معین علی کو ’اسامہ‘ کہنے کی تفتیش کریں گے، کرکٹ آسٹریلیا
15 ستمبر 2018
برطانوی آل راؤنڈر معین علی کے مطابق سن 2015 میں کھیلی جانے والی ایشز سیریز کے دوران ایک میچ میں ایک آسٹریلوی کھلاڑی نے ان کو ’اسامہ‘ کہہ کر پکارا تھا۔ آسٹریلوی کرکٹ بورڈ نے اس بارے میں ’ای سی بی‘ سے وضاحت طلب کی ہے۔
تصویر: Reuters/P. Childs
اشتہار
معین علی، مسلم عقیدے سے تعلق رکھنے والے برطانوی آل راؤنڈر نے اپنی سوانح عمری میں بتایا ہے کہ ایشز سیریز 2015ء میں برطانیہ کے شہر کارڈف میں ان کے پہلے ٹیسٹ میچ کے دوران ’ایک آسٹریلوی کھلاڑی نے ان کو دہشت گرد تنظیم القاعدہ کے رہنما ’اسامہ بن لادن‘ کے نام سے پکارا تھا۔‘
معین علی کی آپ بیتی برطانوی اخبار ’دی ٹائمز‘ میں سیریز کی صورت میں شائع کی جارہی ہے۔ اس واقع کو یاد کرتے ہوئے معین نے لکھا کہ ’ایک آسٹریلوی کھلاڑی نے مجھ سے مخاطب ہو کر کہا کہ ’اسامہ، یہ پکڑو‘۔ مجھے یقین نہیں آیا کہ میں کیا سن رہا ہوں۔ مجھے یاد ہے، میرا چہرا سرخ ہوگیا اور مجھے کرکٹ میدان پر کبھی اتنا غصہ نہیں آیا‘۔
تصویر: Reuters/P. Childs
برطانوی آل راؤنڈر نے لکھا ہے کہ انہوں نے چند ساتھی کھلاڑیوں کو اس بارے میں بتایا تھا۔ بعد ازاں برطانوی کوچ ٹریور بیلس نے اس حوالے سے آسٹریلوی کوچ ڈیرن لیہمن سے رجوع کیا۔ معین علی کے مطابق جب آسٹریلوی کوچ نے اس کھلاڑی سے دریافت کیا تو اس نے صاف انکار کردیا۔
کھیل کی دنیا میں رنگ، عقیدے، جنس یا پھر نسل پرستی کے الزامات کو بہت سنجیدگی سے لیا جاتا ہے۔ کرکٹ آسٹریلیا کے ایک اہلکار نے نیوز ویب سائٹ (cricket.com.au) سے بات کرتے ہوئے انگلش اور ویلز کرکٹ بورڈ سے مزید تفصیلات طلب کرنے کا اظہار کیا۔ کرکٹ آسٹریلیا کے ترجمان نے مزید بتایا کہ ’اس نوعیت کے تاثرات ناقابل قبول ہیں اور کھیل میں اس کی کوئی جگہ نہیں۔‘
ع آ / ع ب (روئٹرز)
بین الاقوامی کرکٹ کے متنازع ترین واقعات
آسٹریلوی کرکٹ ٹیم کا حالیہ بال ٹیمپرنگ اسکینڈل ہو یا ’باڈی لائن‘ اور ’انڈر آرم باؤلنگ‘ یا پھر میچ فکسنگ، بین الاقوامی کرکٹ کی تاریخ کئی تنازعات سے بھری پڑی ہے۔ دیکھیے عالمی کرکٹ کے چند متنازع واقعات اس پکچر گیلری میں۔
تصویر: REUTERS
2018: آسٹریلوی ٹیم اور ’بال ٹیمپرنگ اسکینڈل‘
جنوبی افریقہ کے خلاف ’بال ٹیمپرنگ‘ اسکینڈل کے نتیجے میں آسٹریلوی کرکٹ بورڈ نے کپتان اسٹیون اسمتھ اور نائب کپتان ڈیوڈ وارنر پرایک سال کی پابندی عائد کردی ہے۔ کیپ ٹاؤن ٹیسٹ میں آسٹریلوی کھلاڑی کیمرون بن کروفٹ کو کرکٹ گراؤنڈ میں نصب کیمروں نے گیند پر ٹیپ رگڑتے ہوئے پکڑ لیا تھا۔ بعد ازاں اسٹیون اسمتھ اور بن کروفٹ نے ’بال ٹیمپرنگ‘ کی کوشش کا اعتراف کرتے ہوئے شائقین کرکٹ سے معافی طلب کی۔
تصویر: picture alliance/AP Photo/H. Krog
2010: اسپاٹ فکسنگ، پاکستانی کرکٹ کی تاریخ کی بدترین ’نو بال‘
سن 2010 میں لندن کے لارڈز کرکٹ گراؤنڈ پر سلمان بٹ کی کپتانی میں پاکستانی فاسٹ باؤلر محمد عامر اور محمد آصف نے جان بوجھ کر ’نوبال‘ کروائے تھے۔ بعد میں تینوں کھلاڑیوں نے اس جرم کا اعتراف کیا کہ سٹے بازوں کے کہنے پر یہ کام کیا گیا تھا۔ سلمان بٹ، محمد عامر اور محمد آصف برطانیہ کی جیل میں سزا کاٹنے کے ساتھ پانچ برس پابندی ختم کرنے کے بعد اب دوبارہ کرکٹ کھیل رہے ہیں۔
تصویر: AP
2006: ’بال ٹیمپرنگ کا الزام‘ انضمام الحق کا میچ جاری رکھنے سے انکار
سن 2006 میں پاکستان کے دورہ برطانیہ کے دوران اوول ٹیسٹ میچ میں امپائرز کی جانب سے پاکستانی ٹیم پر ’بال ٹیمپرنگ‘ کا الزام لگانے کے بعد مخالف ٹیم کو پانچ اعزازی رنز دینے کا اعلان کردیا گیا۔ تاہم پاکستانی کپتان انضمام الحق نے بطور احتجاج ٹیم میدان میں واپس لانے سے انکار کردیا۔ جس کے نتیجے میں آسٹریلوی امپائر ڈیرل ہارپر نے انگلینڈ کی ٹیم کو فاتح قرار دے دیا۔
تصویر: Getty Images
2000: جنوبی افریقہ کے کپتان ہنسی کرونیے سٹے بازی میں ملوث
سن 2000 میں بھارت کے خلاف کھیلے گئے میچ میں سٹے بازی کے سبب جنوبی افریقہ کے سابق کپتان ہنسی کرونیے پر تاحیات پابندی عائد کردی گئی۔ دو برس بعد بتیس سالہ ہنسی کرونیے ہوائی جہاز کے ایک حادثے میں ہلاک ہوگئے تھے۔ ہنسی کرونیے نے آغاز میں سٹے بازی کا الزام رد کردیا تھا۔ تاہم تفتیش کے دوران ٹیم کے دیگر کھلاڑیوں نے اس بات کا اعتراف کیا کہ کپتان کی جانب سے میچ ہارنے کے عوض بھاری رقم کی پشکش کی گئی تھی۔
تصویر: Getty Images/AFP/A. Zieminski
2000: میچ فکسنگ: سلیم ملک پر تاحیات پابندی
سن 2000 ہی میں پاکستان کے سابق کپتان سلیم ملک پر بھی میچ فکسنگ کے الزام کے نتیجے میں کرکٹ کھیلنے پر تاحیات پابندی عائد کی گئی۔ جسٹس قیوم کی تفتیشی رپورٹ کے مطابق سلیم ملک نوے کی دہائی میں میچ فکسنگ میں ملوث پائے گئے تھے۔ پاکستانی وکٹ کیپر راشد لطیف نے سن 1995 میں جنوبی افریقہ کے خلاف ایک میچ کے دوران سلیم ملک کے ’میچ فکسنگ‘ میں ملوث ہونے کا انکشاف کیا تھا۔
تصویر: Getty Images/AFP
1981: چیپل برادران اور ’انڈر آرم‘ گیندبازی
آسٹریلوی گیند باز ٹریور چیپل کی ’انڈر آرم باؤلنگ‘ کو عالمی کرکٹ کی تاریخ میں ’سب سے بڑا کھیل کی روح کے خلاف اقدام‘ کہا جاتا ہے۔ سن 1981 میں میلبرن کرکٹ گراؤنڈ پر نیوزی لینڈ کے خلاف آخری گیند ’انڈر آرم‘ دیکھ کر تماشائی بھی دنگ رہ گئے۔ آسٹریلوی ٹیم نے اس میچ میں کامیابی تو حاصل کرلی لیکن ’فیئر پلے‘ کا مرتبہ برقرار نہ رکھ پائی۔
تصویر: Getty Images/A. Murrell
1932: جب ’باڈی لائن باؤلنگ‘ ’سفارتی تنازعے‘ کا سبب بنی
سن 1932 میں برطانوی کرکٹ ٹیم کا دورہ آسٹریلیا برطانوی کپتان ڈگلس جارڈین کی ’باڈی لائن باؤلنگ‘ منصوبے کی وجہ سے مشہور ہے۔ برطانوی گیند باز مسلسل آسٹریلوی بلے بازوں کے جسم کی سمت میں ’شارٹ پچ‘ گیند پھینک رہے تھے۔ برطانوی فاسٹ باؤلر ہیرالڈ لارووڈ کے مطابق یہ منصوبہ سر ڈان بریڈمین کی عمدہ بلے بازی سے بچنے کے لیے تیار کیا گیا تھا۔ تاہم یہ پلان دونوں ممالک کے درمیان ایک سفارتی تنازع کا سبب بن گیا۔
