام فریقین کو زیادہ سے زیادہ تحمل سے کام لینا چاہیے، ہم خاص طور پر اس کی ذمہ داری عبوری حکومت اور فوج پر عائد کرتے ہیں کہ وہ فوری طور پر ان جھڑپوں کو رکوائے۔‘‘

’’تشدد اور گزشتہ دنوں کے دوران ہونے والی ہلاکتوں کو کسی بھی طور نہ تو جائز قرار دیا جا سکتا ہے اور نہ ہی انہیں معاف کیا جا سکتا ہے۔ انسانی حقوق کا احترام کیا جائے اور ان پر عمل کیا جائے۔ سیاسی قیدیوں کو رہا کیا جائے۔‘‘

محمد مُرسی کے حامیوں کی طرف سے نئے مظاہروں کا اعلان

مصر کے اقتدار سے ہٹائے جانے والے صدر محمد مُرسی کے حامیوں نے آج اتوار کے روز نئے احتجاجی مظاہروں کا اعلان کیا ہے۔ یہ اعلان ایک ایسے وقت میں سامنے آیا ہے جب ملک میں جاری بحران مزید شدید ہوتا جا رہا ہے اور گزشتہ چار دنوں کے دوران محمد مُرسی کے حامیوں کے خلاف سکیورٹی فورسز کے کریک ڈاؤن اور جھڑپوں کے نتیجے میں 750 سے زائد افراد ہلاک ہو چکے ہیں۔

گزشتہ روز ہی پولیس نے قاہرہ کی الفتح مسجد کو مُرسی کے حامیوں سے خالی کروایا تھا۔ نئے اعلان کے مطابق آج نماز ظہر کے بعد قاہرہ کے مشرقی اور مغربی حصے میں دو ریلیاں منعقد کی جائیں گی۔