جرمن چانسلر انگیلا میرکل کا کہنا تھا کہ آئندہ ہفتے کی سمٹ میں یورپی یونین کے 2014ء سے 2020ء کے بجٹ کے حوالے سے معاہدے کے لیے وہ ’بہت پُرامید‘ ہیں۔

اطالوی وزیر اعظم ماریو مونٹی کے ساتھ ملاقات کے بعد ایک مشترکہ نیوز کانفرنس میں انہوں نے کہا: ’’یورپی یونین کے طویل المدتی بجٹ کے بارے میں مجھے بہت اُمید ہے کہ ہم کامیاب رہیں گے، ہم معاہدے تک پہنچ جائیں گے۔‘‘

ان کا مزید کہنا تھا: ’’اٹلی اور جرمنی دونوں بجٹ میں حصہ دینے والے ملک ہیں اور ہمارے مشترکہ مفادات ہیں۔ لیکن بہرحال یہ مذاکرات آسان نہیں ہوں گے اور ہم توقع کر سکتے ہیں کہ اٹلی اپنے مفادات پر زور دے گا۔‘‘

چانسلر میرکل سے ملاقات کےبعد وزیر اعظم مونٹی کا کہنا تھا: ’’اٹلی کے لیے یہ ضروری ہے کہ یورپی یونین کے آئندہ بجٹ میں وسائل یونین کی خواہشات کے برابر ہوں اور شرح نمو اور یکجہتی کے فروغ میں مددگار ثابت ہوں۔‘‘

اطالوی وزیر اعظم نے مزید کہا: ’’مجھے بھروسہ ہے، جیسے چانسلر نے کہا (ہم اس قابل ہوں گے) کہ ہم سمجھوتے تک پہنچ جائیں گے۔‘‘

یورپی یونین کا طویل المدتی بجٹ طے کرنے کے لیے قبل ازیں گزشتہ برس نومبر میں مذاکرات ہوئے تھے، تاہم رکن ممالک کسی نتیجے پر نہیں پہنچ سکے تھے۔ اب یورپی رہنما آئندہ ہفتے (سات اور آٹھ فروری) کو برسلز میں پھر سے ملاقات بات چیت کریں گے۔ توقع ظاہر کی جا رہی ہے کہ آئندہ سات برس کے لیے یورپی یونین کے بجٹ کا حجم تقریباﹰ ایک ٹریلین یورو ہو گا۔

بہت سی رکن ریاستیں اپنے ہاں بچتی اقدامات کے تناظر میں بجٹ میں کٹوتی پر زور دے رہی ہیں۔ اس بات پر عدم اتفاق ہی گزشتہ اجلاس کی ناکامی کا باعث بنا تھا۔

جرمن چانسلر انگیلا میرکل اور اٹلی کے وزیر اعظم ماریو مونٹی کے درمیان جمعرات کی اس ملاقات کے بعد یورپی یونین کی آئندہ ہفتے کی سمٹ سے پہلے ایسی اعلیٰ سطحی نشستوں کا سلسلہ شروع ہو گیا ہے۔ اس سمٹ سے قبل میرکل اسپین کے وزیر اعظم ماریانو راخوئے اور فرانس کے صدر فرانسوا اولانڈ سے بھی ملاقات کریں گی۔ ماریو مونٹی بھی اتوار کو فرانسوا اولانڈ سے ملاقات کر رہے ہیں۔

اُدھر ویانا میں یورپی کمیشن کے صدر خوزے مانوئیل باروسو نے ان رکن ریاستوں کو تنقید کا نشانہ بنایا ہے جو مسابقت اور شرح نمو کو بہتر بنانے پر زور دینے کے ساتھ بجٹ میں کٹوتی بھی چاہتی ہیں۔

ng/ai (dpa, AFP)