طالبان کے عبوری رہنما عصمت اللہ شاہین نے شمال مغربی پاکستان کے ایک نامعلوم مقام سے ایک پریس کانفرنس میں کہا:’’اب فضل اللہ TTP (تحریک طالبان پاکستان) کا نیا سربراہ ہے۔ یہ فیصلہ آج شوریٰ کے ایک اجلاس کے موقع پر کیا گیا ہے۔‘‘

ساتھ ہی اس عسکریت پسند تنظیم نے حکومتِ پاکستان کے ساتھ امن مذاکرات نہ کرنے کا بھی اعلان کیا ہے۔ ٹی ٹی پی کے ترجمان شاہد اللہ شاہد نے کہا:’’اب کوئی مذاکرات نہیں ہوں گے کیونکہ ملاّ فضل اللہ پہلے ہی پاکستانی حکومت کے ساتھ بات چیت کے خلاف ہے۔‘‘

ملاّ فضل اللہ نے ہی 2007ء سے لے کر 2009ء تک پاکستان کی شمال مغربی وادیء سوات پر طالبان کے دو سالہ آمرانہ دورِ اقتدار کی قیادت کی تھی۔ اس دوران اس علاقے میں اسلامی شرعی قوانین نافذ کیے گئے تھے اور سرِ عام سر قلم کرنے، جرائم کے مرتکب افراد کو کوڑے مارنے اور تعلیمی اداروں کو تباہ کرنے کے واقعات ایک معمول بن گئے تھے۔

اس جابرانہ دور کو بعد ازاں پاکستانی فوج نے ایک آپریشن کرتے ہوئے ختم کیا تھا اور اس وادی پر پاکستانی حکومت کا کنٹرول پھر سے بحال کیا تھا۔ اس اعلان کی خوشی میں قبائلی علاقے شمالی وزیرستان کے مرکزی شہر میران شاہ میں طالبان کارکنوں اور حامیوں نے کُھل کر ہوائی فائرنگ کی۔

اس سے پہلے مجلسِ شوریٰ کے اجلاس میں جن پانچ افراد کے ناموں پر غور کیا گیا، اُن میں ملاّ فضل اللہ کے ساتھ ساتھ خان سید سجنا، شیخ خالد حقانی، عمر خالد خراسانی اور حافظ سعید شامل تھے۔ شوریٰ نے کثرتِ رائے سے ملاّ فضل اللہ کو اپنا نیا امیر منتخب کر لیا۔ تحریک طالبان کی مجلسِ شوریٰ بیس سے پچیس اراکین پر مشتمل ہے۔ اس میں طالبان کے تمام گروپوں کی نمائندگی ہوتی ہے۔

ملا فضل اللہ کے سر کی قیمت حکومت پاکستان نے پہلے پچاس لاکھ روپے مقرر کی تھی، جسے بعد ازاں بڑھا کر پانچ کروڑ کر دیا گیا تھا۔ فضل اللہ نے سن 2009 میں فوجی آپریشن کے دوران فرار ہو کر افغان صوبے کنڑ پناہ لی تھی اور اطلاعات کے مطابق وہ ابھی بھی کنڑ اور نورستان صوبے میں کہیں مقیم ہے۔

افغان صوبے کنڑ سے ملحقہ سرحد کے دورے سے واپسی پر ہی پاکستانی فوج کے میجر جنرل ثنا اللہ نیازی کو ایک بم دھماکے میں ہلاک کر دیا گیا تھا۔ اس حملے کو بھی ملا فضل اللہ کے کارکنوں کی کارروائی خیال کیا جاتا ہے۔

گزشتہ جمعے کے روز حکیم اللہ محسود اُس وقت ایک امریکی ڈرون حملے میں مارا گیا تھا، جب اسلام آباد حکومت کے نمائندے امن مذاکرات شروع کرنے کی غرض سے ٹی ٹی پی کے ساتھ ملاقات کی تیاریاں کر رہے تھے۔

اس ڈرون حملے پر پاکستانی حکومت کی جانب سے شدید رد عمل سامنے آیا تھا اور پاکستانی وزیر داخلہ چوہدری نثار علی خان نے واشنگٹن حکومت پر الزام عائد کیا تھا کہ وہ امن کی کوششوں کو سبوتاژ کر رہی ہے۔