میانمار میں حکمران فوجی سربراہ نے پیر کو اس عزم کا اظہار کیا کہ وہ ملکی معزول رہنما  آنگ سان سوچی  کے خلاف بغاوت کے بعد تشکیل پانے والے اپوزیشن گروپوں کے خلاف کریک ڈاؤن جاری رکھیں گے۔

میانمار میں مسلح افواج کے دن کے موقع پر ایک تقریر کے دوران سینیئر جنرل من آنگ نے کہا کہ فوج ان قانون سازوں کے خلاف''فیصلہ کن کارروائی‘‘ کرے گی، جنہوں نے 2021ء میں فوج کے ہاتھوں بےدخلی کے بعد سے عوامی دفاعی افواج (پی ڈی ایف) اور اس کی ایک حلیف اقلیتی ملیشیا کی مدد سے اپنی قومی اتحاد کی حکومت (این یو جی) تشکیل دے رکھی ہے۔

من آنگ ہلینگ نے دارالحکومت نیپیداو میں ایک فوجی پریڈ سے خطاب کرتے ہوئے کہا، ''این یو جی اور اس کے حامی نام نہاد پی ڈی ایف کی دہشت گردی کی کارروائیوں سے اچھے طریقے سے اور سب کےساتھ نمٹنے کی ضرورت ہے۔‘‘ اس فوجی رہنما کا مزید کہنا تھا، ''(فوجی) اور حکومت کو بھی اس دہشت گرد گروہ کے خلاف کارروائی کرنے کی ضرورت ہے، جو ملک کو تباہ کرنے اور لوگوں کو مارنے کی کوشش کر رہے ہیں۔‘‘

من آنگ ہلینگ نے ملک میں نافذ موجودہ ایمرجنسی کے خاتمے کے بعد ''آزادانہ اور منصفانہ انتخابات‘‘ کرانے کا وعدہ کیا۔ اس سال فروری میں فوج نے ہنگامی حالت میں چھ ماہ کی توسیع کرتے ہوئے یہ تسلیم کیا کہ ووٹنگ کے لیے اسے قابل ذکر علاقے پر کنٹرول نہیں ہے۔

میانمار میں کیا صورتحال ہے؟

ایک مقامی مانیٹرنگ گروپ کے مطابق 2021ء کی فوجی بغاوت کے بعد سے اختلاف رائے کے خلاف فوج کے کریک ڈاؤن میں 3,100 سے زائد افراد ہلاک ہو چکے ہیں۔ حکمران جنتا پر شہریوں کے اندھا دھند قتل اور دیگر جنگی جرائم کا الزام عائد کیا جاتا رہا ہے۔ اقوام متحدہ کے انسانی حقوق کے سربراہ وولکر ترک نے میانمار کی صورت حال کو ''مکمل تباہی‘‘ قرار دیا ہے۔

حزب اختلاف کے احتجاجی مظاہرے جاری

میانمار میں مسلح افواج کا دن ایک سالانہ عوامی تعطیل ہے۔ یہ دن دوسری جنگ عظیم کے دوران جاپانی قابض افواج کے خلاف مقامی مزاحمت کے آغاز کی یاد میں منایا جاتا ہے۔ میانمار کے سرکاری میڈیا نے نیپیداو میں تقریباﹰ 8000 فوجیوں پر مشتمل  پریڈ کے قریب سڑکوں پر قطار میں کھڑی خواتین کو دکھایا۔

تاہم، ملک بھر میں جگہ جگہ مظاہروں کی اطلاعات ہیں۔ آزاد آن لائن میڈیا نے اطلاع دی ہے کہ پیر کی صبح ملک کے سب سے بڑے شہر ینگون میں کم از کم تین بم دھماکے ہوئے۔ جمہوریت نواز ینگون ریوولیوشن فورس نے کہا کہ اس نے من آنگ ہلینگ کو برا بھلا کہتے ہوئے بدھ مت کے پگوڈا میں ایک رسم ادا کرکے مسلح افواج کے دن پر احتجاج بھی کیا۔ میانمار کے فوجی رہنما انتہائی توہم پرست کے طور پر جانے جاتے ہیں۔

شمال مغرب میں فوجی حکومت کے خلاف  مسلح مزاحمت کے گڑھ سمجھے جانے والے  کسگائنگ کے علاقے میں لوگوں نے عوامی تعطیل کے موقع پر فوجی حکمرانوں کے خلاف چھوٹے پیمانے پرمظاہرے بھی کیے۔

ش ر⁄ (اے ایف پی ، اے پی)