مونٹی نیگرو نے 29 ستمبر جمعرات کے روز چھ روسی سفارت کاروں کو ملک بدر کرنے کے ساتھ ہی روس کے لیے جاسوسی کرنے کے شبہہ میں بعض افراد کے خلاف تفتیش کا اعلان کیا۔

ادھر جمعے کے روز ماسکو نے بھی جوابی کارروائی کرتے ہوئے اس چھوٹی بلقان ریاست میں اپنا قونصل خانہ بند کرنے کا اعلان کیا ہے۔ روس کا کہنا ہے کہ مونٹی نیگرو میں حکام روسی سفارت خانے کے خلاف دشمنانہ کارروائیوں میں ملوث رہے ہیں، اسی وجہ سے اس نے یہ فیصلہ کیا ہے۔

نیٹو کے اتحادی ملک مونٹی نیگرو کے دارالحکومت پوڈگوریکا میں روس کے سفارت خانے نے اپنے ایک بیان میں کہا کہ وہ اپنے مشن کو ''غیر معینہ مدت کے لیے'' بند کر رہا ہے۔

مونٹی نیگرو کی وزارت خارجہ کا کہنا ہے کہ چھ روسی سفارت کاروں کو ''سفارتی تعلقات سے متعلق ویانا کنونشن کی خلاف ورزی اور دونوں ممالک کے باہمی احترام و وقار کی خلاف ورزیوں کی وجہ سے'' ملک چھوڑنے کا حکم دیا گیا ہے۔ یہ تمام روسی نمائندے پوڈگوریکا کے روسی سفارت خانے میں کام کرتے تھے۔

’روس کے باعث خدشات‘: امریکی نائب صدر ایسٹونیا پہنچ گئے

کشیدگی میں اضافہ کیسے ہوا؟

ریاستی استغاثہ نے اعلان کیا  ہے کہ جمعرات کے روز مونٹی نیگرو نے جاسوسی کے الزام میں غیر معینہ تعداد میں لوگوں کے بارے میں تحقیقات کا آغاز کیا ہے۔ مونٹی نیگرو کے سرکاری پراسیکیوٹر آفس کے ترجمان ووکاس راڈونجک نے بتایا کہ ان افراد پر ''ایک مجرمانہ تنظیم بنانے اور جاسوسی کرنے'' کا شبہ ہے۔

مقامی میڈیا کی اطلاعات کے مطابق ان لوگوں پر روس کے لیے جاسوسی کرنے کا شبہ ہے اور عارضی طور رہائش کی دستاویزات رکھنے والے ایسے  30 روسی شہریوں کو حراست میں بھی لیا گیا ہے۔ حکام نے مونٹی نیگرو کے دو شہریوں کو بھی حراست میں لیا ہے۔

مونٹی نیگرو میں عام انتخابات، یورپی یونین میں داخلہ مرکزی موضوع

مونٹی نیگرو کے سبکدوش ہونے والے وزیر اعظم ڈرٹن ابازووک نے کہا کہ یہ آپریشن مونٹی نیگرو نے اپنے بین الاقوامی شراکت داروں کے ساتھ مل کر ''قومی مفادات کے تحفظ'' کے لیے کیا تھا۔ تاہم انہوں نے روس کا نام نہیں لیا۔

روس کے شدید احتجاج کے باوجود مونٹی نیگرو نے سن 2017 میں نیٹو میں شمولیت اختیار کی تھی۔ بلقان کی یہ ریاست تاریخی طور پر روس کی اتحادی رہی ہے اور جب تک روس نے فروری میں یوکرین پر حملہ نہیں کیا تھا اس وقت تک آمدن کے لیے روسی اور یوکرینی سیاحوں پر اس کا انحصار ہوا کرتا تھا۔

مونٹی نیگرو یورپی یونین کا رکن بننے کا بھی ایک امیدوار ہے اور اپریل میں جب یونین نے روس کے خلاف پابندیاں عائد کیں، تو اس نے بھی ان پر پابندیوں کا ساتھ دیا تھا۔

ص ز/ ج ا (روئٹرز، اے ایف پی)