مودی کی مقبولیت ٹرمپ سے بھی زیادہ، لیکن فیس بُک پر
2 مئی 2018
ایک تازہ تحقیقی جائزے کے مطابق سماجی رابطوں کی ویب سائٹ فیس بُک پر بھارتی وزیر اعظم نریندر مودی دنیا بھر میں پہلے، جب کہ امریکی صدر عالمی رہنماؤں کی فہرست میں دوسرے نمبر پر ہونے کے باوجود مودی سے بہت پیچھے ہیں۔
تصویر: Reuters/K. Lamarque
اشتہار
فیس بُک کی دنیا میں پسندیدہ ترین عالمی رہنما
فیس بُک اگر کوئی ملک ہوتا تو ماہانہ 2.2 بلین متحرک صارفین کے ساتھ یہ آبادی کے اعتبار سے چین کو پیچھے چھوڑ کر دنیا کا سب سے بڑا ملک قرار پاتا۔ فیس بُک کی دنیا میں پسندیدہ ترین رہنما کون ہے؟ دیکھیے اس پکچر گیلری میں۔
تصویر: picture-alliance/Zuma Press
بھارتی وزیر اعظم نریندر مودی پہلے نمبر پر
175 ممالک کے سربراہان مملکت، حکومتی وزرا اور اداروں کے فیس بُک اکاؤنٹس میں سے مودی تینتالیس ملین مداحوں کے ساتھ دنیا میں پہلے نمبر پر ہیں۔ بھارتی وزارت عظمیٰ کا آفیشل فیس بُک پیچ بھی ٹاپ ٹین میں شامل ہے۔ مودی کی پوسٹ کی گئی ایک تصویر کو 1.1 ملین لائکس ملے۔
تصویر: picture-alliance/Zuma Press
امریکی صدر ڈونلڈ ٹرمپ پیچھے رہ گئے
صدر ٹرمپ کو شاید فیس بُک پر وزیر اعظم مودی کی برتری تو شاید پسند نہ ہو، لیکن وہ مودی سے دگنی پوسٹس کرتے ہوئے ’انٹریکشن ریٹ‘ کے حوالے سے مودی کو پچھے چھوڑ چکے ہیں۔ ٹرمپ کی اپنے اہل خانہ کے ساتھ کھینچی گئی تصویروں کو فیس بُک پر زیادہ پذیرائی ملتی ہے۔
تصویر: picture alliance/dpa/R. Ellis
اردن کہ ملکہ رانیا، فیس بُک پر عرب دنیا کی بھی ملکہ
اردن کی ملکہ رانیا کو فیس بُک پر پسند کرنے والوں کی تعداد میں ایک برس کے دوران 56 فیصد اضافہ ہوا۔ سولہ ملین فینز کے ساتھ وہ عرب دنیا میں پہلے نمبر پر ہیں۔ انہیں پسند کرنے والے صرف اردنی باشندے ہی نہیں، بلکہ کئی دیگر عرب ممالک کے شہری بھی انہیں سوشل میڈیا پر پسند کرتے ہیں۔ ویسے اردن میں فیس بُک صارفین کی مجموعی تعداد 5.3 ملین ہے۔
تصویر: imago/Xinhua
کمبوڈیا کے وزیراعظم ہون سن
کمبوڈیا کے وزیر اعظم ہون سن (تصویر میں دائیں) کا پیج لائیک کرنے والوں کی تعداد میں ایک برس کے دوران پچاس فیصد اضافہ ہوا اور اب ان کے فیس بُک فینز کی تعداد 9.6 ملین ہے۔ عالمی رہنماؤں کی درجہ بندی میں تو وہ پانچویں نمبر پر ہیں لیکن دلچسپ بات یہ ہے کہ یہ تعداد کمبوڈیا بھر میں فیس بک صارفین کی تعداد (7.1 ملین) سے بھی زیادہ ہے۔
تصویر: picture-alliance/dpa/M. Remissa
ترک صدر رجب طیب ایردوآن – یورپ میں پہلے نمبر پر
صدر ایردوآن کا ملک ترکی یورپی یونین کا ابھی تک رکن نہیں بن پایا لیکن فیس بُک پر ایردوآن کے چاہنے والوں کی تعداد 8.9 ملین ہے جو کسی بھی دوسرے یورپی ملک کے رہنما سے زیادہ ہے۔ ان کے بعد ملکہ برطانیہ کا نمبر آتا ہے جن کے فیس بُک کو ساڑھے چار ملین لوگ پسند کرتے ہیں۔
تصویر: Reuters/M. Cetinmuhurdar
میرکل و ماکروں کدھر رہے؟
جرمن چانسلر انگیلا میرکل اور فرانسیسی صدر ایمانویل ماکروں فیس بُک کی دنیا میں کچھ نمایاں کارکردگی کا مظاہرہ نہیں کر پائے۔ میرکل کا فیس بُک پیچ صرف ڈھائی ملین لوگ پسند کرتے ہیں جب کہ ماکروں کے فیس بُک پر مداحوں کی تعداد 2.1 ملین ہے۔ تاہم ماکروں نے ٹرمپ کے عالمی ماحولیاتی معاہدے سے نکلنے کے اعلان کے جواب میں جو ویڈیو پیغام جاری کیا، اس کی مقبولیت کا مقابلہ ٹرمپ اور مودی بھی نہ کر پائے۔
تصویر: picture-alliance/AP Photo/M. Sohn
انڈونیشیا کے صدر جوکو ویدودو
انڈونیشیا کے صدر جوکو ویدودو کو فیس بُک پر ’لائیک‘ کرنے والوں کی تعداد 8.1 ملین ہے۔ ان کے مقابلے میں ہمسایہ ملک ملائیشیا کے وزیراعظم نجیب رزاق کے فالوورز کی تعداد صرف 3.3 ملین ہے۔
تصویر: picture alliance/abaca/H. Sabawoon
مصری صدر عبدالفتاح السیسی
اردنی ملکہ کے بعد السیسی عرب دنیا میں دوسرے نمبر پر ہیں اور ان کا پیج پسند کرنے والوں کی تعداد 7.2 ملین ہے۔ یوں وہ دبئی کے امیر شیخ محمد بن راشد المکتوم سے کہیں آگے ہیں جو 3.7 ملین مداحوں کے ساتھ عرب دنیا میں السیسی کے بعد تیسرے نمبر پر براجمان ہیں۔
تصویر: Reuters/The Egyptian Presidency
جسٹن ٹروڈو کے مداح تو کم، لیکن دل زیادہ جیتے
کینیڈا کے وزیر اعظم جسٹن ٹروڈو کا فیس بُک پیج پسند کرنے والوں کی تعداد 5.8 ملین ہے۔ لیکن گزشتہ برس رمضان کے حوالے سے کینیڈین مسلمانوں کے لیے ان کے پیغام کی ویڈیو کو ساڑھے بارہ ملین لوگوں نے دیکھا اور قریب ایک ملین نے اس پر لائیک، شیئر یا کمنٹ بھی کیا۔ اسی طرح شامی مہاجر بچی کو خوش آمدید کہتے ہوئے ان کی تصویر نے بھے لاکھوں دل جیتے۔
تصویر: picture-alliance/empics/J. Tang
نیوزی لینڈ کی وزیراعظم سے سب سے زیادہ ’محبت‘
نیوزی لینڈ کی وزیر اعظم جاسیندا آردرن خاص طور پر اپنا پیج چلانے میں کافی متحرک ہیں اور اکثر فیس بُک لائیو کے ذریعے عوام سے رابطے میں رہتی ہیں۔ ان کی ویڈیوز پر ’انگوٹھے سے پسند‘ کی بجائے ’سرخ دل سے پسند‘ کی تعداد چودہ فیصد رہی۔
تصویر: picture-alliance/dpa/D.Munoz
10 تصاویر1 | 10
فیس بُک پر بھارتی وزیر اعظم نریندر مودی کے مداحوں کی تعداد میں مسلسل اضافہ ہو رہا ہے اور گزشتہ ایک برس میں گیارہ فیصد مزید اضافے کے ساتھ مودی کا فیس بک پیج پسند کرنے والوں کی مجموعی تعداد 43.2 ملین ہو چکی ہے۔ دنیا بھر میں سربراہان حکومت و مملکت میں سے فیس بُک پر دوسرے نمبر پر امریکی صدر ڈونلڈ ٹرمپ ہیں جن کے مداحوں کی تعداد 23.1 ملین ہے۔ یوں مودی ٹرمپ کی نسبت اس سوشل میڈیا پلیٹ فارم پر بہت آگے ہیں۔ تاہم ٹوئٹر پر ٹرمپ کو فالو کرنے والوں کی تعداد 51.4 ملین اور مودی کے فالوورز کی تعداد 42.3 ملین ہے۔
یہ تحقیقی جائزہ کمیونیکشن کے ایک ادارے برسون مارٹسٹیلر نے آج دو مئی بروز بدھ جاری کیا ہے جس میں یہ جائزہ لیا گیا ہے کہ دنیا کے سربراہان مملکت و حکومت فیس بُک کو کس طرح استعمال میں لا رہے ہیں۔ سابق امریکی صدر باراک اوباما فیس بُک پیج بنانے والے پہلے سیاسی رہنما تھے، جنہوں نے اپنا پیج سن 2007 میں اس وقت بنایا تھا جب وہ ابھی صرف ایک سینیٹر تھے۔
مودی اور ٹرمپ کے بعد اردن کی ملکہ رانیا کا پیج لائیک کرنے والے فیس بُک صارفین کی تعداد 16 ملین سے زائد ہے۔ دیگر براعظموں کے مقابلے میں فیس بُک کے استعمال کا رجحان ایشیائی ممالک میں زیادہ ہے۔ کمبوڈیا کے وزیر اعظم ہون سن کا پیج لائیک کرنے والوں کی تعداد میں ایک برس کے دوران پچاس فیصد اضافہ ہوا اور اب کے فیس بُک فینز کی تعداد 9.6 ملین ہے۔ دلچسپ بات یہ ہے کہ یہ تعداد کمبوڈیا بھر میں فیس بک صارفین کی تعداد (7.1 ملین) سے بھی زیادہ ہے۔
اس تحقیقی جائزے میں حکومتوں اور حکومتی رہنماؤں کے ساڑھے چھ سو سے زائد اکاؤنٹس کا جائزہ لیا گیا۔ ایک برس کے عرصے کے دوران امریکی صدر نے اوسطاً ہر روز پانچ پوسٹس کیں جب کہ مودی کی اوسط پوسٹس کی تعداد ٹرمپ سے بھی نصف رہی۔ صدر ٹرمپ کی پوسٹس پر ’انٹریکشنز‘ کی تعداد 205 ملین رہی جب کہ اس کے مقابلے میں مودی کے پیج پر انٹریکشنز کی تعداد 113.6 ملین رہی۔
اس جائزے مین یہ بھی بتایا گیا ہے کہ دنیا میں ایسے رہنماؤں کی تعداد بھی کافی کم ہی ہے جو اپنے سوشل میڈیا پیج خود ہی چلاتے ہیں۔ زیادہ تر رہنماؤں کے سوشل میڈیا پیجز ان کی اس حوالے سے خصوصی ٹیمیں چلاتی ہیں۔
