امریکی صدر ڈونلڈ ٹرمپ نے کہا ہےکہ شمالی کوریا کے رہنما کم جونگ اُن سے ملاقات مجوزہ تاریخ پر اب بھی ممکن ہے۔ اس سے قبل جمعرات 24 مئی کو  اپنے ایک مراسلے میں ڈونلڈ ٹرمپ نے اس ملاقات کی منسوخی کا اعلان کیا تھا۔

تاہم جمعہ 25 مئی کو واشنگٹن میں صحافیوں سے غیررسمی گفت گو میں صدر ٹرمپ نے کہا کہ شمالی کوریا یہ ملاقات چاہتا ہے اور امریکی خواہش بھی یہی ہے۔ ٹرمپ کا کہنا تھا کہ اگر یہ ملاقات ہوتی ہے، تو وہ 12 جون کو سنگاپور ہی کے مقام پر یہ ملاقات کرنا چاہیں گے۔

پولیٹیکو میگزین کے مطابق وائٹ ہاؤس اور امریکی محکمہ خارجہ سے تعلق رکھنے والے 30 اہلکاروں کی ایک ایڈوانس ٹیم اسی ویک اینڈ پر سنگاپور جا رہی ہے۔ یہ اہلکار شمالی کوریا کے حکام کے ساتھ اس متوقع سربراہی ملاقات کے حوالے سے ایجنڈا اور دیگر تفصیلات طے کریں گے۔

امریکی صدر ڈونلڈ ٹرمپ کی طرف سے جمعہ کی شب اپنی ایک ٹوئیٹ میں کہا گیا، ’’ہماری اس سربراہی اجلاس کی بحالی کے بارے میں مثبت بات چیت ہوئی ہے۔ اگر یہ ملاقات ہوتی ہے تو زیادہ امکان یہی ہے کہ یہ سنگاپور میں ہی ہو گی اور اُسی تاریخ یعنی 12 جون کو۔ اور اگر ضروری ہوا تو ہم اس تاریخ کو آگے بھی بڑھا سکتے ہیں۔‘‘

شمالی کوریا کے رہنما سے کسی امریکی صدر کی اس طرز کی ممکنہ ملاقات غیرمعمولی اور تاریخی قرار دی جا رہی ہے، جس میں ممکنہ طور کوریائی خطے میں جوہری ہتھیاروں کے خاتمے جیسی پیش رفت سامنے آ سکتی ہے۔

ا ب ا / ع ح (روئٹرز)