جرمن چانسلر انگیلا میرکل نے کریمیا کے بحران کے سلسلے میں روس کو مزید اقتصادی پابندیوں سے خبر دار کیا ہے۔ وفاقی پارلیمان سے خطاب میں اپنی حکومت کے پالیسی بیان میں میرکل نے کہا کہ کریمیا کا روس سے الحاق یورپ اور اس کے ساتھیوں کی طرف سے فیصلہ کن جواب کا متقاضی ہے۔ اسی دوران آج جمعرات سے برسلز میں یورپی یونین کا دو روزہ سربراہی اجلاس شروع ہو رہا ہے، جس میں یوکرائن کے بحران اور کریمیا کے روس کے ساتھ الحاق کو مرکزی اہمیت حاصل رہے گی۔

جرمن چانسلر انگیلا میرکل نے برسلز میں شروع ہونے والی یورپی یونین کی سربراہی کانفرنس سے پہلے اپنے پارلیمانی خطاب میں یہ بھی کہا کہ اس ضمن میں جن افراد پر سفری پابندیاں لگائی گئی ہیں اور جن کے بینک اکاؤنٹ منجمد کیے گئے ہیں، ان کے ناموں کی فہرست بھی طویل تر ہو جائے گی۔ اس کے علاوہ کریمیا کی صورتحال میں مزید خرابی پیدا ہونے کی صورت میں روس کے خلاف مزید سخت اقدامات بھی کیے جا سکتے ہیں۔

ماسکو کی طرف سے یوکرائن کی بحریہ کے ایک کمانڈر کی رہائی کے اعلان کے باوجود یورپی یونین کے ممالک کے سربراہان روس پر پابندیوں میں اضافے کے بارے میں مذاکرات کرنے جا رہے ہیں۔ روس کے لیے ایک بڑا دھچکا دنیا کی آٹھ بڑی اقتصادی قوتوں کے فورم یعنی جی ایٹ کو غیر معینہ مدت کے لیے معطل کر دینے کا فیصلہ ہے، جس کی موجودہ صدارت ماسکو کے پاس ہے اور روسی صدر ولادیمیر پوٹن کو اس سال جون میں سوچی میں جی ایٹ کی مجوزہ سمٹ کی میزبانی کرنا ہے۔

یورپی یونین کے سربراہان مملکت و حکومت کی برسلز میں شروع ہونے والی دو روزہ مشاورت سے پہلے جرمن چانسلر میرکل نے ملکی پارلیمان سے خطاب کرتے ہوئے کہا، ’’روس تمام تر بین الاقوامی تنظیموں سے کٹ کر رہ گیا ہے۔‘‘ میرکل نے کہا کہ روس کی طرف سے کریمیا کے اس کے ساتھ الحاق کا اعلان ناقابل قبول ہے اور اس یکطرفہ فیصلے کو تسلیم نہیں کیا جائے گا۔

مذکورہ پابندیوں کے اعلان کے علاوہ میرکل نے روس کی جی ایٹ فورم کی صدارت پر بھی سوال اٹھایا۔ انہوں نے کہا، ’’جب تک جی ایٹ جیسے اہم بین الاقوامی فورم کا ماحول سازگار نہیں ہوتا، جیسا کہ اس وقت صورتحال ہے، تب تک نہ تو جی ایٹ فورم رہے گا اور نہ ہی اس کے کسی اجلاس کا کوئی جواز بنتا ہے۔‘‘

انگیلا میرکل نے یہ بھی کہا کہ موجودہ صورتحال میں آنے والی کوئی بھی تبدیلی اس امر کا فیصلہ کر ے گی کہ اپریل کے اواخر میں مجوزہ جرمن روسی مشاورت عمل میں آتی ہے یا نہیں۔ روس کے خلاف پابندیوں میں مزید سختی کو بھی میرکل نے خارج از امکان قرار نہیں دیا۔ اُن کے بقول، ’’روس کے خلاف اقدامات میں مزید سختی میں اقتصادی پابندیوں میں اضافہ شامل ہوگا۔‘‘

میرکل نے مشرقی اور جنوبی یوکرائن کی سرحدوں کی نگرانی کی بات بھی کی۔ ’’اس علاقے کی سرحدوں پر بین الاقوامی کنٹرول کے لیے جرمن حکومت پورپی سلامتی اور تعاون کی تنظیم OSCE کے ایک مضبوط مشن کی بھرپور حمایت کرتی ہے۔‘‘ میرکل نے اپنے اس بیان میں اس حقیقت کو تسلیم کیا کہ اس مشن کی تشکیل سے متعلق مذاکرات نہایت مشکل ہیں تاہم وہ اور جرمن وزیر خارجہ آج اور کل جمعے کو برسلز میں ہونے والے اجلاس میں اس کے لیے پوری کوشش کریں گے۔ میرکل کے بقول اس مشن کی تشکیل ممکن ہے۔

جرمن چانسلر نے اجلاس سے قبل ہی یوکرائن کے لیے امداد کا اعلان بھی کر دیا۔ ’’جرمنی اور یورپی یونین یوکرائن کو ٹھوس مدد فراہم کریں گے۔ اس ضمن میں آئی ایم ایف اپنے ایک پروگرام کے بارے میں یوکرائن کی حکومت کے ساتھ سنجیدگی سے بات چیت کر رہا ہے۔ یورپی یونین کی طرف سے بھی ابتدائی اقدامات بہت جلد دیکھنے میں آئیں گے۔ برسلز میں ہونے والے مذاکرات میں یوکرائن کے وزیر اعظم کے ساتھ قریبی رفاقت کے ایک معاہدے کے سیاسی پہلو پر بھی غور کیا جائے گا۔‘‘

دریں اثناء اقوام متحدہ کے سیکرٹری جنرل بان کی مون نے ماسکو میں روس کے صدر ولادیمیر پوٹن سے ملاقات کی ہے۔ خبر رساں ادارے روئٹرز کے مطابق اس موقع پر انہوں نے یوکرائن اور روس کے مابین تنازعے پر انتہائی تشویش کا اظہار کیا ہے۔ بان کی مون یوکرائن اور روس کے دورے پر ہیں تاکہ تنازعے کے فریقین کو پراُمن حل کے لیے تیار کر سکیں۔