تاہم مختلف ذرائع ابلاغ ہلاک شدگان کی تعداد ایک سو بتارہے ہیں جبکہ زخمیوں کی تعداد 250 سے تجاوز کرگئی ہے۔ ممبئی پولیس اورمقامی ذرائع ابلاغ کے مطابق بھاری اسلحہ سے لیس نامعلوم افراد نے جنوبی ممبئی کے سات مختلف مقامات پرفائرنگ کی۔ ان مقامات میں ممبئی کا مشہور تاج ہوٹل، اوبرائے ہوٹل اورچھتراپتی شیواجی ریلوے اسٹیشن شامل ہیں۔

ریلوے کمشنر کے مطابق چھترا پتی شیواجی ریلوے اسٹیشن میں دوافراد نے مسافروں کے لاؤنج میں داخل ہوتے ہی فائرنگ شروع کردی، جس سے تقریبا دس افراد موقع پر ہلاک اور تیس کے زخمی ہونے کی اطلاع ہے۔ جبکہ ڈاک یارڈ روڈ پرفائرنگ میں تین، اور تاج ہوٹل میں بھی تین افراد ہلاک ہوئے۔

ایسی اطلاعات بھی ہیں کہ تاج ہوٹل میں ہلاک ہونے والے تمام افراد ہوٹل کے ملازمین تھے، جبکہ دوسری جانب یہ بھی کہا جا رہا کہ تاج ہوٹل میں ہلاک ہونے والوں میں کئی غیر ملکی بھی شامل ہیں۔

غیرمصدقہ اطلاعات کے مطابق مسلح افراد نے اوبرائے اور تاج ہوٹل میں کچھ افراد کو یرغمالی بھی بنایا ہوا ہے۔ فائرنگ کے واقعات میں زخمی ہونے والوں میں کئی ایک کی حالت نازک بتائی جاتی ہے۔

شہرمیں سیکیورٹی سخت کر دی گئی ہے اور اعلی پولیس افسران جائے وقوعہ پر پہنچ چکے ہیں۔