یورپی کمیشن کے صدر یوزے مانوئل باروسو نے اپنے دورہء میانمار کے دوران اس جنوب مشرقی ایشیائی ریاست کے لیے ترقی کی مد میں ایک سو ملین ڈالر سے زائد کی امدادی رقم مہیا کرنے کا عہد بھی کیا۔

خبر رساں ادارے اے ایف پی نے مقامی ذرائع ابلاغ کے حوالے سے بتایا ہے کہ باروسو نے تھین سین سے ملاقات کے دوران یورپی یونین اور میانمار کے مابین تجارت بڑھانے کے حوالے سے بھی مذاکرات کیے۔

یورپی کمیشن کے صدر باروسو نے ایسے وقت میں میانمار کا دورہ کیا ہے، جب میانمار کی حکومت نے غیر ملکی سرمایہ کاری کے حوالے سے ایک نیا قانون منظور کیا ہے۔ سرکاری میڈیا کے مطابق اس نئے قانون کے تحت میانمار میں سرمایہ کاری کرنے والی غیر ملکی کمپنیوں کو خصوصی مراعات دی جائیں گی تاکہ ملک میں اقتصادی ترقی کو ممکن بنایا جا سکے اور روزگار کے نئے مواقع پیدا کیے جا سکیں۔

باروسو نے تھین سین کے ساتھ دو طرفہ امور پر تبادلہ خیال کرنے کے علاوہ میانمار میں نسلی فسادات پر اپنے تحفظات کا اظہار بھی کیا۔ انہوں نے کہا، ’’ہم امید کرتے ہیں کہ تمام مذہبی رہنما عوام پر زور دیں گے کہ وہ تحمل کا مظاہرہ کریں ۔‘‘ میانمار میں جون سے شروع ہونے والے نسلی فسادات کے نتیجے میں ایک لاکھ سے زائد افراد متاثر ہوئے ہیں۔

راکھین صوبے میں مقامی بدھوں اور آباد کار روہنگیا مسلمانوں کے مابین گزشتہ ماہ شروع ہونے والے تازہ فسادات کے نتیجے میں تیس ہزار افراد بے گھر ہوئے ہیں۔ ان تازہ نسلی فسادات سے قبل تشدد کا پہلا دور جون میں شروع ہوا تھا۔ اطلاعات کے مطابق اس تشدد کے نتیجے میں درجنوں روہنگیا مسلمان مارے جا چکے ہیں جبکہ ہزاروں گھروں کو نذر آتش کیا جا چکا ہے۔

سرکاری اعداد و شمار کے مطابق صرف اکتوبر کے آخری دس دنوں میں روہنگیا اور بدھوں کے مابین ہونے والی جھڑپوں کے نتیجے میں 89 افراد مارے گئے۔ سیاسی ناقدین کے مطابق ان فسادات کے نتیجے میں میانمار میں سیاسی اصلاحات کا سلسلہ متاثر ہو سکتا ہے۔ یورپی کمیشن کے سربراہ باروسو نے میانمار کے دارالحکومت میں اپوزیشن رہنما آنگ سان سوچی سے بھی ملاقات کی۔

( ab /ia (AFP,Reuters