تقسیم ہند کے بعد سے یہ پہلا موقع ہو گا کہ دونوں پڑوسی ممالک میں سے ایک کا وزیر اعظم دوسرے ملک کے سربراہ حکومت کی تقریب حلف برداری میں شرکت کرے گا۔ پاکستانی دفتر خارجہ کے ہفتے کے روز جاری کردہ بیان کے مطابق وزیر اعظم نواز شریف اپنے آئندہ بھارتی ہم منصب کی تقریب حلف برداری میں شرکت کے لیے 26 مئی کو نئی دہلی جائیں گے۔

بتایا گیا ہے کہ نواز شریف 27 مئی کو نریندر مودی کے علاوہ بھارتی صدر پرنب مکھرجی سے بھی ملاقات کریں گے اور اسی روز سہ پہر کے وقت واپس پاکستان پہنچ جائیں گے۔ امور خارجہ کے مشیر سرتاج عزیز، امور خارجہ کے معاون خصوصی طارق فاطمی اور وزارت خارجہ کے سیکرٹری اس دورے کے دوران پاکستانی وزیر اعظم کے ہمراہ ہوں گے۔

پاکستانی قومی اسمبلی میں قائد حزب اختلاف سید خورشید شاہ نے سرکاری ٹیلی وژن کے ساتھ گفتگو کرتے ہوئے نواز شریف کے بھارت جانے کے فیصلے کا خیر مقدم کیا اور کہا کہ اس طرح ہمسایہ ملکوں کے درمیان غلط فہمیوں کو دور کرنے میں مدد ملے گی۔ اس موقع پر خورشید شاہ کا کہنا تھا، ’’میں ان کے ساتھ جاؤں گا۔ ہم دکھائیں گےکہ سیاست ہماری پاکستان میں ہے۔ پارلیمنٹ کے اندر ہے۔ دنیا میں، باہر میرا وطن پاکستان ہے۔‘‘

جمعیت علمائے اسلام کے سربراہ اور پاکستانی پارلیمان کی کشمیر کمیٹی کے سربراہ مولانا فضل الرحمان نے کہا کہ وزیر اعظم نواز شریف کا فیصلہ پڑوسی ممالک کے مابین جذبہء خیر سگالی کا مظہر ہے۔ حکمران جماعت مسلم لیگ (ن) کے سینیٹر رفیق رجوانہ نے کہا کہ نواز شریف کے دورہء بھارت سے دونوں ممالک کے باہمی تعلقات میں بہتری آئے گی اور عوام کو فائدہ ہو گا۔

ڈی ڈبلیو سے بات چیت کرتے ہوئے انہوں نے کہا، ’’مذاکرات کے ذریعے ٹیبل پر بیٹھ کر جو حل ہو گا، وہ اس ملک کے کروڑوں عوام کے حق میں ہو گا اور غربت کا حل بھی ہوگا، یوں غربت کے خاتمے میں پیشرفت ہوگی۔‘‘

دوسری طرف ممبئی حملوں کے الزام میں بھارت کو مطلوب کالعدم تنظیم جماعت الدعوہ کے امیر حافظ سعید احمد نے پاکستانی وزیر اعظم کے بھارت جانے کے فیصلے پر افسوس ظاہر کرتے ہوئے کہا کہ اس فیصلے پر نظرثانی کی جانی چاہیے۔ کراچی ایئر پورٹ پر صحافیوں کے ساتھ گفتگو میں حافظ سعید نے کہا کہ ’مودی کے دامن پر مظلوم بھارتی مسلمانوں کے خون کے دھبے‘ ہیں۔

حافظ سعید نے دعویٰ کیا کہ یہ ’ فیصلہ قومی غیرت کا آئینہ دار نہیں ہے۔ ان کو یہ سمجھنا چاہیے کہ وہ پاکستان کے وزیر اعظم ہیں تو پاکستان کے عوام کیا چاہتے ہیں۔ پاکستان کا مفاد کس میں ہے؟ محض امریکا اور بھارت کو خوش کرنے کے لیے ایسے فیصلے کسی شکل میں بھی مناسب نہیں ہوں گے۔‘‘

مبصرین کا کہنا ہےکہ بھارت اور پاکستان کے درمیان کشمیر، سیاچن، سر کریک کے دیرینہ تنازعات کے علاوہ پانی کی تقسیم اور سرحدوں پر فائرنگ کے واقعات جیسے حل طلب مسائل موجود ہیں۔ تاہم دونوں ممالک میں تجارتی تعلقات کے فروغ کا رجحان پایا جاتا ہے جس کا فائدہ دونوں طرف کے عوام کو پہنچ سکتا ہے۔

اسلام آباد میں قائم تھنک ٹینک جناح انسٹیٹیوٹ کی سربراہ اور پیپلز پارٹی کی رہنما شیری رحمان کا کہنا ہے کہ ابھی نواز شریف کے دورہء بھارت سے زیادہ توقعات وابستہ نہیں کی جانی چاہییں۔ انہوں نے کہا، ’’ایک دم، آپ راتوں رات کوئی تبدیلی نہ سمجھیں کہ دونوں ممالک میں آ جائے گی۔ یہ ایک آغاز ہے اور دوسری طرف تاریخی مینڈیٹ ہے۔ ان پر بھی لیڈر شپ کا ایک بڑا بوجھ ہے۔‘‘