جمعرات کے روز مصر کے صدر محمد مُرسی نے بیلجیم کے دارالحکومت برسلز میں یورپی کمیشن کے صدر یوزے مانویل باروسو ، یورپی کونسل کے صدر ہیرمان فان رومپوئے اور یورپی یونین کے خارجہ امور کی سربراہ کیتھرین ایشٹن سے ملاقاتیں کیں۔ مصر کی مذہبی تحریک اخوان المسلمون سے تعلق رکھنے والے محمد مُرسی کا یورپی یونین کا یہ پہلا دورہ ہے۔

یورپی کونسل کے صدر ہیرمان فان رومپوئے کا کہنا تھا کہ مصر کے صدر کا دورہ اس بات کی عکاسی کرتا ہے کہ یورپی یونین اور مصر ایک دوسرے ساتھ تعلقات کو بہت زیادہ اہمیت دیتے ہیں۔ ان ملاقاتوں میں عرب ملک شام کا سنگین بحران پر بھی زیر بحث رہا۔ مُرسی کا شام کے حوالے سے کہنا تھا کہ جو صدر اپنے ہی ملک کی عوام کو ہلاک کرنے میں شریک ہو، وہ کسی بھی طور پر حکمرانی کا حق نہیں رکھتا۔ مصری صدر یورپی یونین کے دورے کے بعد اٹلی جائیں گے۔ وہ روم میں اطالوی وزیر اعظم اور صدر سے ملاقاتیں کریں گے۔

یورپی کمیشن کے صدر یوزے مانویل باروسو کے ساتھ بھی مصری صدر نے ملاقات کی۔ بعد میں دونوں لیڈروں نے ایک مشترکہ پریس کانفرنس سے خطاب کے دوران ملاقات میں زیر بحث لائے گئے معاملات پر اظہار خیال کیا۔ برسلز میں پریس کانفرنس سے خطاب کرتے ہوئے یورپی کمیشن کے صدر یوزے مانویل باروسو نے کہا کہ انہیں مختلف معاملات کے حوالے سے مصری صدر کی جانب سے دی جانے والی یقین دہانیوں پر بہت مسرت ہوئی ہے۔ اس موقع پر مصری صدر کا کہنا تھا کہ ان کا ملک کرپشن کے خاتمے کے ساتھ ساتھ قانون کی حکمرانی، مصر کے تمام طبقات کے لیے مساوی حقوق کی ضمانت فراہم اور سب کے لیے جمہوریت کے راستے کو ہموار کرنے کا عمل جاری رکھے گا۔

یورپی کمیشن کے صدر یوزے مانویل باروسو نے بتایا کہ یورپی یونین مصر کے لیے مالیاتی تعاون کو مزید وسعت اور استحکام دینے کا عمل جاری رکھے گی تا کہ جمہوری روایت کو مزید تقویت حاصل ہو سکے۔ باروسو کا کہنا تھا کہ کمیشن کی جانب سے مصر کے لیے 500 ملین یورو کی مالی معاونت پیش کی گئی ہے اور یہ انٹرنیشنل مانیٹری فنڈ کے ساتھ مصری حکومت کے جاری مذاکرات کا حصہ ہے۔ یورپی کمیشن کے صدر نے مالی امداد کے تناظر میں یہ بھی بتایا کہ یورپی یونین اس پر بھی غور کر رہی ہے کہ مصر کے سالانہ بجٹ کے لیے 150 ملین سے 200 ملین تک کی اضافی امداد بھی فراہم کی جائے۔

دوسری جانب مصر کے دارالحکومت قاہرہ میں یورپی یونین اور مصر کے درمیان قائم خصوصی ٹاسک فورس کا دو روزہ اجلاس آج سے شروع ہو رہا ہے۔ اس ٹاسک فورس کے اجلاس کی مناسبت سے یورپی یونین کی خارجہ امور کی چیف کیتھرین ایشٹن کا کہنا ہے کہ یونین مصر میں جمہوری اقدار کو مستحکم دیکھنے کی متمنی ہے۔

(ah/ia(dpa