1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں
معاشرہفرانس

نیا سال فرانس کے لیے امید اور افتخار لیے ہوئے ہو گا، ماکروں

1 جنوری 2024

صدر ماکروں نے نئے سال 2024 کو فرانس کے لیے امید اور افتخار سے عبارت کیا ہے۔ سال نو کے پیغام میں ان کا کہنا تھا، ’’کسی ایک صدی میں اولمپکس اور پیرالمپکس کی میزبانی بالکل ایسی ہی ہے، جیسے کسی کیتھیڈرل کی تعمیر نو۔‘‘

فرانسیسی صدر ماکروں کا سال نو کا خطاب ٹی وی سے بھی نشر کیا گیا
فرانسیسی صدر ماکروں کا سال نو کا خطاب ٹی وی سے بھی نشر کیا گیاتصویر: Eliot Blondet/abaca/picture alliance

اتوار اکتیس دسمبر کی رات نئے سال کے لیے فرانسیسی قوم کے نام اپنے پیغام میں صدر ایمانوئل ماکروں کا کہنا تھا کہ نیا سال دو ہزار چوبیس اس لیے فرانسیسی فخر اور امید کا سال ہو گا کہ اس برس پیرس سرمائی اولمپکس مقابلوں کی میزبانی بھی کرے گا اور اسی برس ملکی دارالحکومت میں ہی نوٹرے ڈیم کیتھیڈرل بھی تزئین نو کے بعد دوبارہ کھولا جائے گا۔ پیرس کا یہ عظیم الشان کیتھیڈرل سن 2019 میں آتش زدگی سے بری طرح متاثر ہوا تھا۔

پیرس کا مشہور زمانہ آئفل ٹاور عملے کی ہڑتال کے باعث بند

سال نو کا صدر ماکروں کا یہ خطاب ٹی وی پر نشر کیا گیا۔ تاہم نئے سال کے آغاز کے موقع پر پیرس میں دہشت گردانہ حملوں کے خطرات کے پیش نظر نوے ہزار پولیس اہلکار جب کہ پانچ ہزار فوجی بھی تعینات کیے گئے تھے۔

پیرس میں نئے سال کا استقبال اور فتح کی محراب پر کی جانے والی آتش بازیتصویر: Benoit Tessier/REUTERS

اس موقع پر ایمانوئل ماکروں نے کہا کہ جب بات فرانس کی سلامتی کی ہو گی، تو فرانس اپنے دفاع کو مضبوط کرنے کے لیے خود کو بھرپور انداز سے مسلح کرے گا، مگر ساتھ ہی تعلیم اور سماجی شعبے میں ترقی کا فروغ بھی جاری رہے گا۔

فرانس میں امیگریشن سے متعلق متنازعہ قانونی بل منظور

پیرس میں ایک ٹریفک سگنل پر پولیس کے ہاتھوں ایک نوجوان کی ہلاکت کے واقعے اور اس کے خلاف شروع ہونے والے وسیع تر عوامی احتجاجی مظاہروں، دنیا میں متعدد مقامات پر جنگی تنازعات اور فرانس میں انتہائی غیرمقبول پینشن اصلاحات کے تناظر میں صدر ماکروں کے اس خطاب کو ان کی طرف سے عوام کو قدرے مطمئن کرنے کی ایک کوشش قرار دیا جا رہا ہے۔

پیرس میں فتح کی محراب کے قریب شانزے لیزے پر کیا جانے والا آتش بازی کا رنگا رنگ مظاہرہ دس منٹ تک جاری رہاتصویر: Benoit Tessier/REUTERS

پیرس میں نئے سال کا جشن

یورپی یونین کے رکن ملک فرانس کے وزیر داخلہ جیرالڈ دارمانیں کے مطابق نئے سال کو خوش آمدید کہنے کے لیے پیرس شہر کی مشہور زمانہ شاہراہ شانزے لیزے پر آٹھ لاکھ سے زائد افراد جمع ہوئے۔ پھر نصف شب اور نیا سال شروع ہونے سے کچھ ہی پہلے وہاں کھیلوں کے بہت سے موجودہ اور سابقہ عظیم کھلاڑیوں کی ویڈیوز بھی چلائی گئیں۔

فرانس: حکومتی مدد سے الیکٹرک کاروں کی لیزنگ، ماہانہ قسط صرف سو یورو

اس کے بعد جیسے ہی نیا سال شروع ہوا، تو وہاں اسی لمحے شروع ہونے والا آتش بازی کا شاندار مظاہرہ دس منٹ تک جاری رہا۔

حکام کے مطابق اس موقع پر حالات مجموعی طور پر پرامن رہے اور مختلف مگر معمولی نوعیت کے 40 واقعات میں 69 افراد کو حراست میں لے لیا گیا۔

ف ن/ ع ت (روئٹرز)

پیرس میں پانی پر چلنے والی بس

02:04

This browser does not support the video element.

ڈی ڈبلیو کی ٹاپ اسٹوری سیکشن پر جائیں

ڈی ڈبلیو کی ٹاپ اسٹوری

ڈی ڈبلیو کی مزید رپورٹیں سیکشن پر جائیں