پاکستانی دارالحکومت اسلام آباد سے موصولہ رپورٹوں کے مطابق پاکستان تحریک انصاف کے جیل میں قید رہنما کے خلاف یہ فرد جرم جمعرات پانچ دسمبر کو ایک عدالت میں عائد کی گئی، جس میں کہا گیا ہے کہ انہوں نے پچھلے سال مئی میں ملک کے مختلف شہروں میں پی ٹی آئی کے کارکنوں کو عسکری اور غیر عسکری تنصیبات پر کیے گئے حملوں کے لیے اکسایا تھا۔

نیوز ایجنسی روئٹرز نے لکھا ہے کہ پاکستان کے ایک سے زائد نجی نشریاتی اداروں نے بھی اس عدالتی کارروائی کی رپورٹنگ کرتے ہوئے جمعرات کے روز بتایا کہ یہ الزامات عمران خان اور 60 سے زائد دیگر افراد پر عائد کیے گئے ہیں۔ سابق وزیر اعظم خان تاہم اپنے خلاف ان الزامات کو مسترد کرتے ہیں۔

پاکستان: سابق وزیر اعظم عمران خان کے خلاف قتل کا مقدمہ درج

نو مئی 2023ء کے روز عمران خان کی سیاسی جماعت پاکستان تحریک انصاف (پی ٹی آئی) کے ہزاروں کارکنوں نے ملک کے مختلف شہروں میں بہت سی ایسی تنصیبات اور عمارات پر حملے کیے تھے، جو ملکی فوج کی ملکیت تھیں یا ان کی حیثیت غیر فوجی املاک کی تھی۔

یہ حملے عمران خان کی مالی بدعنوانی کے الزام میں گرفتاری کے خلاف احتجاج کے دوران کیے گئے تھے اور ان پرتشدد واقعات میں کم ا زکم آٹھ افراد ہلاک ہو گئے تھے۔

نو مئی کے واقعات کے دوران فوجی تنصیبات پر حملوں کو پاکستانی فوج کی طاقت اور اس کے اثر و رسوخ کے لیے سب سے بڑا چیلنج قرار دیا گیا تھا۔ اسی پس منظر میں پارٹی رہنما عمران خان کو ان خونریز واقعات کے سلسلے میں دہشت گردی کے الزامات کا سامنا ہے۔

انہی حملوں کے سلسلے میں پی ٹی آئی کے کئی کارکنوں اور حامیوں کو پہلے بھی سزائیں سنائی جا سکی ہیں۔

کیا پاکستان کو ایک نئی انسداد فسادات فورس کی ضرورت ہے؟

اس وقت 72 سالہ عمران خان کو2022ء میں سربراہ حکومت کے عہدے سے پارلیمانی عدم اعتماد کے ذریعے ہٹائے جانے کے بعد سے اپنے خلاف درجنوں مقدمات کا سامنا ہے اور وہ گزشتہ ایک سال سے زائد عرصے سے جیل میں ہیں۔

بشریٰ بی بی کے وارنٹ گرفتاری

اسلام آباد سے موصولہ دیگر رپورٹوں میں بتایا گیا ہے کہ پاکستان کی ایک عدالت نے عمران خان کی اہلیہ بشریٰ بی بی کے خلاف کرپشن کے الزامات میں وارنٹ گرفتاری جاری کر دیے ہیں۔

عمران خان اور بشریٰ بی بی کے خلاف نئے الزامات

یہ وارنٹ جاری کیے جانے کے بعد اب یہ امکان پیدا ہو گیا ہے کہ بشریٰ بی بی کو دوبارہ گرفتار کیا جا سکتا ہے۔ انہیں بھی اپنے شوہر کی طرح کئی مقدمات کا سامنا ہے اور وہ قریب دو ماہ پہلے ہی ضمانت پر جیل سے رہا کی گئی تھیں۔

بشریٰ بی بی اکتوبر میں ضمانت پر اپنی رہائی سے قبل نو ماہ تک جیل میں رہی تھیں اور ایسا ان کے خلاف توشہ خانہ کیس میں ہوا تھا۔

م م / ک م (روئٹرز)