آپ چند کیلے خریدیں، یا چند سیب، فوراً ہی آپ کا ہاتھ پلاسٹک کے شاپر کی طرف جائے گا۔ ہر جرمن شہری سالانہ اوسطاً 71 پلاسٹک بیگز استعمال کرتا ہے۔ تاہم سو فیصد پلاسٹک سے بنے شاپنگ بیگز کی بجائے اور کئی طرح کے بیگز استعمال کیے جا سکتے ہیں۔

پلاسٹک کے ایک ہی بار استعمال ہونے والے شاپرز عام طور پر ایک سو فیصد کیمیائی مادے پولی تھین سے بنے ہوتے ہیں، جسے معدنی خام تیل سے حاصل کیا جاتا ہے۔ یہ بیگز ماحول کے لیے بے حد ضرر رساں ہوتے ہیں۔ انہیں گل سڑ کر مکمل طور پر تلف ہونے کے لیے چار سو تا پانچ سو سال کا عرصہ درکار ہوتا ہے۔

پلاسٹک سے بنے کچھ شاپنگ بیگز ایسے ہوتے ہیں، جنہیں قابل تجدید کہا جاتا ہے۔ انہیں 70 فیصد خام تیل اور 30 فیصد قابل تجدید خام مادوں سے تیار کیا جاتا ہے۔ انہیں محدود پیمانے پر ہی ری سائیکل کیا جا سکتا ہے۔ دوسری جانب توانائی کے حصول کے لیے مخصوص زرعی فصلوں کی کاشت بھی ایک مشکل عمل ہوتا ہے۔

ایسے شاپرز بھی ہوتے ہیں، جو 70 فیصد تک ری سائیکل کی گئی پولی تھین سے بنے ہوتے ہیں۔ ایسے شاپرز ایک ہی بار استعمال ہونے والے دیگر شاپرز کے مقابلے میں زیادہ ماحول دوست ہوتے ہیں۔ تاہم مسئلہ یہ ہے کہ جرمنی میں زیادہ تر پلاسٹک بیگز ری سائیکلنگ کے عمل سے نہیں گزارے جاتے بلکہ عام کوڑے کرکٹ کے ساتھ پھینک دیے جاتےہیں۔

ایک اعتبار سے دیکھا جائے تو کاغذ سے بنے شاپرز بھی پلاسٹک بیگز سے کچھ زیادہ بہتر نہیں ہیں کیونکہ اُن کی تیاری کے لیے خاص طور پر لمبے اور مضبوط ریشے درکار ہوتے ہیں، جنہیں پہلے کیمیائی مادوں سے دھویا جاتا ہے۔ ایسے شاپرز تب ماحول دوست ہوتے ہیں، جب اِنہیں ری سائیکل شُدہ کاغذ سے تیار کیا گیا ہو۔

سوتی کپڑے، درختوں کی چھال کے ریشوں یا فلیکس سے بنے بیگز مضبوط ہوتے ہیں، ایک سے زیادہ مرتبہ استعمال ہو سکتے ہیں اور یوں ماحول دوست ہوتے ہیں تاہم ا یک ہی بار استعمال ہونے والے شاپرز کے مقابلے میں ان کے لیے زیادہ مواد اور زیادہ توانائی کی ضرورت پڑتی ہے۔ ویسے بھی ان کے لیے درکار پودے بہت سا پانی اور وسائل خرچ کرتے ہیں۔

کیمیائی مادوں پولی پروپین یا پولیسٹر سے بنے ہوئے شاپنگ بیگز، جو ایک سے زیادہ مرتبہ استعمال ہو سکتے ہیں، کپڑے سے بنے شاپرز سے بُرے ہرگز نہیں ہیں۔ پولی پروپین سے بنا شاپر تین بار کے استعمال کے بعد ہی پولی تھین کے کسی ایسے شاپر کے مقابلے میں زیادہ ماحول دوست بن جاتا ہے، جسے ایک ہی بار استعمال کر کے پھینک دیا جاتا ہے۔

پولیسٹر سے تیار کیے گئے ایسے شاپر کو ماحول دوست کہا جا سکتا ہے، جسے ایک سے زیادہ بار استعمال کیا جا سکتا ہو اور جسے تہہ کیا جائے تو وہ ایک ہتھیلی میں پورا آ جاتا ہے۔ اپنے تقریباً تیس گرام وزن کے ساتھ یہ ایک بار استعمال ہونے والے بہت سے پلاسٹک شاپرز سے ہلکا بھی ہوتا ہے، پھر بھی یہ دَس کلوگرام تک وزن اٹھا سکتا ہے۔

واٹر اینڈ سینیٹیشن سروس پشاور(WSSP) نے یہ کنٹینرز شہر کے مختلف ایسے مخصوص مقامات پر رکھے ہیں، جہاں عام شہری آسانی کے ساتھ ان میں گھروں کا کچرا ڈال سکتے ہیں۔

ابتدائی طور پر اس مہم کے پہلے مرحلے پر آٹھ کروڑ تک لاگت آئی ہے، جب کہWSSP کے ڈاریکٹر کے مطابق اس مکمل پروجیکٹ کے لیے کل بیس کروڑ روپے مختص کئے گئے ہیں۔ اس کا دوسرا مرحلہ جلد ہی شروع کیا جا رہا ہے۔

رواں سال عالمی ادارہء صحت کے ایک رپورٹ کے مطابق پشاور دنیا کا چھٹا آلودہ ترین شہر ہے۔ فضائی آلودگی کے علاوہ پشاور میں جگہ جگہ کوڑے اور کچرے کے ڈھیر بھی اس شہر کی خوبصورتی کو متاثر کرتے ہیں۔

مخلتف مقامات، سڑکوں، گلیوں اور بازاروں میں کوڑے کو اکٹھا کرنے کے لیے WSSP اور ضلعی انتظامیہ نے مل کر کچرا اکھٹا کرنے والے اہلکاروں کی بھرتی کے علاوہ شہر میں کوڑے کے لئےمختلف پوائنٹس بھی مختص کیے ہیں۔ تاہم اس میں استعمال ہونے والے پرانے کنٹینرز ڈھکن نہ ہونے کی وجہ سے بدبو کا سبب بن رہے تھے۔

WSSP کے جنرل منیجر ناصرغفور خان کے مطابق یہ پاکستان میں اپنی طرز کی پہلی مہم ہے، جس میں اس قسم کے رنگین آرٹ سے سجائے گئے کنٹینرز کا استعمال کیا گیا ہے۔ وہ کہتے ہیں کہ ان کنٹینرز کو کسی ایک علاقے میں مستقل طور پر نہیں رکھا جائے گا۔ ’’مختص علاقے میں ہر روز نئے رنگ اور آرٹ کا کنٹینر رکھا جائے گا، اور یہ چکر چلتا رہے گا، تاکہ لوگ اس طرف راغب رہیں۔‘‘

کچرے کے ان کنٹینرز کو ایک خاص ڈیزائن کے مطابق بنایا گیا ہے۔ ان پر رنگ سازی اور نقش نگاری کے لیے پشاور کے کچھ نوجوانوں نے رضاکارانہ طور پر اپنی خدمات فراہم کی۔ جن کو حکومت کی طرف سے صرف پینٹ اور دوسرے آلات مہیا کیے گئے۔

شہر میں پہلی مرتبہ جدید طرز پر بنائے گئے، گندگی کو چھپانے والے یہ کنٹینرز اب پشاور کے 151مقامات پر رکھے گئے ہیں۔ ان کنٹینرز کی بروقت نقل وحمل کے لیے معیاری اور جدید گاڑیوں کا استعمال بھی کیا جا رہا ہے۔

دیدہ زیب اور خوبصورت رنگوں سے رنگے، کچرے کے لیے استعمال ہونے والے یہ کنٹینرز شہریوں کے لیے ایک نیا تجربہ ہیں۔ پچپن سالہ خادم حسین سمجھتے ہیں کہ یہ ایک اچھی کاوش ہے۔ ان کے بقول، ’’ان پیارے کوڑا دانوں کو دیکھ کر ہر کوئی ان کو استعمال کرے گا۔‘‘

گندگی یا کوڑا جمع کرنے والے یہ نئے ڈبے یا کنٹینرز مکمل طور پر بند ہیں،جس کی وجہ سے کچرے سے پیدا ہونے والی بدبو پر قابو پایا جاسکتا ہے۔

شہر میں رکھے گئے ان کنٹینرز کو جہاں WSSP کا عملہ روازنہ خالی کراتا ہے، وہیں ان کی نگرانی بھی کی جاتی ہے، تاکہ کسی قسم کے نقص یا مسئلے کو بروقت ختم کیا جاسکے۔

گوکہ یہ صوبائی حکومت کی جانب سے ایک اچھا اقدام ہے اور اس مہم کے پہلے مرحلے میں شہر کے کچھ ہی مقامات پر یہ کنٹینرز رکھے گئے ہیں، تاہم بعض علاقوں کی آبادی زیادہ ہونے کی وجہ سے کوڑا جمع کرنے کے لیے ایک کنٹینر ناکافی سمجھا جا رہا ہے۔