پروگرام کے ٹریلر میں اڑسٹھ سالہ نریندر مودی کو شمالی بھارت میں قائم ایک نیشنل پارک میں گرائلز کے ساتھ گھومتے دکھایا گیا ہے۔ اس وڈیو میں ان کے آس پاس ایک ٹائیگر اور ہاتھیوں سمیت ہرنوں کا گلہ بھی بھاگتا ہوا دیکھا جا سکتا ہے۔ شمالی بھارت میں واقع اس نیشنل پارک کا نام آدم خور شیروں کے مشہور شکاری جم کاربٹ کے نام سے منسوب ہے۔

ٹریلر میں بیئر گرائلز بھارتی وزیراعظم سے کہتے ہیں کہ چونکہ وہ بھارت کی انتہائی اہم شخصیت ہیں اس لیے اُن کا تحفظ وہ اپنی ذمہ داری سمجھتے ہیں۔ اس کے جواب میں نریندر مودی کہتے ہیں کہ وہ جنگلات کی دنیا سے بخوبی آگاہ ہیں کیونکہ وہ قدرتی ماحول میں پلے بڑھے ہیں۔ مودی کے مطابق وہ برسوں تک پہاڑوں اور جنگلات کے قدرتی ماحول میں زندگی بسر کرتے رہے، اس لیے ان کی اہمیت سے بخوبی واقف ہیں۔

دنیا میں بھارت کی بڑھتی ہوئی آبادی اور جنگلات کے کٹاؤ پر خاصی تشویش پائی جاتی ہے۔ درختوں کی بےدریغ کٹائی کی وجہ سے جنگلاتی حیات میں کمی واقع ہو رہی ہے۔ صرف جنگل کے جانور ہی نہیں بلکہ نایاب جڑی بوٹیاں بھی ناپید ہوتی جا رہی ہے۔

گرائلز کا کہنا ہے کہ اُن کا یہ پروگرام بھارت کی جنگلاتی حیات کی بھرپور عکاسی کرے گیا۔ ان کا کہنا ہے کہ پروگرام میں لوگ دیکھ سکیں گے کہ نریندر مودی کس طرح خود قدرتی ماحول کے تحفظ کے لیے جنگلوں میں جا کر اس آگہی مہم کا حصہ بنے۔ بھارتیہ جنتا پارٹی کے کارکنوں اور مودی کے چاہنے والوں میں ان کی شخصیت کے اس پہلو کو دیکھ کر تجسس اور خوشگوار حیرت پائی جاتی ہے۔

بھارت میں مودی کی ڈسکوری پروگرام میں شرکت کسی حد تک متنازعہ ہو چکی ہے۔ اس پروگرام کی عکاسی رواں برس چودی فروری کو کی گئی تھی۔ چودہ فروری ہی پلوامہ میں کیے گئے خودکش حملے کا دن ہے اور اس حملے میں چالیس بھارتی فوجی مارے گئے تھے۔ یہ ایک معمہ تھا کہ اس حملے کے وقت مودی بطور وزیراعظم ایسی کون سی مصروفیات میں شریک تھے کہ انہیں حملے کی اطلاع نہیں مل سکی اور ردعمل بھی فوراً سامنے نہیں آیا تھا۔

 اب یہ واضح ہوا ہے کہ پلوامہ حملے کے دن تین بجے سے لے کر شام سات بجے تک مودی ڈسکوری چینل کے پروگرام کی عکاسی میں مصروف تھے۔ انہیں اترا کھنڈ کے کاربٹ نیشنل پارک میں سے شام کو نکلتے دیکھا گیا اور اُسی وقت انہیں پلوامہ حملے کے بارے میں مطلع کیا گیا تھا۔ اندازہ لگایا گیا ہے کہ مودی کو عوامی اور سیاسی ردعمل کا سامنا ہو سکتا ہے۔

برطانوی مہم جُو بیئز گرائلز کا ڈسکوری چینل پریہ خصوصی پروگرام 'مین ورسز وائلڈ‘ (انسان بمقابلہ جنگلی حیات) میں بارہ اگست سے  نشر کیا جائے گا۔

ع ح، ش ج، نیوز ایجنسیاں