پاکستانی وزیر اعظم نواز شریف نے کراچی سے حیدر آباد کے موٹر وے ایم نائن کی سنگ بنیاد کے موقع پر کہا کہ وہ ملک کو ترقی کی راہوں پر گامزن کرنے کے خواہاں ہیں اور ملک میں شاہراہوں اور ہوائی اڈوں کی تعمیر اس ضمن میں ایک پہلا قدم تصور کیا جاتا ہے۔ انہوں نے مزید کہا کہ یہ ان کی خواہش تھی کہ کراچی سے لاہور تک موٹر وے تعمیر کی جائے۔

سنگ بنیاد کے موقع پر منعقد کی گئی ایک خصوصی تقریب سے خطاب کرتے ہوئے نواز شریف نے مزید کہا کہ مختلف وجوہات کی بنا پر ملک مناسب طریقے سے ترقی کی راہوں پر گامزن نہیں ہو سکا لیکن ان کی حکومت کا مقصد ہے کہ بنیادی انفراسٹرکچر کو بہتر بنا دیا جائے، ’’میں چاہتا ہوں کہ موٹر ویز کا جال بچھا کر پاکستان کے تمام صوبوں کو ملا دیا جائے۔‘‘

کراچی اور حیدر آباد کے مابین ایم نائن نامی سپر ہائی وے تعمیر کیے جانے کے بعد دوسرے مرحلے میں حیدر آباد اور سکھر، تیسرے مرحلے میں سکھر سے ملتان اور پھر چوتھے اور آخری مرحلے میں ملتان سے لاہور تک موٹر وے کا حصہ تعمیر کیا جائے گا۔ ڈھائی برس میں مکمل ہونے والے اس منصوبے کے تحت موٹر ویز کو دیگر شہروں کے ساتھ مناسب طریقے سے جوڑنے کے لیے نو انٹرچینج بھی بنائے جائیں گے۔

ڈان نیوز نے بتایا ہے کہ نواز شریف بدھ کے دن کراچی پہنچنے کے بعد بذریعہ ہیلی کاپٹر نوری آباد پہنچے، جہاں انہوں نے کراچی سے لاہور کے لیے موٹر وے کے پہلے مرحلے کا باقاعدہ سنگ بنیاد رکھا۔ اس موقع پر کراچی کے گورنر ڈاکٹر عشرت العباد، وزیر اعلیٰ سندھ قائم علی شاہ، نیشنل ہائی وے اتھارٹی کے چیئرمین شاہد اشرف تاڑر کے علاوہ دیگر اعلیٰ اہلکار بھی موجود تھے۔

نواز شریف نے ایم نائن کے جلد مکمل ہونے کی خواہش کا اظہار کرتے ہوئے کچھ دیگر مسائل پر بھی گفتگو کی۔ انہوں نے توانائی کے بحران پر تبصرہ کرتے ہوئے کہا کہ ان کی حکومت مسلسل کوشش کر رہی ہے اور ان کی طرف سے ترتیب دیے جانے والے منصوبہ جات کے باعث 2017 ء تک اس بحران پر قابو پا لیا جائے اور تب ملک سے لوڈ شیڈنگ کا خاتمہ ہو جائے گا۔

اپنے خطاب کے اختتام پر نواز شریف نے کہا کہ وہ صرف کراچی سے پشاور تک ہی موٹر وے کی تعمیر نہیں چاہتے بلکہ ان کی خواہش ہے کہ یہ کابل تک جائے اور بعد ازاں پاکستان اور وسطی ایشیائی ممالک تک پہنچ جائے۔