میانمار کی سرحد سے ملحق بھارت کی شمال مشرقی ریاست میزورم کے ڈائریکٹر جنرل پولیس نے بتایا کہ منگل کے روز لینگ پوئی ہوائی اڈے پر لینڈنگ کے دوران یہ طیارہ رن وے سے پھسل کر حادثے کا شکار ہو گیا، جس میں چھ افراد زخمی ہو گئے۔ میانمار فوج کے اس طیارے میں چودہ افراد سوار تھے۔

انہوں نے بتایا کہ شانزی وائی۔8 فوجی طیارہ لینڈنگ کے دوران حادثے کا شکار ہوگیا اور دو حصوں میں ٹوٹ گیا۔

 انہوں نے مزید بتایا کہ زخمیوں کو مقامی لینگ پوئی ہسپتال میں داخل کرا دیا گیا ہے۔

میانمار: باغی گروپ اراکان آرمی کا سرحدی قصبے پر قبضے کا دعویٰ

ابتدائی رپورٹوں کے مطابق یہ طیارہ میانمار فوج کے ان فوجیوں کو واپس لینے کے لیے آیا تھا جو فوج اور باغیوں کے درمیان جاری شدید تصادم کی وجہ سے لوانگ تلائی ضلع سے بھاگ کر بھارت کے سرحدی علاقے میں داخل ہو گئے تھے اور بھارت سے پناہ کے طالب تھے۔

بھارت نے میانمار کے 184 فوجیوں کو واپس بھیج دیا

میانمار میں باغیوں اور فوج کے درمیان جاری تصادم کی وجہ سے شہریوں کے علاوہ فوجی بھی وہاں سے بھاگ کر بھارت آرہے ہیں۔

بھارت کے نیم فوجی دستے آسام رائفلز نے ایک سرکاری بیان میں تصدیق کی ہے کہ گزشتہ ہفتے میانمار کے مجموعی طورپر 276 فوجی میزورم میں داخل ہوئے تھے۔ ان میں سے 184 کو پیر کے روز میانمار واپس بھیج دیا گیا۔

میانمار: فوج پر پناہ گزین کیمپ پر ہلاکت خیز حملے کا الزام

آسام رائفلز کے ایک بیان میں کہا گیا ہے کہ "میانمار کے 184 فوجیوں کو دو پروازوں کے ذریعہ ستوے واپس لے جایا گیا۔ میانمار فوجیوں کی روانگی سے قبل بھارتی حکام نے تمام ضروری خانہ پری مکمل کیں۔"

یہ فوجی 17 جنوری کو بھارت میانمار۔ بنگلہ دیش سرحد پر واقع بندوق بنگا گاوں میں داخل ہوئے تھے، یہ گاوں میزورم کے لاون گتلائی ضلع میں واقع ہے۔

آسام رائفلز کے مطابق انہوں نے مدد کی اپیل کی تھی۔ انہوں نے مبینہ طورپر بتایا تھا کہ ان کے کیمپوں پر اراکان آرمی کے عسکریت پسندوں نے قبضہ کرلیا ہے، جو ایک آزاد رکھائن ریاست کے لیے جدوجہد کررہے ہیں۔ میانمار کے فوجیوں نے کہا تھا کہ انہیں اپنی جان بچانے کے لیے وہاں سے بھاگنا پڑا۔

آسام رائفلز کے ایک عہدیدار نے بتایا کہ آج منگل کے روز 92 فوجیوں کو میانمار واپس بھیجا جانا تھا۔ اس گروپ میں ایک کرنل اور 36 افسر رینک کے فوجی شامل تھے۔

بھارت میانمار سرحد پر خاردار تار لگانے کا فیصلہ

میانمار کی فوجی جنتا اور جمہوریت نواز ملیشیا کے درمیان جنگ میں شدت آنے کی وجہ سے بے گھر ہونے والے میانمار کے شہریوں کی تعداد بڑی تیزی سے بڑھ رہی ہے، جس نے بھارت کے لیے تشویش پیدا کردی ہے۔

اس صورت حال کے مدنظر نئی دہلی نے بھارت میانمار سرحد پر خاردار تاریں لگانے کا فیصلہ کیا تاکہ لوگوں کی آزادانہ آمدروفت کو روکا جاسکے۔

میانمار میں چوتھی مرتبہ ایمرجنسی میں توسیع، انتخابات ملتوی

اس حوالے سے پچھلے دنوں بھارتی وزیر داخلہ امیت شاہ اور میزورم کے وزیر اعلیٰ لال ڈوہواما کے درمیان بات چیت بھی ہوئی تھی۔

خیال رہے کہ بھارت او رمیانمار کے درمیان کے درمیان 1643 کلومیٹر طویل سرحد ہے۔

ج ا/ ص ز (خبر رساں ادارے)