نمونوں کا تجزیہ انتہائی مفصل اور محتاط ہو گا، اقوام متحدہ
31 اگست 2013![](https://static.dw.com/image/17028057_800.webp)
خبر رساں ادارے روئٹرز نے تصدیق کی ہے کہ اقوام متحدہ کے سیکرٹری جنرل بان کی مون نے سلامتی کونسل کے پانچ مستقل رکن ممالک کو بتایا ہے کہ شام میں معائنہ کاروں نے جو نمونے اکٹھے کیے ہیں، ان کے تجزیے اور حتمی رپورٹ کی تیاری میں کم ازکم دو ہفتوں کا وقت درکار ہو گا۔ شام کا دورہ کرنے والی اقوام متحدہ کی تیرہ رکنی خصوصی ٹیم نے دمشق کے نواح میں واقع اس مقام سے بھی نمونے حاصل کیے ہیں، جہاں پر کیمیائی ہتھیاروں کے مبینہ استعمال کے نتیجے میں سینکڑوں افراد ہلاک ہو گئے تھے۔
اقوام متحدہ کی خصوصی ٹیم ان نمونوں کے تجزیے سے یہ تعین کرے گی کہ آیا شام میں زہریلی گیس کا استعمال کیا گیا۔ یہ امر اہم ہے کہ اقوام متحدہ کی معائنہ کار ٹیم کا مینڈینٹ یہ نہیں ہے کہ اس بات کا تعین کیا جائے کہ اگر وہاں کیمیائی ہتھیار استعمال کیے گئے تو اس کا ذمہ دار کون ہے۔ شامی اپوزیشن کے بقول صدر بشار الاسد نے ایسے خطرناک ہتھیار استعمال کیے ہیں جب کہ دوسری طرف دمشق حکومت ان مہلک ہتھیاروں کے استعمال کے سلسلے میں باغیوں کو ذمہ دار ٹھہراتی ہے۔
امریکی نیوز ایجنسی اے پی نے دی ہیگ میں قائم کیمیائی ہتھیاروں کی روک تھام سے متعلق آرگنائزشن OPCW کے حوالے سے بتایا ہے کہ شام سے حاصل کیے گئے نمونوں کی انتہائی باریک بینی اور محتاط انداز میں جانچ پڑتال کی جائے گی تاکہ غلطی کی کوئی گنجائش نہ رہے۔ اقوام متحدہ کے ایک ترجمان نے بتایا کہ Ake Sellstrom کی سربراہی میں شام کا دورہ کرنے والی ٹیم نے فیلڈ ہسپتالوں کا دورہ کرنے کے علاوہ عینی شاہدین اور ڈاکٹروں سے بھی گفتگو کی اور اس کے علاوہ انہوں نے بائیولوجیکل شواہد کے ساتھ ساتھ ماحولیاتی نمونے بھی اکٹھے کیے۔
بتایا گیا ہے کہ ماہر معائنہ کاروں کی ٹٰیم شام سے حاصل کے گئے نمونوں کے تجزیے کے دوران انتہائی مؤثر طریقہ کار اختیار کرے گی اور نمونوں کے ٹیسٹ دنیا بھر کی انتہائی معتبر لیبارٹریوں سے کرائے جائیں گے۔
OPCW کے سابق اہلکار رالف ٹراپ نے اے پی سے گفتگو کرتے ہوئے کہا، ’’یہ نتائج بالکل درست ہونے چاہییں۔‘‘ ہر نمونہ کم از کم دو اور ممکن ہوا تو تین مختلف لیبارٹریوں سے ٹیسٹ کرایا جائے گا۔ بعد ازاں حاصل شدہ نتائج کی ایک مرتبہ پھر پڑتال کی جائے گی اور دیکھا جائے گا کہ مختلف لیبارٹریوں سے کرائے گئے تجزیوں کے نتائج ایک دوسرے سے کتنے ہم آہنگ ہیں۔ OPCW دنیا بھر کی اکیس لیبارٹریوں سے نمونے ٹیسٹ کراتی ہے، جو اپنے کام میں انتہائی معتبر تصور کی جاتی ہیں۔
رالف ٹراپ کے بقول ان نمونوں کے تجزیے کے لیے بہت اچھا طریقہ کار اختیار کیا گیا ہے اور اس امر کو ممکن بنایا گیا ہے کہ نہ تو کوئی ان نمونوں کو تبدیل کر سکے اور نہ ہی ان میں ملاوٹ۔ اقوام متحدہ کے ماہرین نے البتہ شام سے حاصل کیے گئے نمونوں کی نوعیت سرکاری طورپر عام نہیں کی۔
تاہم ٹراپ نے بتایا کہ ممکنہ طور پر ماہرین نے متاثر ہونے والے پہاڑوں اور زمین کے نمونے لیے ہوں گے۔ اس کے علاوہ خون اور انسانی بالوں کے نمونوں کے ساتھ ساتھ ممکن ہے کہ ہلاک شدگان کی لاشوں سے بھی نمونے حاصل کیے گئے ہوں۔ OPCW نے بتایا ہے کہ اس کے معائنہ کار شام سے واپسی پر کوئی بھی بیان جاری نہیں کریں گے۔