نیا ریکارڈ: دنیا کے مہنگے ترین دفاعی فٹبالر اب ہیری میگوائر
6 اگست 2019
فٹبال کی دنیا میں کسی دفاعی کھلاڑی کے لیے ایک کلب کی طرف سے دوسرے کلب کو ادا کی جانے والی رقم کا ایک نیا عالمی ریکارڈ قائم ہو گیا ہے۔ برطانوی فٹبالر ہیری میگوائر کے لیے ادا کی گئی اس رقم کی مالیت 87.5 ملین یورو بنتی ہے۔
ہیری میگوائر، دائیں، انگلینڈ کی فٹبال ٹیم کے کھلاڑی کے طور پر اپنے ساتھی فٹبالر جان سٹونز کے ساتھتصویر: Reuters/C. G. Rawlins
اشتہار
ہیری میگوائر کا تعلق اب تک انگلش فٹبال کلب لیئسٹر سٹی سے تھا لیکن انگلینڈ ہی میں ریکارڈ حد تک فٹبال لیگ جیتنے والی ٹیم مانچسٹر یونائیٹڈ نے اب ان کی خدمات خرید لی ہیں۔ اس کے لیے مانچسٹر یونائیٹڈ نے لیئسٹر سٹی کو 87.5 ملین یورو ادا کیے ہیں، جو فٹبال کی تاریخ میں کسی بھی دفاعی کھلاڑی کے ایک کلب سے دوسرے کلب میں جانے کے لیے ادا کی گئی آج تک کی سب سے بڑی رقم ہے۔
اس سے قبل یہ ریکارڈ 2018ء میں ہالینڈ سے تعلق رکھنے والے دفاعی کھلاڑی ورجِل فان ڈائیک کی وجہ سے بنا تھا، جن کی خدمات حاصل کرنے کے لیے انگلش کلب ایف سی لیورپول نے انگلینڈ ہی کے ایک اور فٹبال کلب ایف سی ساؤتھیمپٹن کو 84.5 ملین یورو ادا کیے تھے۔
فٹبال کے کسی جرمن دفاعی کھلاڑی کے تبادلے کے لیے آج تک کسی کلب نے جو زیادہ سے زیادہ رقم ادا کی ہے، وہ 41 ملین یورو بنتی ہے۔ یہ رقم ریو ڈی جنیرو میں ہوئے مقابلوں میں فیفا ورلڈ کپ جیتنے والی جرمن قومی ٹیم کے ایک البانوی نژاد رکن اور معروف دفاعی کھلاڑی شکودران مصطفیٰ کے لیے 2016ء میں ایف سی آرسنل نے ایف سی ویلینسیا کو ادا کی تھی۔
لیورپول کے لیے کھیلنے والے ڈچ دفاعی کھلاڑی ورجِل فان دائیک جن کے لیے 84.5 ملین یورو ادا کیے گئے تھےتصویر: Reuters/Action Images/A. Boyers
فٹبال کے کھیل میں کلبوں کی سطح پر دفاعی کھلاڑیوں کے تبادلے کے لیے زیادہ سے زیادہ رقوم کی ادائیگی کے آج تک جو 10 بڑے ریکارڈ بنے ہیں، ان میں سے چار واقعات میں یہ رقوم انگلینڈ کے کھلاڑیوں کے لیے اور تین واقعات میں فرانسیسی کھلاڑیوں کے لیے ادا کی گئیں۔
ان دس مہنگے ترین دفاعی کھلاڑیوں کی فہرست میں برازیل کے ایک فٹبالر اور ہالینڈ کے کھلاڑیوں کے نام بھی آتے ہیں۔
ان دس دفاعی فٹبالروں کے لیے آج تک ادا کی جانے والی رقوم یہ ہیں: 1۔ ہیری میگوائر 87.5 ملین یورو، 2۔ ورجِل فان ڈائیک 84.5 ملین یورو، 3۔ لوکاس ہیرنانڈیس 80 ملین یورو، 4۔ ماتھائیس دے لیگٹ 75 ملین یورو، 5۔ ایمیریک لاپورٹ 65 ملین یورو، 6۔ بینجمن مینڈی 57.5 ملین یورو، 7۔ جان سٹونز 55.6 ملین یورو، 8۔ ایرن وان بساکا 55 ملین یورو، 9۔ کائل واکر 52.7 ملین یورو اور 10۔ ایڈر میلیٹاؤ 50 ملین یورو۔
م م / ع ت / ایس آئی ڈی
جرمن قومی فٹبال لیگ کے مہنگے ترین کھلاڑی
جرمنی کی قومی فٹبال لیگ ’بنڈس لیگا‘ میں کھیلنے والے کھلاڑیوں کی خدمات پاکستانی روپوں میں اربوں روپے کے بدلے حاصل کی جاتی ہیں۔
تصویر: Reuters
روبرٹو فرمینو
ناقابل یقین حد تک زیادہ رقم یعنی 41 ملین یورو کے عوض 23 سالہ برازیلی کھلاڑی ہوفن ہائیم کی ٹیم کو چھوڑ کر پریمیئر لیگ میں لیورپول کی ٹیم کے لیے کھیلیں گے۔ پاکستانی روپوں میں یہ رقم چار ارب، 71 کروڑ اور 50 لاکھ کے قریب بنتی ہے۔ اگر رپورٹ کی گئی رقم درست ہوئی تو فرمینو مہنگے ترین کھلاڑی بن جائیں گے۔
تصویر: picture-alliance/augenklick/GES-Sportfoto
خاوی مارٹینیز
اب تک سب سے زیادہ رقم کے عوض ایک کلب چھوڑ کر دوسرے میں جانے کا اعزاز بائرن میونخ کے ہسپانوی کھلاڑی خاوی مارٹینیز کے پاس تھا۔ 2012ء میں بائرن میونخ کی ٹیم نے 40 ملین یورو کے عوض اتھلیکٹک بِلباؤ کلب میں کھیلنے والے مارٹینیز کی خدمات حاصل کی تھیں۔ فرمینو کی لیورپول میں جانے کے لیے معاوضے کی رقم کے بعد مارٹینیز دوسرے مہنگے ترین کھلاڑی بن گئے ہیں۔
تصویر: imago/Team 2
ماریو گوٹزے
2013ء میں بائرن میونخ نے 37 ملین یورو کے عوض بوروسیا ڈورٹمنڈ میں کھیلنے والے معروف کھلاڑی ماریو گوٹزے کی خدمات حاصل کیں۔
تصویر: AFP PHOTO / PATRIK STOLLARZ
ایڈِن جیکو
قریب اتنی ہی رقم مانچسٹر سِٹی نے 2010-11 میں وولفس بُرگ کی ٹیم میں کھیلنے والے کھلاڑی بوسنیا کے کھلاڑی ایڈن جیکو کے لیے ادا کی۔ اس اسٹرائیکر کھلاڑی نے دونوں ٹیموں کے ساتھ باری باری مقامی لیگ میں فتح حاصل کی۔ انہوں نے بوسنیا کی قومی ٹیم کے لیے کھیلتے ہوئے پہلی بار اس کے ورلڈ کپ ٹورنامنٹ میں پہنچنے میں بھی مدد دی۔
تصویر: imago/Sportimage
اندری شُرلے
جرمن کلب وولفس بُرگ نے 2015ء کے آغاز میں چیلسی کلب سے اندری شُرلے کی خدمات 32 ملین یوروز میں حاصل کیں۔ تاہم وہ ابھی تک اتنے زیادہ معاوضے کا حق ادا نہیں کر پائے۔
تصویر: S. Franklin/Bongarts/Getty Images
مانوئل نوئر
صرف گول اسکور کرنے والے کھلاڑی ہی زیادہ معاوضہ حاصل کرنے والوں میں شامل نہیں ہیں بلکہ 2011ء میں جرمن کلب شالکے کے گول کیپر مانوئل نوئر کی خدمات بائرن میونخ نے 30 ملین یوروز میں حاصل کیں۔ اور یہ بات عیاں ہے کہ نوئر نے اپنے کھیل کی بدولت بائرن میونخ کو فتوحات سے ہمکنار کیا ہے۔
تصویر: Hangst/Bongarts/Getty Images
ٹونی کروس
ٹونی کروس برازیل میں کھیلے جانے والے فٹبال ورلڈ کپ میں جرمن ٹیم کے ایک اہم مرکزی کھلاڑی رہے۔ وہ 2014ء میں ہی بائرن میونخ سے 30 ملین یورو کے عوض ریال میڈرڈ میں شامل ہوئے تھے۔ تاہم ریال میڈرڈ کے لیے جو کرسٹیانو رونالڈو جیسے کھلاڑیوں کے لیے 90 ملین یورو تک خرچ کر چکی ہے، یہ رقم اتنی زیادہ نہیں لگتی۔
تصویر: Denis Doyle/Getty Images)
ماریو گومیز
اس بات کو کچھ سال بیت چکے ہیں مگر ماریو گومیز کی 30 ملین یورو کے عوض اشٹٹ گارٹ سے بائرن میونخ منتقلی اس وقت ایک بڑی خبر تھی۔ بنڈس لیگا میں یہ اب بھی ٹاپ ٹین ٹرانسفرز میں شمار ہوتا ہے۔ جرمن کھلاڑی ماریو گومیز اب اطالوی کلب فیورنٹینا کے لیے کھیلتے ہیں۔
