نسلی تعصب کے خاتمے کے 30 برس بعد جنوبی افریقہ کہاں کھڑا ہے؟
27 اپریل 2024
جنوبی افریقہ میں نسلی تعصب کے خاتمے کو تیس برس بیت گئے لیکن اس افریقی ملک میں اب بھی معاشرتی سطح پر ایک تقسیم دیکھائی دیتی ہے۔ ماہرین کے مطابق سماجی و سیاسی تقسیم کے باوجود یہ افریقی ملک ترقی کی راہوں پر گامزن ہے۔
تصویر: DW
اشتہار
جنوبی افریقہ میں ٹھیک تیس برس قبل ستائیس اپریل سن 1994 کو پہلی مرتبہ سیاہ فام ووٹر نے اپنا حق رائے دہی استعمال کیا، جس کی بدولت نیلسن منڈیلا اس افریقی ملک کے صدر منتخب کیے گئے۔
انگریز راج کے دوران ستائیس برس جیل میں رہنے والے جنوبی افریقی سیاسی رہنما نیلسن منڈیلا اور دیگر سیاہ فام رہنماؤں کی انتھک کوششوں کے نتیجے میں اس ملک میں ریاستی سطح پر رائج نسلی امتیاز کا خاتمہ ممکن ہوا۔
جنوبی افریقہ میں جمہوری دور شروع ہوا اور نیلسن منڈیلا صدر بن گئے۔ منڈٰیلا کی سیاسی پارٹی افریقن نیشنل کانگریس (اے این سی) نے ملک میں ترقی اور سماجی سطح پر تبدیلیوں کا آغاز کیا۔
لیکن آج تیس برس بعد جنوبی افریقہ میں عوام اے این سی سے مایوس نظر آتے ہیں اور سیاسی تقسیم بھی دیکھی جا سکتی ہے۔ ان تیس برسوں میں جنوبی افریقہ میں امیر اور غریب کے مابین فرق بھی بڑھا ہے حالانکہ اے این سی نے سن 1994 میں اقتدار میں آنے کے بعد اس مسئلے کے حل کو اپنی اولین ترجیح قرار دیا تھا۔
جنوبی افریقہ میں اگرچہ گزشتہ تین دہائیوں کے دوران عملی طور پر زیادہ تبدیلی نہیں دیکھی گئی لیکن قانون سازی ضرور ہوئی ہے۔ قانونی ماہرین اس پیش رفت کو طویل المدتی بنیادوں پر اہم قرار دیتے ہیں۔
جوہانسبرگ میں واقع روزا لکسمبرگ فاؤنڈیشن میں سدرن افریقہ کے ڈائریکٹر فریڈسن گولیگیو کے مطابق یہ ملک اس عرصے میں عالمی سطح پر سب سے زیادہ پروگریسیو آئین کو متعارف کرانے میں کامیاب ہوا ہے، ''ملک میں آزاد عدلیہ، فری پریس اور صاف و شفاف الیکشن کو یقینی بنایا گیا ہے۔‘‘
جنوبی افریقہ: نسلی امتیاز کا عروج اور زوال
جنوبی افریقہ کی جدید تاریخ کی عکاسی جس طرح فوٹو گرافی سے ہوتی ہے، شاید ہی کسی دوسرے طریقے سے اس تکلیف دہ دور کو بیان کیا جا سکتا ہو۔ جنوبی افریقہ میں نسلی عصبیت سے آزادی کے تیس سال مکمل ہونے پر مڑ کر تاریخ کو دیکھتے ہیں۔
تصویر: Museum Africa
ٹھیک تیس برس قبل ستائیس اپریل سن 1994 میں جنوبی افریقہ میں پہلی مرتبہ سیاہ فام ووٹرز نے اپنا حق رائے دہی استعمال کیا، جس کی بدولت نیلسن منڈیلا اس افریقی ملک کے صدر منتخب کیے گئے۔ یوں اس ملک میں نسلی تعصب پر مبنی حکومت کا خاتمہ ہوا۔
تصویر: Museum Africa
سیاہ فام فوٹو گرافر پیٹر مگابے کو گرفتار کیا جا رہا ہے۔ جرمن فوٹو گرافر ژورگن شادیبرگ نے مگابے کو فوٹو گرافی کے ہنر بتائے تھے۔ لیجندڑی میگزین DRUM میں ڈرائیوار کے طور پر اپنا کیریئر شروع کرنے والے مگابے نے بعدازاں اپنی فوٹو گرافی سے ’نسلی عصبیت کے خلاف بغاوت‘ کے کئی اہم واقعات کو فلمبند کیا، جو اب ان کی پہچان بن چکے ہیں۔
تصویر: Museum Africa, Johannesburg
جنوبی افریقہ میں نسلی عصبیت کی بنیاد پر قائم حکومت نے سن 1950میں رہائشی علاقوں کو نسلی بنیادوں پر تقیسم کرنا شروع کیا۔ تب سیاہ فاموں کے اکثریتی علاقے صوفا ٹاون سے تمام مقامی شہریوں کو نکال دیا گیا اور اسے صرف سفید فاموں کے لیے مختص کر دیا گیا۔ اس کا نام ’ٹری آمپف‘ رکھ دیا گیا۔
تصویر: Museum Africa
مقامی سیاہ فاموں کو روانہ طویل سفر کر کے اپنے دفاتر پہچنا پڑتا تھا۔ مسافروں سے کچھا کھچ بھری ٹرینوں میں مسافروں کو شدید مشکلات کا سامنا بھی کرنا پڑتا تھا۔ فوٹو گرافر سانتو موفوکینگ نے اسی دوران کئی لمحات کو تصویروں میں قید بھی کیا۔
تصویر: Museum Africa, Johannesburg
غداری کے ایک مقدمے میں 1956ء میں جن 156 سیاہ فاموں کو غداری کا مرتکب قرار دیا گیا، ان میں نیلسن منڈیلا بھی شامل تھے۔ ایک برس قبل ہی انہوں نے نسلی امتیاز پر مبنی قوانین کے خاتمے پر زور دیا تھا۔
تصویر: Museum Africa, Johannesburg
جنوبی افریقہ میں 1976ء میں ایک مظاہرے کے دوران بارہ سالہ ہیکٹر پیٹریسن ہلاک ہو گیا تھا۔ فوٹو گرافر سام نزما کی یہ تصویر اس واقعے کی یاد تازہ کر دیتی ہے۔ یہ تصویر دنیا بھر میں انتہائی مقبول ہوئی ہے۔
تصویر: DW/Ulrike Sommer
ان تصاویر میں ایسے دور کو بیان کیا گیا ہے، جب لمحے لمحے میں تکالیف پنہاں تھیں۔ Craddock Four کی تدفین پر لی گئی ایک تصویر۔ 1985ء میں اپوزیشن کے چار ارکان کو اغوا کرنے کے بعد قتل کر دیا گیا تھا۔ بعدازاں معلوم ہوا تھا کہ جنوبی افریقہ کی دفاعی افواج اس واقعے میں ملوث تھی۔
تصویر: Rashid Lombard
تین مئی 1994ء کو جنوبی افریقی عوام کے جذبات دیکھنے کے قابل تھے۔ اس وقت انکشاف ہوا تھا کہ نیلسن منڈیلا جنوبی افریقہ کے پہلے سیاہ فام صدر بننے والے ہیں۔ منڈیلا کے صدر بنتے ہی وہاں کی مقامی سیاہ فام آبادی کے نصیب بھی بدل گئے اور ایک نئے دور کا آغاز ہوا۔
تصویر: George Hallett
جنوبی افریقہ میں کئی عشروں تک مقامی آبادی تعلیم، صحت اور اقتصادی ترقی سے محروم رہی۔ نسلی امتیاز پر مبنی قوانین کے خاتمے کے بعد اب جنوبی افریقہ ایک جمہوری ریاست بن چکی ہے۔ تاہم ماضی کے زخم اب بھی تازہ معلوم ہوتے ہیں۔
تصویر: Thabiso Sekgala
9 تصاویر1 | 9
ڈی ڈبلیو سے گفتگو میں فریڈسن نے مزید کہا کہ جنوبی افریقہ میں مختلف جنسی میلانات و رحجانات کے حامل افراد کے حقوق کے تحفظ پر بہت کام ہوا ہے جبکہ غریب کمیونٹی میں ایجوکیشن سسٹم میں بہتری، سوشل ہاؤسنگ اور سوشل سروسز میں بھی بہتری ہوئی ہے۔
بدعنوانی ایک بڑا مسئلہ
جنوبی افریقہ میں گزشتہ تین عشروں کے دوران سول سوسائٹی بھی مضبوط ہوئی ہے اور انسانی حقوق کی صورتحال بھی بہتر ہوئی ہے۔
تاہم حالیہ عرصے میں جنوبی افریقہ میں کرپشن ایک بڑا مسئلہ قرار دیا جانے لگا ہے۔ حکمران پارٹی اے این سی میں بھی طاقت کی کشمکش اور بدعنوانی کے کئی اسکنڈلز سامنے آ چکے ہیں۔
ساتھ ہی بے روزگاری، جرائم میں اضافہ، مہنگائی اور غربت جنوبی افریقہ کے لیے بڑے مسائل بنتے جا رہے ہیں۔ فریڈسن کے مطابق نوجوانوں میں بے روزگاری تمام مسائل کی جڑ ہے۔ انہوں نے بتایا کہ چونتیس برس سے کم عمر کی نصف آبادی کے پاس ملازمت نہیں ہے، ''یہی بات سماجی عدم استحکام، غیر ملکیوں کے خلاف نفرت آمیز جذبات اور جرائم کی وجہ ہے۔‘‘
اشتہار
عوام میں سیاست سے مایوسی
گزشتہ کچھ برسوں سے حکمران سیاسی جماعت اے این سی کی عوام مقبولیت میں کمی نوٹ کی جا رہی ہے جبکہ کچھ ناقدین کے بقول یہ پارٹی عوام میں اپنا اعتماد کھوتی جا رہی ہے، جس کی وجہ سے سماجی سطح پر غصے اور دیگر معاشرتی مسائل بھی جنم لے رہے ہیں۔
اس ملک میں مئی میں الیکشن ہونا ہیں، جس میں صدر سیرل رامافوسا دوسری مدت صدارت کے لیے میدان میں ہوں گے۔ تاہم موجودہ سیاسی صورتحال کو دیکھتے ہوئے اندیشہ ہے کہ اے این سی اپنے قیام کے بعد کسی صدارتی الیکشن میں پچاس فیصد عوام حمایت حاصل کرنے میں پہلی مرتبہ ناکام ہو سکتی ہے۔
ماہر معاشیات ڈینیل سیلکے کے مطابق عوام میں یہ شکوک پیدا ہو چکے ہیں کہ انہیں آزادی دلانے والی سیاسی پارٹی اب یہ ملک چلانے کے قابل نہیں رہی ہے انہوں نے ڈی ڈؓبلیو کو بتایا کہ یہ پارٹی عوام کو متحد رکھنے میں اب ناکام ہوتی جا رہی ہے۔
نسلی عصبیت کے زخم مندمل ہونے میں وقت لگے گا
کچھ مبصرین کے خیال میں جنوبی افریقہ میں ہر سماجی بیماری کا ذمہ دار اے این سی کی بدانتظامی کو قرار نہیں دیا جا سکتا ہے۔
نیلسن منڈیلا فاؤنڈیشن کے ایگزیکٹیو ڈائریکٹر ویرنے ہیرس کا سوال ہے کہ مقامی افراد کے استحصال، نوآبادیات ظلم و جبر اور نسل پرستی کے طویل اور گہرے عمل کے صدمے اور وراثت کو مٹانے کے لیے کیا تین دہائیاں کافی ہیں؟ ان کے بقول تیس سال میں یہ زخم نہیں بھر سکتے ہیں۔
ہیرس نے ڈی ڈبلیو سے گفتگو میں کہا کہ جنوبی افریقہ میں نسل پرستی کے خاتمے کے بعد نیلسن منڈیلا نے کہا تھا کہ ایک متحدہ ملک (جہاں سفید فام اور سیاہ فام اکٹھے رہیں) تمام شہریوں کی بہتر زندگی کی ضمانت بنے گا، لیکن موجودہ حالات کو دیکھتے ہوئے ’’کچھ نوجوان اب کہتے ہیں کہ منڈیلا غدار تھے۔‘‘
ہیرس کے بقول جنوبی افریقہ میں بالخصوص نوجوان نسل میں ایک نئی بحث شروع کرنے کی ضرورت ہے تاکہ سیاسی و سماجی مسائل کے حل کی خاطر کھل کر گفتگو کی جا سکے۔
ادھر سدرن افریقہ کے ڈائریکٹر فریڈسن گولیگیو کو البتہ یقین ہے کہ بہت سے مسائل اور مشکلات کے باوجود جنوبی افریقہ نے بہت سے شعبوں میں ترقی کی ہے۔ ڈی ڈبلیو سے گفتگو میں انہوں نے اصرار کیا، ''مستقبل میں ہم شاید نہ صرف براعظم افریقہ بلکہ عالمی سطح پر بھی ایک زیادہ فعال جنوبی افریقہ دیکھیں گے۔‘‘
مارٹینا شیویکوفسکی (ع ب / ع ا)
جنوبی افریقہ میں خونریز فسادات
سابق جنوبی افریقی صدر جیکب زوما کو سنائی گئی سزا کے خلاف شروع ہونے والے مظاہروں میں ستر سے زائد افراد ہلاک ہو چکے ہیں۔ ان فسادات کے دوران مظاہرین نے لوٹ مار سے بھی گریز نہیں کیا۔
تصویر: Siphiwe Sibeko/Reuters
جیکب زوما کی گرفتاری
جنوبی افریقہ میں فسادات کا سلسلہ اس وقت شروع ہوا، جب سابق صدر جیکب زوما کو گزشتہ ہفتے عدالت نے سزا سنائی تھی۔ انبہیں دستور کے منافی اقدام پر سزا دی گئی ہے۔ وہ نو برس تک ملک کے صدر رہے اور کرپشن الزامات کے تناظر میں انہیں منصبِ صدارت سے سن 2018 میں ہاتھ دھونا پڑے تھے۔
تصویر: Siphiwe Sibeko/Reuters
مظاہرین سڑکوں پر
جیکب زوما کے حامیوں کی زیادہ تعداد کوا زُولی نتال میں بستی ہے اور انہی نے مظاہروں کا آغاز کیا۔ یہی علاقہ نسلی امتیاز کی پالیسی کے دوران مظاہروں کا مرکز ہوا کرتا تھا۔ ان حامیوں کا موقف ہے کہ زوما کو ان کی جگہ صدارت سنبھالنے والے سیرل رامافوسا کی سیاسی حراست کا سامنا ہے۔ زوما کے حامیوں کے مظاہرے پہلے پھیلتے چلے گئے اور پھر لوٹ مار کا سلسلہ شروع ہو گیا۔
تصویر: Sumaya Hisham/Reuters
دکانوں کو لوٹنے کے علاوہ آگ بھی لگائی گئی
مظاہرین نے کوا زُولی نتال صوبے کے دارالحکومت پیٹرماریٹسبرگ میں ایک بڑے شاپنگ مال بروک سائیڈ کو لوٹنے کے بعد آگ لگا دی۔ اس مال میں آگ لگنے سے بھگدڑ مچی اور کم از کم دس افراد ہلاک ہوئے۔ اسی جنوبی افریقی صوبے میں حالیہ برسوں میں گاہے گاہے احتجاجی مظاہرے دیکھے گئے ہیں۔
تصویر: Rogan Ward/Reuters
عدم مساوات، غربت اور مایوسی
ایک اور شہر ڈربن کے مغرب میں بھی مظاہرین نے سڑکوں کو بند کر کے ٹائر جلائے۔ یہ امر اہم ہے کہ جنوبی افریقہ میں عدم مساوات اور غربت سے لوگوں میں مایوسی پھیلتی جا رہی ہے۔ اس کے علاوہ کووڈ انیس کو کنٹرول کرنے کے لاک ڈاؤن نے بھی لوگوں کی زندگیوں کو اجیرن کر رکھا ہے۔ جنوبی افریقہ میں بیس لاکھ سے زائد افراد کو کورونا انفیکشن ہو چکا ہے۔
تصویر: Rogan Ward/Reuters
فوج کی تعیناتی
سوویٹو، گاؤٹینگ اور کوا زُولی نتال میں مظاہروں کی شدت کے تناظر میں فوج طلب کی جا چکی ہے۔ قانون نافذ کرنے والے اداروں کی مدد کے لیے طلب کی گئی فوج فسادات والے علاقوں میں اب متعین ہے۔ اس کے باوجود پرتشدد مظاہروں اور دکانوں کی لوٹ مار کے واقعات رونما ہو رہے ہیں۔
تصویر: Siphiwe Sibeko/Reuters
مظاہرے ختم نہیں ہو رہے
انتشار کے شکار علاقوں میں پولیس کی مدد کے لیے ڈھائی ہزار فوجیوں کی تعیناتی کی گئی ہے۔ بظاہر یہ تعداد بہت کم محسوس کی گئی ہے۔ بتایا جاتا ہے کہ سیاسی ورکرز کے احتجاج کے دوران مجرمانہ ذہنیت کے حامل افراد بھی متحرک ہو گئے اور اُنہی نے جرائم کا ارتکاب کیا۔