شمالی مقدونیہ کے وزیر داخلہ پنچے ٹوشکووسکی نے ایک پریس کانفرنس کے دوران بتایا کہ آتش زدگی کا یہ واقعہ ملک کے ایک جنوبی شہر کوچانی میں آج اتوار 16 مارچ کو علی الصبح پیش آیا۔ اس واقعے میں اب تک 51 افراد کی ہلاکت جبکہ ایک سو سے زائد دیگر کے زخمی ہونے کی اطلاع ہے۔

وزیر داخلہ کے مطابق ایک مقامی پاپ گروپ کے کنسرٹ کے دوران یہ آگ مقامی وقت کے مطابق صبح 2:35 پر بھڑکی۔ ان کا کہنا تھا نوجوانوں کی طرف سے فائر ورکس کے استعمال کے سبب چھت نے آگ پکڑ لی۔

جدید شہروں میں آگ تیزی سے کیوں پھیلتی ہے اور سدباب کیا ہے؟

جرمنی میں آتش بازی کے دوران مختلف حادثات میں پانچ افراد ہلاک

سوشل میڈیا پر موجود ویڈیو میں کنسرٹ ہال کے اندر افراتفری دیکھی جا سکتی ہے۔

'ناقابل تلافی نقصان‘

خبر رساں ادارے ایسوسی ایٹڈ پریس کے مطابق کلب میں موجود افراد کے اہل خانہ ہسپتالوں کے باہر جمع ہیں اور کوچانی کی مقامی انتظامیہ سے معلومات فراہم کرنے کی درخواست کر رہے ہیں۔

شمالی مقدونیہ کے وزیر داخلہ پنچے ٹوشکووسکی کے مطابق پولیس نے ایک شخص کو گرفتار کیا ہے، تاہم انہوں نے اس بارے میں مزید کوئی تفصیل نہیں بتائی۔

شمالی میسیڈونیا کے وزیر اعظم خِرسٹیان مِٹکوسووکی نے سوشل میڈیا پلیٹ فارم ایکس پر لکھا، ''یہ میسیڈونیا کے لیے ایک مشکل اور دکھ بھرا دن ہے۔ اتنے زیادہ نوجوان لوگوں کی زندگی جانے کا نقصان ناقابل تلافی ہے، اور خاندانوں، پیار کرنے والوں اور دوستوں کا نقصان ناقابل تلافی ہے۔‘‘

ا ب ا/ک م (اے پی، اے ایف پی)